22/06/2026
ADPU-nun nəzdində Azərbaycan Dövlət Pedaqoji Kollecinin (ADPK) tələbələri beynəlxalq inklüziv təhsil və sosial iş sahəsində mühüm uğura imza atıblar.
Cari tədris ili ərzində ADPK-nın İnklüziv təhsil, Məktəbəqədər təhsil, Ailə və ev təhsili şöbələrinin 10 nəfər tələbəsi “Humayun” Sosial Problemlərin Həllinə Kömək İctimai Birliyi ilə imzalanmış əməkdaşlıq memorandumu çərçivəsində “Humayun” İB-yi tərəfindən həyata keçirilən “Yurdum” Sosial Eko-Kənd layihəsinin xüsusi qayğıya ehtiyacı olan şəxslər üçün fəaliyyət göstərən mərkəzində könüllü olaraq təcrübə keçiblər. Təcrübə müddətində tələbələr xüsusi qayğıya ehtiyacı olan şəxslərlə işləmək, onların sosial adaptasiyası və gündəlik fəaliyyətlərinə dəstək göstərmək istiqamətində praktiki bilik və bacarıqlar əldə ediblər.
Könüllülük fəaliyyətində fərqlənən tələbələr arasından ADPK-nın İnklüziv təhsil ixtisasının III kurs tələbələri, bu il məzun olacaq Firuza Bayramova və Aida Hüseynova növbəti mühüm mərhələyə yüksələrək beynəlxalq təcrübə proqramına seçiliblər. Onlar “Humayun” Sosial Problemlərin Həllinə Kömək İctimai Birliyinin dəstəyi ilə keçirilən seçim mərhələsini və müsahibələri uğurla başa vuraraq ABŞ-da fəaliyyət göstərən Camphill Village USA təşkilatının beynəlxalq təcrübə proqramına qəbul olunublar.
Qeyd edək ki, bu, Azərbaycan kollecləri arasında tələbələrin Camphill Village USA-nın beynəlxalq təcrübə proqramına qəbul olunması üzrə ilk haldır.
Üç ay davam edəcək proqram çərçivəsində tələbələr ABŞ-ın Nyu-York ştatında yerləşən Camphill Village USA icmasında intellektual və inkişaf fərqlilikləri olan şəxslərlə birgə yaşayacaq və fəaliyyət göstərəcəklər. Təcrübə müddətində onlar daun sindromu, autizm spektr pozuntusu, serebral iflic və əqli inkişaf məhdudiyyətləri olan şəxslərin sosial və əmək bacarıqlarının inkişafına dəstək verəcək, eyni zamanda inklüziv icma, sosial iş və sosial pedaqogika sahələrində beynəlxalq təcrübə qazanacaqlar.
Tələbələrin ABŞ-a səfəri cari ilin iyun ayında baş tutacaq. Onlar artıq ABŞ vizalarını əldə ediblər və beynəlxalq proqramda iştirak üçün hazırlıq mərhələsini uğurla tamamlayıblar.
Qeyd edək ki, Camphill Village USA xüsusi qayğıya ehtiyacı olan şəxslərin cəmiyyətə inteqrasiyasını dəstəkləyən beynəlxalq sosial-pedaqoji icmalardan biridir. Təşkilatın fəaliyyəti kənd təsərrüfatı, sənətkarlıq, yaradıcılıq və gündəlik həyat fəaliyyətləri vasitəsilə iştirakçıların müstəqil həyat bacarıqlarının inkişaf etdirilməsinə və sosial inklüziyasına yönəlib. Proqramda iştirak edən könüllülər isə müxtəlif mədəniyyətlərarası mühitdə çalışaraq peşəkar və şəxsi inkişaf imkanları əldə edirlər.
