YAP Xətai rayon təşkilatı

06/05/2026

04 may 2026-cı il tarixində Yeni Azərbaycan Partiyası Xətai rayon təşkilatı və Bakı şəhəri üzrə Təhsil İdarəsinin tabeliyində fəaliyyət göstərən “2 nömrəli Uşaq-Gənclər İnkişaf Mərkəzi” publik hüquqi şəxsin birgə təşkilatçılığı ilə “Şəhərsalma və Memarlıq İli” çərçivəsində Ümummilli Lider Heydər Əliyevin anadan olmasının 103-cü ildönümünə həsr olunmuş “Mən və mənim şəhərim” adlı rəsm müsabiqəsi keçirilmişdir.
Tədbir Azərbaycan Respublikasının Dövlət Himninin səsləndirilməsi ilə başlamış, daha sonra Ulu Öndər Heydər Əliyevin və Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilmişdir.
Ardınca müsabiqə iştirakçılarının çəkdikləri rəsm əsərlərindən ibarət sərgiyə baxış keçirilmiş, şagirdlərin yaradıcılıq qabiliyyətlərini əks etdirən işlər tədbir iştirakçıları tərəfindən böyük maraqla qarşılanmışdır. Tədbir bədii hissə ilə davam etmiş, gənclərin ifasında şerlər səsləndirilmiş, rəqs nömrələri təqdim olunmuşdur.
Tədbirdə çıxış edən Yeni Azərbaycan Partiyası Xətai rayon təşkilatının sədr müavini Vüqar Hüseynov qeyd etmişdir ki, Ümummilli Lider Heydər Əliyevin müəyyən etdiyi dövlətçilik kursu bu gün uğurla davam etdirilir və gənclərin hərtərəfli inkişafı dövlət siyasətinin əsas prioritet istiqamətlərindəndir. O vurğulamışdır ki, bu cür müsabiqələr gənclərdə vətənpərvərlik hisslərinin gücləndirilməsinə, onların yaradıcılıq potensialının üzə çıxarılmasına və milli-mənəvi dəyərlərə bağlılığının möhkəmlənməsinə mühüm töhfə verir.
Bakı Şəhəri üzrə Təhsil İdarəsinin Məktəbdənkənar fəaliyyətinin təşkili sektorunun baş məsləhətçisi Sevinc Əzimova çıxışında şagirdlərin asudə vaxtlarının səmərəli təşkili və istedadlarının inkişaf etdirilməsi baxımından bu kimi layihələrin əhəmiyyətini vurğulamışdır. Bildirilmişdir ki, rəsm və şeir müsabiqələri uşaqlarda yaradıcı düşüncəni inkişaf etdirməklə yanaşı, onların yaşadıqları şəhərə və vətənə bağlılığını daha da gücləndirir.
Xətai Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Turan Kərimzadə çıxışında ölkəmizdə həyata keçirilən uğurlu gənclər siyasətindən bəhs etmiş, belə tədbirlərin gənclərin sosial fəallığının artırılmasında mühüm rol oynadığını diqqətə çatdırmışdır.
“2 nömrəli Uşaq-Gənclər İnkişaf Mərkəzi” publik hüquqi şəxsin direktoru Əmina Musayeva isə çıxışında müsabiqənin təşkilində əməyi olan tərəfdaş qurumlara təşəkkürünü bildirmiş, iştirakçıların yüksək səviyyədə hazırlıq nümayiş etdirdiklərini vurğulamış və bu cür layihələrin davamlı olacağını qeyd etmişdir.
Sonra müsabiqə qaliblərinə diplomlar və hədiyyələr təqdim edilmişdir.

