03/06/2026
Azərbaycanın enerji siyasəti və qlobal enerji təhlükəsizliyində rolu
Prezident İlham Əliyev 2026-cı il iyunun 1-də Bakı Enerji Həftəsinin rəsmi açılış mərasimində çıxış edərək Azərbaycanın enerji siyasətinin uğurlarından, ölkənin enerji təhlükəsizliyinə verdiyi töhfələrdən və gələcək perspektivlərdən danışmışdır.
Dövlət başçısı bildirib ki, Xəzər Neft və Qaz Sərgisi müasir Azərbaycanın enerji inkişafının bünövrəsini qoymuş, zaman keçdikcə genişlənərək beynəlxalq əhəmiyyətli Bakı Enerji Həftəsinə çevrilmişdir. Prezident vurğulamışdır ki, dünyanın ən iri qaz yataqlarından biri olan Şahdəniz üzrə müqavilənin imzalanması Azərbaycanın qaz hasilatında yeni mərhələnin başlanğıcı olmuşdur. O, Bakı Enerji Həftəsinin qlobal enerji səhnəsində aparıcı tədbirlərdən biri olduğunu qeyd etmişdir.
Çıxışda enerji təhlükəsizliyinin əhəmiyyəti xüsusi vurğulanmış, neft və qaz istehsalçılarının əsassız tənqid edilməsinin düzgün olmadığı bildirilmişdir. Prezident qeyd etmişdir ki, dünya faydalı qazıntılar olmadan yaşaya bilməz və enerji siyasətində praqmatik yanaşma əsas götürülməlidir.
Prezident İlham Əliyev Azərbaycanın enerji inkişafının əsasının 1994-cü ildə qoyulduğunu xatırlatmış, həmin dövrdə ölkənin ağır iqtisadi və siyasi vəziyyətdə olduğunu bildirmişdir. Qeyd edilmişdir ki, təbii sərvətlərdən səmərəli istifadə nəticəsində ölkədə yoxsulluq və işsizlik səviyyəsi əhəmiyyətli dərəcədə azalmış, iqtisadi sabitlik təmin olunmuşdur. Bu gün Azərbaycanın xarici borcu ən aşağı səviyyələrdən biridir və ölkənin strateji valyuta ehtiyatları xarici borcu 18 dəfədən çox üstələyir.
Dövlət başçısı iqtisadi inkişafın güclü ordunun formalaşmasına imkan yaratdığını vurğulayaraq, Azərbaycanın 44 günlük Vətən müharibəsində əldə etdiyi qələbənin ölkənin iqtisadi və hərbi potensialının nəticəsi olduğunu bildirmişdir.
Çıxışda Azərbaycanın həyata keçirdiyi beynəlxalq enerji layihələrinin əhəmiyyətindən də bəhs olunmuşdur. Qeyd edilmişdir ki, Bakı-Tbilisi-Ceyhan, Bakı-Supsa, Cənubi Qafqaz qaz kəməri, TANAP və TAP layihələri ölkələrin enerji təhlükəsizliyinin təmin edilməsində mühüm rol oynayır. Hazırda Azərbaycan qazı 16 ölkəyə ixrac olunur və onların 10-u Avropa İttifaqının üzvüdür.
Prezident Azərbaycanın Xəzər dənizinin şərq sahilində yerləşən tərəfdaş ölkələr üçün mühüm tranzit imkanları yaratdığını, həmçinin SOCAR-ın beynəlxalq fəaliyyətinin genişləndiyini diqqətə çatdırmışdır. Bildirilmişdir ki, ölkəmiz yalnız neft və qaz deyil, neft məhsulları, elektrik enerjisi, neft-kimya məhsulları və bərpaolunan enerji sahəsində də ixrac potensialını artırır.
Dövlət başçısı mövcud qaz ehtiyatlarının ən azı yüz il ərzində ölkənin və tərəfdaş dövlətlərin tələbatını ödəməyə kifayət edəcəyini bildirmişdir. Bununla yanaşı, Azərbaycanın bərpaolunan enerji sahəsinə böyük sərmayələr yatırdığı qeyd olunmuşdur. Gələn ilin sonuna qədər günəş və külək enerjisi üzrə gücün 2 giqavata, 2032-ci ilin sonuna qədər isə 8 giqavata çatdırılması planlaşdırılır.
Prezident İlham Əliyev Qara dəniz Enerji Kabeli layihəsinin, Azərbaycan–Gürcüstan–Türkiyə–Bolqarıstan enerji bağlantısının və Mərkəzi Asiya ilə yaşıl enerji əməkdaşlığının strateji əhəmiyyətini vurğulamışdır. O, həmçinin Şərq-Qərb nəqliyyat dəhlizinin uğurla fəaliyyət göstərdiyini, Zəngəzur dəhlizinin isə regionun nəqliyyat imkanlarını daha da genişləndirəcəyini bildirmişdir.
Sonda Prezident İlham Əliyev Azərbaycanın təşəbbüsləri və investisiyaları nəticəsində formalaşan geniş regional əməkdaşlıq mühitinin gələcəkdə də enerji təhlükəsizliyinə və iqtisadi inkişafa mühüm töhfələr verəcəyinə əminliyini ifadə etmişdir.
İsmayıllı rayon R.Qurbanov adına Uştalqışlaq kənd tam orta ümumtəhsil məktəbinin Azərbaycan dili və ədəbiyyat müəllimi Pərvanə Mustafalı
