03/06/2026
Görkəmli ixtioloq alim, professor Zülfüqar Quliyevin əziz xatirəsinə...
3 iyun tanınmış bioloq, zoologiya və ixtiologiya elmləri sahəsinin görkəmli nümayəndəsi, biologiya elmləri doktoru, professor Zülfüqar Mustafa oğlu Quliyevin ad günüdür. O, 3 iyun 1932-ci ildə Azərbaycan Respublikasının Gədəbəy rayonunda anadan olub. 1951-ci ildə Azərbaycan Dövlət Universitetinin (indiki BDU) Biologiya fakültəsinə daxil olub, 1956-cı ildə oranı fərqlənmə diplomu ilə bitirib və həmin il Gədəbəy rayonunda pedoqoji fəaliyyətə başlayıb. O, 1958-ci ildə AMEA-nın Zoologiya İnstitutunda İxtiologiya ixtisası üzrə aspiranturaya daxil olub və akademik A.N. Derjavinin elmi rəhbərliyi altında “Kürətrafı ərazidə külmənin biologiyası və ehtiyatının vəziyyəti” mövzusunda dissertasiya işi üzərində işləyib və 1963-cü ildə namizədlik dissertasiyasını uğurla müdafiə edib. Alim Zoologiya İnstitutunda laborantlıqdan başlayaraq elmi katib, laboratoriya müdiri və ömrünün sonunadək "Su heyvanları" şöbəsinin müdiri vəzifələrində çalışıb. 1997-ci ildə Z.Quliyev “Cənubi və Orta Xəzər hövzəsinin çəki və xanıkimi balıqları populyasiyalarının strukturu, ekologiyası, yayılması və ehtiyatının bərpa olunması tədbirləri” mövzusunda doktorluq dissertasiyası müdafiə edib. Alim apardığı tədqiqatlar əsasında əldə etdiyi nəticələr haqqında müntəzəm olaraq Moskva, Leninqrad və keçmiş SSRİ-nin digər şəhərlərində, həmçinin bir çox xarici ölkələrdə keçirilən elmi konfranslarda, konqreslərdə və simpoziumlarda məruzələrlə çıxış edib.
Professor Z.Quliyev Xəzər dənizinin və daxili sututarların sənaye əhəmiyyətli balıq sərvətlərinin artırılması, həmçinin respublikada forel təsərrüfatlarının qurulması istiqamətində fundamental tədqiqatlar aparmışdır. Z.M.Quliyev 4 monoqrafiyanın müəllifi, 3 monoqrafiyanın həmmüəllifi, 260-dan çox elmi məqalənin, 8 elmi-metodiki təklifin, 2 elmi-kütləvi kitabçanın müəllifidir. Onun elmi rəhbərliyi altında 5 namizədlik dissertasiyası müdafiə olunub. Zəngin elmi xidmətlərinə görə "Əmək veteranı" ordeni və AMEA-nın Fəxri fərmanı ilə təltif edilib.
Gənc tədqiqatçıların yetişməsində böyük xidmətləri olan və kollektivin dərin hörmətini qazanan professor Zülfüqar Quliyev 2012-ci il fevralın 12-də Bakı şəhərində vəfat edib. Tanınmış alim və nəcib insanın əziz xatirəsi həmkarlarının, tələbələrinin və Azərbaycan elmi ictimaiyyətinin yaddaşında daim yaşayacaqdır. Allah rəhmət eləsin!