Qaliblər

Tam orta məktəblər üzrə

III yer:
• 6–9 yaş qrupu – 56 nömrəli tam orta məktəbin şagirdi Nigar Cəfərova
• 10–13 yaş qrupu – 265 nömrəli tam orta məktəbin şagirdi Nəzrin Abdullazadə
• 14–17 yaş qrupu – 27 nömrəli tam orta məktəbin şagirdi Sevda Hacıyeva

II yer:
• 6–9 yaş qrupu – 116 nömrəli tam orta məktəbin şagirdi İnci Qurban
• 10–13 yaş qrupu – 152 nömrəli tam orta məktəbin şagirdi Pəri Hacılı
• 14–17 yaş qrupu – 24 nömrəli tam orta məktəbin şagirdi Məryəm Əsgərova

I yer:
• 6–9 yaş qrupu – 59 nömrəli tam orta məktəbin şagirdi Banu Mirzəyeva
• 10–13 yaş qrupu – Humanitar fənlər təmayüllü məktəb-liseyin şagirdi Ömər Sadıq
• 14–17 yaş qrupu – 17 nömrəli tam orta məktəbin şagirdi Fidan Bədəlova

Uşaq-Gənclər İnkişaf Mərkəzləri üzrə

III yer:
• 6–9 yaş qrupu – Respublika Uşaq-Gənclər İnkişaf Mərkəzi – Elmir İbrahimov
• 10–13 yaş qrupu – 7 nömrəli Uşaq-Gənclər İnkişaf Mərkəzi – Yusif Mirişov
• 14–17 yaş qrupu – 8 nömrəli Uşaq-Gənclər İnkişaf Mərkəzi – Nuray Sadıqzadə
II yer:
• 6–9 yaş qrupu – Gənclərin Respublika Bədii Yaradıcılıq Evi – Dəniz Qazıyeva
• 10–13 yaş qrupu – 5 nömrəli Uşaq-Gənclər İnkişaf Mərkəzi – Ayan Rəhimli
• 14–17 yaş qrupu – 6 nömrəli Uşaq-Gənclər İnkişaf Mərkəzi – Mətanət İsmayılzadə
I yer:
• 6–9 yaş qrupu – 2 nömrəli Uşaq-Gənclər İnkişaf Mərkəzi – Davud Quliyev
• 10–13 yaş qrupu – 1 nömrəli Uşaq-Gənclər İnkişaf Mərkəzi – Nərmin Həsənzadə
• 14–17 yaş qrupu – 3 nömrəli Uşaq-Gənclər İnkişaf Mərkəzi – Məlahət Quliyeva

Bundan əlavə, müsabiqədə fəal iştirak edən bir sıra şagirdlər həvəsləndirici diplomlarla təltif olunmuşdur. Həvəsləndirici diplomlara layiq görülənlər sırasında Xətai rayonunun 152 nömrəli tam orta məktəbinin şagirdi Cəvahir Hacılı, 263 nömrəli tam orta məktəbin şagirdi Nihat Nəbiyev, 257 nömrəli tam orta məktəbin şagirdi Əsra Allahverdiyeva, 98 nömrəli tam orta məktəbin şagirdi Leyla Abbaszadə, Gənclərin Respublika Bədii Yaradıcılıq Evinin nümayəndəsi Nuray Həsənli və 3 nömrəli Uşaq-Gənclər İnkişaf Mərkəzinin təmsilçisi Dünyaxanım İsmayılova yer almışdır.
Sonda bütün qaliblər və qonaqlar xatirə şəkli çəkdirmiş, tədbir xoş ovqatla başa çatmışdır.

