Azərbaycan Respublikasının Vəkillər Kollegiyası-Azerbaijani Bar Association

05/06/2026

Anar Bağırov: "Azərbaycanda hüquqşünasların sayı azdır"

Azərbaycanda hüquqşünas azlığı problemi daim qaldırılan məsələlərdən biridir.

05/06/2026

Vəkillər Kollegiyasının sədri: "Hüquqi xidmətlər bazarının tənzimlənməməsi ciddi problemdir"

Azərbaycanda hüquqi xidmətlər bazarında tənzimləmənin olmaması ciddi problemdir.

04/06/2026

Vəkillər Kollegiyasının dəstəyi ilə Ali Məhkəmədə keçirilən ELSA məhkəmə müsabiqəsinin qalibi məlum olub

2026-cı il mayın 30-da Azərbaycan Respublikasının Ali Məhkəməsində ELSA Azərbaycan (ELSA Azerbaijan) tərəfindən Azərbaycan Respublikası Vəkillər Kollegiyasının maliyyə və təşkilati dəstəyi ilə XV Milli Məhkəmə Müsabiqəsinin final mərhələsi və bağlanış mərasimi keçirilib.

Tədbirdə çıxış edən Vəkillər Kollegiyası sədrinin müavini Şahmar Məmmədov Hüquq fakültəsinin tələbələrinin simulyasiya xarakterli məhkəmə proseslərində iştirakının onların nəzəri biliklərinin praktiki bacarıqlarla möhkəmləndirilməsi baxımından xüsusi əhəmiyyət kəsb etdiyini vurğulayıb.

Sədr müavini qeyd edib ki, Vəkillər Kollegiyası hüquq təhsili alan gənclərin peşəkar inkişafına yönəlmiş təşəbbüslərə hər zaman xüsusi önəm verir və bu kimi layihələri daim dəstəkləyir. Şahmar Məmmədov hüquqşünas tələbələrin peşəkar hazırlıq səviyyəsinin yüksəldilməsi, onların vəkillik peşəsinə marağının artırılması və hüquqi biliklərinin təkmilləşdirilməsi istiqamətində Kollegiya tərəfindən müxtəlif layihələrin həyata keçirildiyini diqqətə çatdırıb. Sədr müavini final mərhələsində iştirak edən bütün komandalara uğurlar arzulayaraq, yarışın iştirakçılar üçün faydalı təcrübə və peşəkar inkişaf baxımından mühüm platforma olacağına əminliyini ifadə edib.

Mərasimdə ELSA Azərbaycanın rəhbəri Tarif Hüseynov çıxış edərək müsabiqənin təşkilində göstərdiyi maddi və təşkilati dəstəyə görə Vəkillər Kollegiyasına minnətdarlığını ifadə edib. Eyni zamanda final mərhələsinin Ali Məhkəmədə keçirilməsinə imkan yaratdığına görə məhkəmə rəhbərliyinə dərin təşəkkürünü bildirib.

Ətraflı: https://barassociation.az/news/2006

04/06/2026

Vəkillərə “Müflisləşmə, onun hüquqi əsasları, nəzəri və praktiki təcrübə” mövzusunda təlim təşkil olunub

2026-cı il mayın 30-da Vəkillər Kollegiyasının Tədris Mərkəzinin təşkilatçılığı ilə Dünya Bankı Qrupunun “Business Ready” layihəsinin “Biznesin müflisləşməsi” indikatoru üzrə müvafiq sahədə təkmilləşmələrin və kommunikasiyanın həyata keçirilməsinə dair 2026-cı il üzrə Yol xəritəsinə müvafiq olaraq, vəkillər üçün müflisləşmə və sağlamlaşdırma üzrə “Müflisləşmə, onun hüquqi əsasları, nəzəri və praktiki təcrübə” mövzusunda distant formada təlim təşkil olunub.

Təlimdə qeyd olunub ki, bu tədris tədbirində iştirak Kollegiya üzvlərinin 31 yanvar 2026-cı il tarixində keçirilmiş ümumi yığıncağında (konfransda) qəbul edilmiş və Kollegiya üzvləri üçün peşə hazırlığı, eləcə də ixtisaslarının artırılması üzrə nəzərdə tutulmuş ikinci istiqamət üzrə 3 saat icbari tədris tədbirlərinə daxildir.

