07/05/2026
Bakı Apellyasiya Məhkəməsində inzibati icraatla bağlı təlim keçirilib
Bakı Apellyasiya Məhkəməsində inzibati icraatın səmərəliliyinin və keyfiyyətinin artırılması məqsədilə Azərbaycan Respublikası Ali Məhkəməsinin təşəbbüsü əsasən Bakı şəhərinin yerli icra hakimiyyəti orqanlarının əməkdaşları üçün təlim təşkil olunub. Təlimin əsas məqsədi inzibati icraat sahəsində mövcud problemlərin sistemli şəkildə müzakirəsi, qanunvericiliyin düzgün tətbiqi üzrə vahid yanaşmanın formalaşdırılması və praktiki bacarıqların gücləndirilməsi olub.
Tədbirin açılışında Bakı Apellyasiya Məhkəməsinin İnzibati Kollegiyasının sədri vəzifəsini müvəqqəti icra edən Vidadi Qasımov çıxış edərək inzibati icraatın hüquqi dövlət quruculuğunda xüsusi rolunu vurğulayıb. O qeyd edib ki, inzibati orqanlarla vətəndaşlar arasında münasibətlərin qanunvericiliyin tələblərinə uyğun qurulması, qəbul edilən inzibati aktların əsaslandırılmış və şəffaf olması, habelə məhkəmə nəzarətinin effektiv həyata keçirilməsi hüquq və azadlıqların real təminatının əsas şərtlərindəndir.
Vidadi Qasımov çıxışında bildirib ki, son illər inzibati qanunvericiliyin təkmilləşdirilməsi istiqamətində mühüm addımlar atılsa da, praktiki tətbiq zamanı müəyyən çətinliklər hələ də qalmaqdadır. Bu baxımdan belə təlimlərin təşkili həm inzibati orqanların fəaliyyətinin təkmilləşdirilməsi, həm də məhkəmə təcrübəsinin vahid yanaşma əsasında formalaşdırılması baxımından mühüm əhəmiyyət kəsb edir.
Tədbirdə Bakı Apellyasiya Məhkəməsinin hakimləri — Aytən Oruczadə, Elvin Əliyev və Fərid Mədətli tərəfindən inzibati hüquq münasibətlərinin əsas prinsipləri, inzibati icraatın qanunvericiliyin tələblərinə uyğun həyata keçirilməsi və məhkəmə təcrübəsində rast gəlinən aktual məsələlər izah olunub. Müzakirələr çərçivəsində yaşayış sahəsinə ehtiyacı olan şəxs kimi mənzil uçotuna alınma və növbəliliyin dəyişdirilməsi, mənzil kirayə müqaviləsinin bağlanması, yaşayış sahəsinin təyinatının dəyişdirilməsi, torpaq sahələrinin yerləşmə cizgisinin verilməsi, inzibati aktların qəbulu, ləğvi və dəyişdirilməsi, kompensasiya ödənilməsi kimi mövzular üzrə real işlər əsasında izahlar verilib.
Təlimdə Bakı Şəhəri İcra Hakimiyyətinin və paytaxtın rayon icra hakimiyyətlərinin hüquq sahəsində çalışan məsul şəxsləri iştirak ediblər. İştirakçılar praktiki problemlər ətrafında fikir mübadiləsi apararaq, təcrübədə qarşılaşdıqları çətinlikləri hakimlərlə bölüşüblər.
Tədbirdə həmçinin “Sənədlər və müraciətlərlə iş” şöbəsinin müdiri Orxan Cəbrayılov çıxış edərək inzibati orqanlarla məhkəmələr arasında sənəd dövriyyəsinin təkmilləşdirilməsinin vacibliyini vurğulayıb. O bildirib ki, Elektron Məhkəmə İnformasiya Sistemi vasitəsilə qurulan elektron inteqrasiya mexanizmləri sənədlərin operativ, itkisiz və şəffaf şəkildə mübadiləsinə imkan yaradır. Qeyd olunub ki, inzibati orqanlar və məhkəmələr arasında elektron sənəd dövriyyəsinin genişləndirilməsi həm işlərin baxılma müddətinin əhəmiyyətli dərəcədə qısalmasına, həm də əlavə yazışma və kağız daşıyıcıya olan ehtiyacın azalmasına xidmət edir. Bu yanaşma dövlət orqanları arasında koordinasiyanı gücləndirməklə yanaşı, vətəndaşların müraciətlərinə daha çevik və effektiv baxılmasını təmin edir. Eyni zamanda, bu istiqamətdə elektron məhkəmə informasiya sistemində əlavə funksiyaların yaradılması zəruriliyi qeyd olunmuş, yerli icra hakimiyyəti orqanlarının nümayəndələri tərəfindən səsləndirilən təkliflər müzakirə edilərək praktiki baxımdan qiymətləndirilmişdir.
Qeyd olunub ki, bu cür təlimlər inzibati orqanların fəaliyyətinin daha səmərəli qurulmasına, vətəndaşların hüquq və azadlıqlarının daha effektiv təmininə və dövlət orqanlarına ictimai etimadın gücləndirilməsinə xidmət edir.
Sonda bildirilib ki, Bakı Apellyasiya Məhkəməsi inzibati orqanlarla əməkdaşlığa açıqdır və bu istiqamətdə gələcəkdə də oxşar təlimlərin təşkili davam etdiriləcək.