05/05/2026

Xətaidə Ümummilli Lider Heydər Əliyevin anadan olmasının 103-cü ildönümü münasibətilə “Tarixin, liderliyin və xilaskarlığın Heydər Əliyev zirvəsi” adlı tədbir keçirilib.
Tədbirdə YAP Xətai rayon təşkilatının sədri Ramil Mirzəyev, Xətai Rayon İcra Hakimiyyətinin başçısı Rafiq Quluyev, YAP İdarə Heyətinin üzvü, Milli Məclisin deputatı Mübariz Qurbanlı, Milli Məclisin İnsan hüquqları komitəsinin sədri, millət vəkili Zahid Oruc, millət vəkilləri Vüqar Rəhimzadə və Pərvanə xanım Vəliyeva, Yeni Azərbaycan Partiyası Mərkəzi Aparatının Təşkilat şöbəsinin müdir müavini Rafael Gülməmmədov, Azərbaycan Respublikası Elm və Təhsil Nazirliyinin akademik Y.H.Məmmədəliyev adına Neft–Kimya Prosesləri İnstitutunun baş direktoru, akademik Vaqif Abbasov, Xətai Rayonun hüquq-mühafizə orqanlarının rəhbərləri, Vətən Müharibəsi Qəhrəmanları Anar Mirzəyev, Zaur Hüseynov, Ağsaqqalar Şurasının sədri, şəhid atası Mürvət Əsgərov, şəhid ailələrinin üzvləri, qazilər, idarə-müəssisə rəhbərləri, rayon ictimaiyyətinin nümayəndələri və partiya fəalları iştirak ediblər.
Tədbir iştirakçıları əvvəlcə müasir müstəqil Azərbaycan dövlətinin qurucusu, xalqımızın Ümummilli Lideri Heydər Əliyevin xatirəsini ehtiramla yad edərək abidəsi önünə gül dəstələri qoyublar. “Baku Marriott Hotel Boulevard”-də davam edən tədbirdə Ulu Öndər Heydər Əliyevin və Vətənimizin azadlığı uğrunda canlarından keçmiş şəhidlərin əziz xatirəsi bir dəqiqəlik sükutla yad edilib, sonra Azərbaycan Respublikasının Dövlət Himni səsləndirilib.
Açılış nitqi ilə çıxış edən YAP Xətai rayon təşkilatının sədri Ramil Mirzəyev Ümummilli Lider Heydər Əliyevin Azərbaycan dövlətçiliyinin xilaskarı kimi tarixi rolundan geniş bəhs edib. O bildirib ki, Heydər Əliyev yalnız bir siyasi lider deyil, eyni zamanda müasir Azərbaycanın memarıdır. Onun uzaqgörən siyasəti nəticəsində ölkəmiz parçalanma və tənəzzül təhlükəsindən xilas olaraq sabit inkişaf yoluna qədəm qoymuşdur. Ramil Mirzəyev vurğulamışdır ki, bu gün Azərbaycan Heydər Əliyev ideyaları əsasında inkişaf edir və bu siyasi kurs İlham Əliyev tərəfindən uğurla davam etdirilir. O, həmçinin Heydər Əliyev məktəbinin dövlətçilik, milli birlik və vətənpərvərlik dəyərlərinin cəmiyyətimiz üçün əbədi yol xəritəsi olduğunu diqqətə çatdırmışdır.
Sonra Ümummilli lider Heydər Əliyevə həsr olunmuş filmə nümayiş etdirilib.
Daha sonra çıxış edən Xətai Rayon İcra Hakimiyyətinin başçısı Rafiq Quluyev öz nitqində Heydər Əliyevin Azərbaycan tarixində müstəsna rolunu qeyd edərək bildirmişdir ki, məhz onun qətiyyəti və siyasi iradəsi nəticəsində ölkəmiz müstəqilliyini möhkəmləndirmiş, beynəlxalq aləmdə layiqli mövqe qazanmışdır. O, Ümummilli Liderin dövlət idarəçiliyində yaratdığı sistemin bu gün də uğurla tətbiq olunduğunu vurğulamışdır.
Milli Məclisin deputatı Mübariz Qurbanlı çıxışında Ümummilli Liderin milli-mənəvi dəyərlərin qorunması və inkişaf etdirilməsi sahəsində həyata keçirdiyi siyasətin strateji əhəmiyyətindən geniş bəhs etmişdir. O vurğulamışdır ki, Heydər Əliyev Azərbaycançılıq ideologiyasını dövlət siyasətinin əsas xəttinə çevirərək xalqın milli kimliyinin möhkəmlənməsinə nail olmuşdur. Deputat qeyd etmişdir ki, dilimizin saflığının qorunması, dini-mənəvi dəyərlərin yaşadılması və milli irsin gələcək nəsillərə ötürülməsi istiqamətində atılan addımlar bu gün də aktuallığını qoruyur və cəmiyyətin inkişafında mühüm rol oynayır.
Milli Məclisin deputatı Vüqar Rəhimzadə çıxışında Heydər Əliyevin müəyyən etdiyi siyasi və iqtisadi inkişaf strategiyasının Azərbaycanın bugünkü gücünün əsasını təşkil etdiyini bildirmişdir. O qeyd etmişdir ki, Ümummilli Lider tərəfindən əsası qoyulan neft strategiyası, beynəlxalq layihələr və regional əməkdaşlıq təşəbbüsləri ölkəmizin dünya iqtisadiyyatına inteqrasiyasını sürətləndirmişdir. Deputat vurğulamışdır ki, bu gün Azərbaycan regionun lider dövlətlərindən biri kimi çıxış edir və bu uğurların təməlində məhz Heydər Əliyevin uzaqgörən siyasəti dayanır.
