Boradigah qəsəbə Nizami Gəncəvi adına 1 nömrəli tam orta ümumtəhsil məktəbi

25/05/2026

Boradigah qəsəbə Nizami Gəncəvi adına 1 nömrəli tam orta ümumtəhsil məktəbinin kitabxanasında Xalq şairi, tanınmış yazıçı və ictimai xadim Sabir Rüstəmxanlının 80 illik yubileyinə həsr olunmuş təntənəli tədbir keçirilib.
​Məktəbimizin kitabxana müdiri Aytən Nurullayevanın təşkilatçılığı ilə baş tutan tədbirdə şairin zəngin həyat yolu və bənzərsiz yaradıcılığı haqqında şagirdlərə geniş məlumat verilib. Tədbir çərçivəsində məktəblilər tərəfindən Sabir Rüstəmxanlının vətənpərvərlik ruhundakı unudulmaz şeirləri səsləndirilib və maraqlı bədii kompozisiyalar təqdim olunub.

23/05/2026

Məktəbimizin 20 illik məzunları tərəfindən doğma təhsil ocağımıza növbəti dəyərli dəstək təşəbbüsü irəli sürülmüşdür. Məzunlarımızın yaxın günlərdə göstərəcəyi maddi-mənəvi yardım sayəsində məktəbin sanitar qovşağında yenidənqurma işlərinin aparılması, həmçinin məktəbin ikinci mərtəbəsinə yeni su xəttinin çəkilməsi planlaşdırılır. Bu nəcib addım məktəbimizdə şagird və müəllim heyəti üçün daha əlverişli və rahat şəraitin yaradılmasına mühüm töhfə verəcəkdir.
Bu xeyirxah işlərin icrasını və təşkilatçılığını tamamilə öz üzərinə götürən məzunlarımızın hər birinə indidən məktəb rəhbərliyi və kollektivi adından dərin təşəkkürümüzü bildiririk!"

10/05/2026

Boradigah qəsəbəsinin tanınmış ziyalılarından olan Hüseynov Nəriman Muxtar oğlu 1928-ci ildə Masallı rayonunun Boradigah qəsəbəsində anadan olmuşdur.
1945-ci ildə tam orta məktəbi bitirdikdən sonra həmin ildə Pedaqoji İnstituta daxil olmuş, 1949-cu ildə ali təhsilini başa vuraraq doğma məktəbində direktor müavini vəzifəsinə təyin edilmişdir. Nəriman müəllim müxtəlif illərdə təhsil sahəsində böyük fədakarlıqla çalışmış, 1955–1957-ci illərdə Mahmudavar orta məktəbində müəllim kimi fəaliyyət göstərmişdir.
1961-ci ildən etibarən Boradigah tam orta məktəbinə direktor təyin olunan Nəriman Hüseynov bu məsul və şərəfli vəzifədə 47 il 7 ay çalışaraq məktəbin inkişafında, gənc nəslin təlim-tərbiyəsində mühüm xidmətlər göstərmişdir. O, 26 avqust 2011-ci ildə təqaüdə çıxmışdır.
Nəriman müəllim təhsil sahəsindəki səmərəli fəaliyyətinə görə yüksək qiymətləndirilmiş, 5-ci, 7-ci və 8-ci Azərbaycan müəllimləri qurultaylarının iştirakçısı olmuşdur. O, “Rəşadətli əməyə görə” medalı ilə təltif edilmiş, Azərbaycan Respublikasının prezidenti cənab İlham Əliyevin 03 oktyabr 2008-ci il tarixli 3070 nömrəli Sərəncamı ilə “Əməkdar müəllim” fəxri adına layiq görülmüşdür.
Hüseynov Nəriman Muxtar oğlu 2017-ci ildə vəfat etmişdir. Onun təhsil sahəsindəki xidmətləri, zəngin pedaqoji fəaliyyəti və xeyirxah insan kimi xatirəsi daim ehtiramla yad olunur.
Allah rəhmət eləsin.

10/05/2026

Bu gün Azərbaycan xalqının Ümummilli lideri, müasir müstəqil dövlətimizin memarı və qurucusu Heydər Əliyevin doğum günüdür.