Təlimin əsas hissəsində təlimçi qismində Vəkillər Kollegiyasının üzvü, Bakı şəhəri 24 saylı Vəkil Bürosunun vəkili, Ləğvetmə Agentliyinin direktoru Vüsal Kazımzadə müflisləşmə haqqında qanunvericilik bazası, müflisləşmə prosedurunun hüquqi əsasları, müflisləşmə işlərinə məhkəmə qaydasında baxılması, borclunun müflisləşmə halları, kreditorların hüquq və tələblərinin müdafiəsi, müflisləşmə zamanı əmlak kütləsinin formalaşdırılması, müflisləşmə prosesində inzibatçının səlahiyyətləri, həmçinin müflisləşmə prosesinin mərhələləri, müflisləşmənin başlanma şərtləri, müflisləşmənin hüquqi nəticələri, müflisləşmə və iflas prosedurlarının fərqləndirilməsi barədə ətraflı çıxış edib.

Ətraflı: https://barassociation.az/news/2005

03/06/2026

Vəkillər Kollegiyasının sədri: Qərbi azərbaycanlıların deportasiyası beynəlxalq hüquq müstəvisində qiymətləndirilməlidir

Qərbi Azərbaycan coğrafi bir anlayışdan daha geniş və əhatəli bir məfhumdur. Bu torpaqlar üzərindəki azərbaycanlıların varlığı min illərə uzanır. Onların bu torpaqlarda doğulması, yaşaması, həmin torpaqların daşını, suyunu, havasını canlarının bir parçasına çevirməsi heç bir sənədlə inkar edilə bilməyəcək tarixi bir həqiqətdir. Lakin 1987-1991-ci illərdə ermənilər tərəfindən həyata keçirilən etnik təmizləmə siyasəti nəticəsində 300 minə yaxın azərbaycanlı öz torpaqlarından zorla qovulub.

AZƏRTAC xəbər verir ki, bunu Vəkillər Kollegiyasının sədri Anar Bağırov Bakı Dövlət Universiteti (BDU) və Qərbi Azərbaycan İcmasının (QAİ) birgə təşkilatçılığı ilə keçirilən “Qərbi Azərbaycana qayıdış: milli ideyanın yeni mərhələsi kimi” mövzusunda I beynəlxalq elmi konfransda deyib.

Sədr bildirib ki, bu deportasiya beynəlxalq hüquqda açıq-aşkar müəyyən olunmuş meyarlara görə, etnik təmizləmənin ən ağır formasından biri kimi qiymətləndirilməlidir: “Beynəlxalq hüquq baxımından bu hadisələr həm Mülki və Siyasi Hüquqlar üzrə Beynəlxalq Paktın, həm də İnsan Hüquqları üzrə Avropa Konvensiyasının açıq pozuntusunu təşkil edir.

Belə ki, beynəlxalq hüquq qaçqın və məcburi köçkünlərin öz torpaqlarına qayıdış hüququnu açıq şəkildə tanıyır. BMT-nin Qaçqınların Statusuna dair 1951-ci il Konvensiyası, Mülki və Siyasi Hüquqlar üzrə Beynəlxalq Paktın bir sıra maddələri, həmçinin BМТ Baş Assambleyasının bir sıra qətnamələri sübut edir ki, öz ölkəsindən zorla qovulmuş hər bir şəxsin geri qayıtmaq hüququ vardır.

Eyni zamanda, 2023-cü ildə Azərbaycanın öz işğal altındakı torpaqlarını azad etməsi ilə yaranan yeni reallıq Qərbi Azərbaycan məsələsinə beynəlxalq aləmin diqqətini daha kəskin şəkildə yönəldib. Cənubi Qafqazda ədalətin tam bərpasının mümkün olduğunu nümayiş etdirən bu tarixi hadisə Qərbi Azərbaycana qayıdış tələbinin beynəlxalq hüquqa və tarixi ədalət prinsiplərinə əsaslanan legitimliyini daha da gücləndirib”.

Anar Bağırov qeyd edib ki, Qərbi azərbaycanlıların deportasiyası faktlarının beynəlxalq hüquq müstəvisində sistemli şəkildə sənədləşdirilməsi və hüquqi qiymətləndirilməsi istiqamətində işlər davam etdirilməlidir: “Onların hüquqlarının müdafiəsi məqsədilə beynəlxalq hüquqi mexanizmlərdən və aidiyyəti beynəlxalq institutlardan daha fəal və səmərəli şəkildə istifadə olunmalıdır. Bu mövzu üzrə müqayisəli hüquqi tədqiqatların genişləndirilməsi vacibdir. Dünyanın müxtəlif regionlarında baş vermiş deportasiya və məcburi köçürülmə halları, eləcə də qayıdış hüququnun təmin edilməsi təcrübəsi dərindən öyrənilməli və əldə olunan nəticələrdən faydalanılmalıdır. Gənc nəslin bu tarixi missiyaya daha fəal şəkildə cəlb edilməsi mühüm əhəmiyyət kəsb edir. Çünki Qərbi Azərbaycana qayıdış ideyasının gələcək nəsillərə ötürülməsi və davamlılığının təmin edilməsi məhz onların fəallığından və bu ideyaya bağlılığından asılıdır”.