Milli Məclisin deputatı Zahid Oruc çıxışında Ümummilli Liderin dövlətçilik fəlsəfəsinin elmi və siyasi aspektlərini geniş şəkildə təhlil etmişdir. O qeyd etmişdir ki, Heydər Əliyev modeli yalnız bir idarəçilik forması deyil, eyni zamanda milli təhlükəsizlik konsepsiyasıdır. Deputat vurğulamışdır ki, güclü dövlətçilik ənənələrinin formalaşdırılması, siyasi sabitliyin təmin edilməsi və milli maraqların qorunması bu modelin əsas prinsipləridir. Onun sözlərinə görə, bu yanaşma Azərbaycanın müasir dövrdə qarşılaşdığı çağırışlara uğurla cavab verməsinə imkan yaradır.
Milli Məclisin deputatı Pərvanə Vəliyeva çıxışında sosial siyasətin humanist mahiyyətinə toxunaraq qeyd etmişdir ki, Heydər Əliyev hər zaman insan amilini dövlət siyasətinin mərkəzində saxlamışdır. O, xüsusilə qadınların hüquqlarının müdafiəsi, onların ictimai-siyasi həyatda fəal iştirakının təmin olunması istiqamətində görülən işləri diqqətə çatdırmışdır. Deputat əlavə etmişdir ki, bu gün Azərbaycanda qadınların müxtəlif sahələrdə uğurla təmsil olunması məhz bu siyasətin nəticəsidir.
YAP Mərkəzi Aparatının Təşkilat şöbəsinin müdir müavini Rafael Gülməmmədov çıxışında partiyanın yaranma tarixi və keçdiyi inkişaf yolundan geniş bəhs edərək bildirmişdir ki, Yeni Azərbaycan Partiyası Ümummilli Lider Heydər Əliyevin uzaqgörən siyasətinin və möhkəm dövlətçilik fəlsəfəsinin məntiqi nəticəsi olaraq formalaşmışdır. O vurğulamışdır ki, bu siyasi təşkilat yarandığı gündən etibarən ölkədə sabitliyin təmin olunmasına, dövlətçiliyin möhkəmləndirilməsinə və milli həmrəyliyin gücləndirilməsinə xidmət etmişdir. Rafael Gülməmmədov qeyd etmişdir ki, Heydər Əliyevin yaratdığı siyasi məktəb bu gün yalnız bir partiya çərçivəsində deyil, ümumilikdə Azərbaycan cəmiyyətinin siyasi mədəniyyətinin formalaşmasında mühüm rol oynayır. Onun sözlərinə görə, bu məktəb dövlətə sədaqət, milli maraqlara bağlılıq, xalqla birbaşa ünsiyyət və məsuliyyətli idarəçilik prinsipləri üzərində qurulmuşdur.
Vətən Müharibəsi Qəhrəmanı Zaur Hüseynov çıxışında qeyd etmişdir ki, Azərbaycan gənclərinin vətənpərvərlik ruhunda yetişməsi, dövlətə və torpağa bağlılıq hissinin gücləndirilməsi Ümummilli Lider Heydər Əliyevin ideyalarının ən mühüm istiqamətlərindən biridir. O bildirmişdir ki, bu ideyalar əsasında formalaşan gənc nəsil Vətən müharibəsində öz sözünü demiş, yüksək qəhrəmanlıq və fədakarlıq nümayiş etdirmişdir. Zaur Hüseynov vurğulamışdır ki, bu gün Azərbaycan gəncliyi milli ruhda, dövlətə sədaqət prinsipləri əsasında tərbiyə olunur və bu da ölkənin gələcək inkişafının əsas təminatıdır.
Xətai Ağsaqqallar Şurasının sədri, şəhid atası Mürvət Əsgərov çıxışında Heydər Əliyevin vətənə sədaqət və xalqına bağlılıq nümunəsi olduğunu vurğulamış, bu dəyərlərin gənc nəslə aşılanmasının vacibliyini bildirmişdir. O əlavə etmişdir ki, bu gün Yeni Azərbaycan Partiyası minlərlə üzvü birləşdirən geniş ictimai-siyasi qüvvəyə çevrilmişdir və ölkənin bütün regionlarında fəal şəkildə fəaliyyət göstərir. Partiyanın sıralarında gənclərin, ziyalıların, qadınların və müxtəlif peşə sahiblərinin təmsil olunması onun ictimai dayaqlarının nə qədər güclü olduğunu göstərir.
Tədbir çərçivəsində YAP üzvü olan bir qrup partiya fəalı Fəxri Fərmanla təltif olunmuş, həmçinin Yeni Azərbaycan Partiyasının sıralarına yeni qəbul edilmiş üzvlərə partiya vəsiqələri təqdim edilmişdir.
Bədii hissədə vətənpərvərlik ruhunu əks etdirən kompozisiyalar təqdim olunmuş, iştirakçılar tərəfindən böyük maraqla qarşılanmışdır.
Tədbirə Yeni Azərbaycan Partiyasının himni səsləndirilməsi ilə yekun vurulmuşdur.