Ulu öndər bütün fəaliyyəti boyunca təhsili dövlət siyasətinin ən prioritet istiqamətlərindən biri hesab etmiş, gənclərin savadlı, vətənpərvər və milli dəyərlərə bağlı şəkildə yetişməsinə xüsusi önəm vermişdir.

Heydər Əliyevin söylədiyi kimi:“Təhsil sahəsi xalqımızın bu günü, millətimizin və dövlətimizin gələcəyi üçün ən vacib sahədir”.

Bu dəyərli fikir bu gün də ölkəmizdə təhsil siyasətinin əsas istiqamətlərindən biri olaraq qalır.

09/05/2026

Mayın 9-u Faşizm Üzərində Qələbə Günüdür.

07/05/2026

Masallı rayonu, Boradigah qəsəbə Nizami Gəncəvi adına 1 nömrəli tam orta məktəbində müasir Azərbaycan dövlətinin qurucusu, Ümummilli Lider Heydər Əliyevin anadan olmasının 103-cü ildönümünə həsr olunmuş təntənəli tədbir keçirilib.
​Tədbir Azərbaycan Respublikasının Dövlət Himninin səsləndirilməsi və Ulu Öndərin əziz xatirəsinin bir dəqiqəlik sükutla yad edilməsi ilə başlayıb.
​Məktəbin tarix müəllimi Elmar Rzayev məruzə ilə çıxış edərək şagirdlərə dahi şəxsiyyətin həyat yolu, Azərbaycanın müstəqilliyi və inkişafı naminə göstərdiyi misilsiz xidmətlər barədə geniş məlumat verib. O öz çıxışında Heydər Əliyevin təhsilə və gənclərə göstərdiyi qayğının bu gün də uğurla davam etdirildiyini xüsusi vurğulayıb.
​Tədbirin bədii hissəsində məktəbin şagirdləri tərəfindən hazırlanan kompozisiyalar təqdim olunub:
​Vətənpərvərlik ruhunda şeirlər: Şagirdlər Ulu Öndərə və Vətənə həsr olunmuş bədii qiraət nümunələri ilə çıxış ediblər.
​Məktəblilərin ifasında səslənən mahnılar tədbir iştirakçıları tərəfindən maraqla qarşılanıb.

06/05/2026

06/05/2026

Boradigah qəsəbə Nizami Gəncəvi adına 1 nömrəli tam orta ümumtəhsil məktəbində ümummilli lider Heydər Əliyevin anadan olmasının 103-cü ildönümünə həsr olunmuş intellektual yarış təşkil olunmuşdur.
Tədbirin keçirilməsində əsas məqsəd şagirdlərə Heydər Əliyevin zəngin siyasi irsi, dövlətçilik fəaliyyəti və Azərbaycan xalqı qarşısındakı xidmətləri haqqında biliklərin aşılanması, eyni zamanda onların intellektual səviyyəsinin inkişaf etdirilməsi olmuşdur.
Yarışda məktəbin müxtəlif sinif şagirdləri iştirak etmiş, bilik və bacarıqlarını nümayiş etdirmişlər. Gərgin və maraqlı mübarizə şəraitində keçən yarışın qalibi VII sinif şagirdləri olmuşdur.

05/05/2026

Boradigah qəsəbə Nizami Gəncəvi adına 1 nömrəli tam orta ümumtəhsil məktəbində dahi Azərbaycan şairi Xaqani Şirvaninin 900 illik yubileyi münasibətilə tədbir keçirilib. Tədbirdə şagirdlər şairin zəngin ədəbi irsi, həyat və yaradıcılığı haqqında məlumatlar təqdim edib, onun qəzəl və qəsidələrindən nümunələr səsləndiriblər.
Müəllimlərin çıxışlarında Xaqani Şirvaninin Azərbaycan ədəbiyyatındakı mövqeyi və dünya ədəbiyyatına verdiyi töhfələr xüsusi vurğulanıb. Şagirdlərin hazırladıqları səhnəciklər və bədii kompozisiyalar tədbirə xüsusi rəng qatıb.