https://azertag.az/xeber/anar_bagirov_qerbi_azerbaycanlilarin_deportasiyasi_beynelxalq_huquq_mustevisinde_qiymetlendirilmelidir_video-4238675

02/06/2026

Son iki ayda 1 600-dən çox vəkilə peşə hazırlığı və ixtisasartırma təlimləri keçirilib

Cari il aprel-may aylarında Azərbaycan Respublikası Vəkillər Kollegiyasının Tədris Mərkəzi və Azərbaycan Respublikası Ədliyyə Nazirliyinin Ədliyyə Akademiyasının birgə təşkilatçılığı ilə Kollegiyanın üzvləri üçün müxtəlif icbari tədris tədbirləri təşkil olunub.

Aprelin 25-də “Vərəsəlik hüququnun aktual problemləri və tətbiq məsələləri” mövzusunda hibrid qaydada keçirilən təlimdə təlimçi - Vəkillər Kollegiyasının üzvü, “İsmayılbəyli və partnyorları” Vəkil Bürosunun müdiri Sevinc Əliyeva vərəsəlik hüquq münasibətlərinin subyektləri, ləyaqətsiz vərəsə, vərəsə ola bilməyən şəxslər, qanun üzrə və vəsiyyətnamə üzrə vərəsəlik, o cümlədən mirasın qəbul edilməsi və ondan imtina, sahə üzrə mövcud problemlər və onların həlli yolları barədə geniş çıxış edib.

Eyni zamanda aprelin 25-də “İnformasiya texnologiyalarının hüquq praktikasına təsiri” mövzusunda təşkil olunmuş növbəti hibrid təlimdə isə təlimçi - Vəkillər Kollegiyasının üzvü, “Elektron vəkillik” Komitəsinin sədri, “HGNS Kaunsilor” Vəkil Bürosunun müdiri Nihad Əliyev tərəfindən hüquq praktikasında rəqəmsal transformasiyanın tətbiqi və təsir mexanizmləri, şəxsi məlumatların qorunması, məlumat təhlükəsizliyi üzrə hüquqi öhdəliklər, vəkillərin rəqəmsal bacarıqlarının inkişafı, peşə standartlarına təsiri və digər əlaqəli məsələlər barədə geniş müzakirələr aparılıb.

Mayın 2-də isə “İnzibati icraatın əsasları və prinsipləri” mövzusunda hibrid qaydada keçirilən təlimdə təlimçi - Vəkillər Kollegiyasının üzvü Vəfadar Piriyev inzibati icraatın anlayışı və hüquqi mahiyyəti, inzibati icraatın hüquqi əsasları və normativ bazası, inzibati icraatın əsas prinsipləri, inzibati orqanların qərar qəbul etmə prosedurları, inzibati aktların qəbul edilməsi, qüvvəyə minməsi və ləğvi, inzibati icraatda iştirak edən tərəflərin hüquq və vəzifələri, inzibati icraat zamanı yol verilən tipik pozuntular və digər praktiki məsələlər barədə ətraflı çıxış edib.

Həmçinin mayın 2-də “Mənfəət vergisi, onun hesablanmasının və ödənilməsinin hüquqi əsasları” mövzusunda təşkil olunmuş növbəti hibrid təlimdə isə təlimçi - Vəkillər Kollegiyasının üzvü Vahid Hacı-zadə tərəfindən mənfəət vergisinin hesablanmasının hüquqi əsasları, mənfəət vergisinin ödənilməsinin hüquqi əsasları, mənfəət vergisini formalaşdıran gəlir və xərclərin qarşılıqlı təhlili, mənfəət vergisinin sahibkarlıq sahəsində rolu, mövcud problemlər və onların aradan qaldırılması yolları üzrə müxtəlif müzakirələr aparılıb.

Mayın 16-da isə "İnsan Hüquqları Aylığı" çərçivəsində “Dövlət hesabına göstərilən hüquqi yardımın praktiki tətbiqi məsələləri” mövzusunda təşkil olunmuş hibrid formalı təlimdə təlimçilər - Vəkillər Kollegiyası Rəyasət Heyətinin üzvü, Bakı şəhəri 4 saylı Vəkil Bürosunun müdiri Ramiz İbrahimov və Vəkillər Kollegiyası Hüquqi Yardım Mərkəzinin direktoru Afət Qaziyeva dövlət hesabına göstərilən hüquqi yardımın mahiyyəti və əsas xüsusiyyətləri, dövlət hesabına göstərilən hüquqi yardımın təyinatı və hüquqi əsasları, dövlət hesabına göstərilən hüquqi yardımın prinsipləri, vəkil tərəfindən dövlət hesabına göstərilən hüquqi yardımla müqavilə üzrə göstərilən hüquqi yardım arasında ümumilik və fərqlər barədə ətraflı çıxış ediblər.