https://yap.org.az/az/view/news/104868/tarixin-liderliyin-ve-xilaskarligin-heyder-eliyev-zirvesi

01/05/2026

1 may 2026-cı il tarixdə Xətai rayonunda Azərbaycan Respublikası Prezidentinin 07 noyabr 2025-ci il tarixli Sərəncamına əsasən təltif olunmuş hərbçilərin mükafatlarının təqdimetmə mərasimi keçirilib.

Tədbirdə rayon İcra Hakimiyyətinin başçısı Rafiq Quluyev, Yeni Azərbaycan Partiyası Xətai rayon təşkilatının sədri Ramil Mirzəyev, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Xətai rayon idarəsinin rəisi Nicat Həsənov, idarə rəisinin müavini Kamran Cəfərov, C.Naxçıvanski adına Hərbi Liseyin rəisi, Vətən Müharibəsi Qəhrəmanı Anar Mirzəyev, rayon Ağsaqqallar Şurasının sədri, şəhid atası Mürvət Əsgərov, eləcə də şəhid ailələri iştirak ediblər.
Çıxış edənlər Azərbaycan Ordusunun şanlı Qələbəsindən, Vətən müharibəsində və Aprel döyüşlərində göstərilən qəhrəmanlıqlardan söz açaraq, şəhidlərin xatirəsinin daim əziz tutulduğunu, onların ailələrinə dövlət tərəfindən xüsusi diqqət və qayğı göstərildiyini vurğulayıblar.
Daha sonra təltifetmə mərasimi keçirilib. Ehtiyatda olan polkovnik-leytenant Ələkbərov Rasim Vahidoviçə 3-cü dərəcəli “Vətənə xidmətə görə” ordeni təqdim olunub. Həmçinin Aprel döyüşlərində qəhrəmancasına şəhid olmuş Niftalı Rəşad Şakir oğlu və Əzizzadə Xaliq Həsən oğlunun “Vətən uğrunda” medalları onların ailə üzvlərinə təqdim edilib.
Şəhid ailələrinin üzvləri çıxış edərək göstərilən yüksək diqqət və qayğıya görə Azərbaycan Respublikasının Prezidentinə dərin minnətdarlıqlarını bildiriblər. Onlar qeyd ediblər ki, şəhidlərin xatirəsinin belə ehtiramla yad olunması onların ailələri üçün böyük mənəvi təsəllidir.
Tədbirin sonunda şəhidlərin əziz xatirəsi dərin ehtiramla yad olunub, onların Vətən uğrunda göstərdikləri şücaətin heç zaman unudulmayacağı bildirilib.

01/05/2026

https://ikisahil.az/post/641187-komanda-birinciliyi-olkemizin-idman-tarixinde-muhum-ugurdur

https://yap.org.az/az/view/news/104728/idman-tarixinde-muhum-ugur

Xəbərlər İdman tarixində mühüm uğur 01 May 2026    13:27 Ramil Mirzəyev YAP Xətai rayon təşkilatının sədri Prezident İlham Əliyev tərəfindən Avropa çempionatında komanda hesabında çempion olan güləşçilərin qəbul edilməsi ölkəmizin idman siyasətində idmana veril....

01/05/2026

Turizm və Sosial Xidmətlər üzrə Bakı Dövlət Peşə Təhsil Mərkəzində rayon İcra Hakimiyyəti və Xətai bələdiyyəsinin təşkilatçılığı ilə “Gender bərabərliyi dövlət siyasətinin prioritet istiqamətlərindən biridir” mövzusunda maarifləndirici tədbir keçirilib.
Tədbirdə rayon İcra Hakimiyyəti, YAP Xətai rayon təşkilatı, hüquq-mühafizə orqanları və Xətai bələdiyyəsində yaradılmış "Gender Bərabərliyi Komissiyası"nın nümayəndələri iştirak ediblər.
Çıxışlar zamanı Azərbaycan Respublikası Prezidentinin 2025-ci il 29 dekabr tarixli Sərəncamı ilə təsdiq edilmiş “Azərbaycan Respublikasında gender (kişi və qadınların) bərabərliyi üzrə 2026–2028-ci illər üçün Milli Fəaliyyət Planı”nın müvafiq bəndlərinin icrası ilə bağlı görülmüş işlərdən geniş bəhs edilib.
Qeyd edilib ki, Azərbaycan Respublikası müstəqillik qazandıqdan qısa müddət sonra ölkədə gender bərabərliyinin təmin olunması istiqamətində əsaslı addımlar atılmış, normativ hüquqi baza formalaşdırılmış və institusional mexanizmlər yaradılmışdır. Gender amilinin ümumi siyasətə daxil edilməsi üzrə səylər qadınların kişilərlə bərabər ictimai həyatın bütün sahələrində təmsil olunmalarına imkan vermişdir. Ölkədə son illərdə həyata keçirilən sosial-iqtisadi islahatlar, əhalinin məşğulluğunun artırılması, sahibkarlığın inkişafı qadınların iqtisadi imkanlarının genişlənməsinə təkan vermiş və onlar arasında işsizlik səviyyəsinin azaldılmasına səbəb olmuşdur.
Ölkə Prezidenti cənab İlham Əliyevin rəhbərliyi ilə insan hüquqlarının müdafiəsi sahəsində aparılan islahatların davamı olaraq 2010-cu ildə “Məişət zorakılığının qarşısının alınması haqqında” Azərbaycan Respublikasının Qanunun qəbul edilməsi isə qadın hüquqlarının qorunması, xüsusi ilə də məişət zorakılığının qarşısının alınması sahəsində güclü qanunvericilik bazası yaratmışdır.