Ətraflı: https://barassociation.az/news/2001

01/06/2026

Vəkillər Kollegiyasının rəhbərliyi Sloveniyada beynəlxalq tədbirlərdə iştirak edib

2026-cı il mayın 27-29-da Azərbaycan Respublikası Vəkillər Kollegiyasının (VK) sədri Anar Bağırovun rəhbərlik etdiyi nümayəndə heyəti Sloveniya Respublikasının paytaxtı Lyublyana şəhərində səfərdə olub.

Səfərdə VK sədri Anar Bağırovla yanaşı, Kollegiyanın Rəyasət Heyətinin üzvü Elçin Usub da iştirak edib.

Səfər çərçivəsində nümayəndə heyəti Avropa Vəkillər Kollegiyaları və Hüquq Cəmiyyətləri Şurasının (CCBE) plenar iclasına, eləcə də təşkilatın “Mübadilə, əməkdaşlıq və dəstək platforması” (PECO) Komitəsinin tədbirinə qatılıb.

İclas və tədbirdə müxtəlif ölkələrin Vəkillər kollegiyalarının və hüquq cəmiyyətlərinin rəhbərləri, beynəlxalq təşkilatların nümayəndələri, dövlət rəsmiləri və vətəndaş cəmiyyəti institutlarının təmsilçiləri iştirak ediblər.

Plenar iclasın açılış mərasimində Sloveniya Vəkillər Kollegiyasının prezidenti Janez Starman, Sloveniya Respublikasının Prezidenti Nataşa Pirc Musar, Sloveniya Ali Məhkəməsinin sədri Damjan Oroz və Sloveniya Məhkəmə Şurasının sədri Urşka Kezmah çıxış edərək iştirakçıları salamlayıblar. Çıxışlarda hüququn aliliyinin qorunması, beynəlxalq hüquqi əməkdaşlığın inkişafı və hüquq peşəsi nümayəndələri arasında institusional əlaqələrin gücləndirilməsinin əhəmiyyəti vurğulanıb.

İclas çərçivəsində CCBE rəhbərliyi tərəfindən təşkilatın cari fəaliyyəti, qarşıda duran prioritetlər və strateji inkişaf istiqamətləri barədə məlumat verilib. Eyni zamanda maliyyə məsələləri və təşkilatın qarşıdakı dövr üçün tədbirlər təqvimi təsdiqlənib. Həmçinin CCBE-nin fəaliyyəti üzrə yeniliklər nəzərdən keçirilib və strateji əhəmiyyət daşıyan sənəd layihələri müzakirə olunub. Bununla yanaşı, Vəkillər kollegiyaları, hüquq cəmiyyətləri, hüquq firmaları və vəkillər üçün istixana qazı emissiyaları və iqlim dəyişikliyi ilə bağlı CCBE Bələdçisinin layihəsinə baxılıb.

PECO iclasında çıxış edən VK sədri Anar Bağırov son illər ölkədə vəkillik institutunun dinamik inkişaf etdiyini, həyata keçirilən islahatlar nəticəsində vəkillərin sayının əhəmiyyətli dərəcədə artdığını bildirib. Sədr qeyd edib ki, vəkillik peşəsi ölkədə nüfuzlu və perspektivli hüquq fəaliyyət istiqamətlərindən birinə çevrilib.

Sədr VK-nın ali təhsil müəssisələri ilə əməkdaşlığının genişləndirildiyini, eləcə də “PAŞA Holding” ilə birgə həyata keçirilə “LEGIS Hüquq Forumu” layihəsinin hüquqi maarifləndirmə, peşəkar dialoq və hüquq ictimaiyyətinin inkişafına mühüm töhfə verdiyini diqqətə çatdırıb. Bununla yanaşı, yerli və beynəlxalq tərəfdaşlarla əməkdaşlıq çərçivəsində vəkillərin peşəkar hazırlığının artırılması istiqamətində ardıcıl tədbirlərin həyata keçirildiyi vurğulanıb.

Anar Bağırov çıxışının davamında Azərbaycanın beynəlxalq hüquq platformalarında fəal təmsil olunduğunu qeyd edərək, cari ilin oktyabr ayında ölkəmizin Avropa Gənc Vəkillər Assosiasiyasının (EYBA) payız konfransına ev sahibliyi edəcəyini və bununla bağlı hazırlıq işlərinin davam etdirildiyini söyləyib.

Ətraflı: https://barassociation.az/news/2000

01/06/2026

1 iyun - Uşaqların Beynəlxalq Müdafiəsi Günü

28/05/2026

28 May - Azərbaycanın Müstəqillik Günü

27/05/2026

Qurban bayramınız mübarək!