22/04/2026

2026-cı il aprelin 15-də Yeni Azərbaycan Partiyası Xətai rayon təşkilatı və Xətai Rayon İcra Hakimiyyətinin birgə təşkilatçılığı ilə akademik Zərifə xanım Əliyevanın anım gününə həsr olunmuş tədbir keçirilmişdir.
Tədbir iştirakçıları əvvəlcə müasir müstəqil Azərbaycan dövlətinin qurucusu, ümummilli lider Heydər Əliyevin, akademik Zərifə xanım Əliyevanın və Vətənimizin ərazi bütövlüyü uğrunda canlarından keçmiş şəhidlərin əziz xatirəsini bir dəqiqəlik sükutla yad etmişlər. Ardınca Azərbaycan Respublikasının Dövlət Himni səsləndirilmişdir.
Tədbiri giriş sözü ilə açan YAP Xətai rayon təşkilatının sədri Ramil Mirzəyev akademik Zərifə xanım Əliyevanın keçdiyi zəngin həyat yolundan ətraflı bəhs etmiş, Azərbaycan tibb elminin inkişafına verdiyi töhvədən danışmışdır. Ramil Mirzəyev Zərifə xanım Əliyevanı görkəmli oftalmoloq-alim olmaqla yanaşı, həm də yüksək mənəvi keyfiyyətləri ilə seçilən ziyalı şəxsiyyət kimi xarakterizə etmiş, onun elmi və mənəvi irsinin gələcək nəsillərə ötürülməsinin vacibliyini diqqətə çatdırmışdır.
Xətai Rayon İcra Hakimiyyətinin başçısı Rafiq Quluyev çıxışında Zərifə xanım Əliyevanın insanlara göstərdiyi diqqət və qayğını hər bir Azərbaycan vətəndaşı üçün nümunə kimi səciyyələndirmiş, oftalmologiya sahəsində apardığı elmi tədqiqatların bu gün də öz aktuallığını qoruyub saxladığını və yeni nəsil həkimlər üçün bir məktəb kimi xüsusi önəm daşıdığını vurğulamışdır.
Akademik Zərifə xanım Əliyeva Azərbaycan qadınının simvoludur, onun keçdiyi həyat yolu və elmi fəaliyyəti gənclər üçün böyük motivasiya mənbəyidir – deyən millət vəkili Pərvanə Vəliyeva bildirmişdir ki, görkəmli alimlərin irsinin tədqiq olunması və yaşadılması istiqamətində həyata keçirilən tədbirlər milli-mənəvi dəyərlərin qorunmasına xidmət edir.
Respublika Neyrocərrahiyyə Xəstəxanasının baş həkimi Elçin İbrahimov çıxışında akademik Zərifə Əliyevanın tibb elminə gətirdiyi yeniliklərdən danışmış, onun elmi araşdırmaların, xüsusilə peşə patologiyaları sahəsində apardığı işlərin beynəlxalq səviyyədə də yüksək qiymətləndirildiyini bildirmişdir.
Diaqnoz Tibb Mərkəzinin baş həkimi Ələddin Cabbarov çıxış edərək akademik Zərifə Əliyevanın insanpərvərliyindən və həkim etikası sahəsində göstərdiyi nümunəvi fəaliyyətindən bəhs etmişdir. O bildirmişdir ki, Zərifə xanım hər zaman xəstələrə xüsusi həssaslıqla yanaşmış, onların sağlamlığını öz həyatının əsas məqsədlərindən biri hesab etmişdir.
Tibb elmləri doktoru, əməkdar həkim Kənan Yusifzadə çıxışında akademik Zərifə xanım Əliyevanın elmi yanaşmalarının müasir tibbin bir çox istiqamətlərində tətbiq olunduğunu qeyd etmiş və bildirmişdir ki, Zərifə xanımın yetirmələri bu gün də onun elmi ənənələrini davam etdirərək Azərbaycan tibb elmini daha da inkişaf etdirirlər.
M.Ə.Əfəndiyev adına Xətai Tibb Mərkəzinin keyfiyyət üzrə komitə rəhbəri Səlmin Quliyeva çıxışında akademik Zərifə Əliyevanın həyat fəlsəfəsindən və yüksək insani keyfiyyətlərdən bəhs etmiş, onun məsuliyyət, zəhmətkeşlik və insanlara sevgi kimi xüsusiyyətləri nin hər bir tibb işçisi üçün örnək olduğunu qeyd etmişdir.
Tədbir görkəmli oftalmoloq-alim, akademik Zərifə xanım Əliyevanın həyat və elmi fəaliyyətini əks etdirən filmin nümayişi ilə yekunlaşmışdır.

03/04/2026

Xətai rayonunda Aprel şəhidlərin xatirəsinə ehsan süfrəsi təşkil edilib
Tədbirdə əvvəlcə torpaqlarımızın azadlığı uğrunda canından keçən şəhidlərimizin əziz xatirəsi yad edilib.
Tədbir iştirakçıları 2016-cı il Aprel döyüşlərinin ildönümü ilə əlaqədar qəhrəman şəhidlərimizin xatirəsini 1 dəqiqəlik sükutla yad ediblər. İcra başçısı Rafiq Quluyev qeyd edib ki, Azərbaycan Ordusunun şanlı tarixində mühüm yer tutan Aprel döyüşlərindən 10 il ötür. Bildirilib ki, həmin döyüşlər zamanı Azərbaycan Ordusu Ermənistan silahlı qüvvələrinin təxribatlarına cavab olaraq uğurlu əks-hücum əməliyyatı həyata keçirərək Füzuli, Cəbrayıl və Ağdərə istiqamətlərində strateji əhəmiyyətli yüksəklikləri və 2000 hektardan çox ərazini işğaldan azad edib.
Vurğulanıb ki, dördgünlük Aprel döyüşləri Azərbaycan Ordusunun gücünü, xalqımızın yenilməz ruhunu nümayiş etdirərək gələcək böyük Qələbələrin əsasını qoyub. Qeyd olunub ki, xalqımız həm Aprel döyüşlərində, həm 44 günlük Vətən müharibəsində, həm də 2023-cü ilin sentyabrında həyata keçirilən lokal antiterror tədbirlərində dövlətimizin və Ali Baş Komandanın ətrafında sıx birləşərək tarixi nailiyyətlərə imza atıb.
Bu gün işğaldan azad olunmuş bütün ərazilərimizdə Azərbaycan bayrağı qürurla dalğalanır və bu, əldə olunan Qələbənin rəmzidir.
Digər çıxış edənlər də qeyd ediblər ki, xalqımız şəhidlərimizin, qazilərimizin və müharibə iştirakçılarının göstərdiyi şücaəti daim yüksək qiymətləndirir, onların xatirəsini uca tutur.
Sonda rayon İcra Hakimiyyətinin başçısı Rafiq Quluyev şəhid ailələri ilə görüşərək onların qayğıları ilə maraqlanıb.
Şəhid ailələri göstərilən diqqət və qayğıya görə Azərbaycan Respublikasının Prezidenti, Müzəffər Ali Baş Komandan İlham Əliyev və Birinci vitse-prezident Mehriban Əliyevaya minnətdarlıqlarını bildiriblər.

19/03/2026

Xətaidə Novruz Aksiyası

19/03/2026

Yeni Azərbaycan Partiyası Xətai rayon təşkilatı və Xətai Rayon İcra Hakimiyyəti tərəfindən birgə təşkil edilən sosial aksiya çərçivəsində rayon ərazisində yaşayan şəhid və qazi ailələri Novruz bayramı münasibəti ilə təbrik edilib və onlara bayram sovqatları təqdim olunub

Xətai rayonu ərazisində yaşayan şəhid ailələri, qazilər, müharibə əlilləri, veteranlar, kimsəsiz və aztəminatlı ailələr daim diqqət və qayğı ilə əhatə olunub. Bayramın mənəvi dəyərlərinə uyğun olaraq, cəmiyyətin həssas təbəqələrinə xüsusi diqqət göstərilməsi bu günlərdə daha da aktuallaşıb.
Aksiya zamanı təşkilat nümayəndələri ailələri ziyarət edərək onların qayğıları ilə maraqlanıb, səmimi söhbətlər aparıb, YAP Xətai rayon təşkilatı və Xətai Rayon İcra Hakimiyyəti adından bayram təbriklərini çatdırıblar. Bildirilib ki, dövlət tərəfindən şəhid ailələrinə və müharibə iştirakçılarına göstərilən diqqət və qayğı daim yüksək səviyyədədir və bu istiqamətdə həyata keçirilən tədbirlər mütəmadi xarakter daşıyır.
Qeyd olunub ki, belə təşəbbüslər yalnız maddi dəstək deyil, eyni zamanda mənəvi dayaq olaraq da böyük əhəmiyyət kəsb edir. Bayram günlərində həyata keçirilən bu kimi sosial aksiyalar cəmiyyətdə həmrəylik, birlik və humanizm dəyərlərinin daha da möhkəmlənməsinə xidmət edir.
Göstərilən diqqət və qayğıya görə şəhid ailələrinin üzvləri, qazilər, veteranlar ölkə rəhbərliyinə öz minnətdarlıqlarını ifadə ediblər.

17/03/2026

16.03.2026-cı il tarixdə Xətai rayon İcra Hakimiyyətinin təşkilatçılığı ilə müqəddəs Ramazan ayı münasibətilə “Mala Praga” restoranında iftar süfrəsi təşkil olunub.
Tədbirdə Xətai rayon İcra Hakimiyyətinin başçısı Rafiq Quluyev,YAP Xətai rayon təşkilatının sədri Ramil Mirzəyev, millət vəkilləri Qüdrət Həsənquliyev, Mixail Zabelin, Vüqar Rəhimzadə, Zahid Oruc, Pərvanə Vəliyeva, rayonun hüquq-mühafizə orqanlarının rəhbərləri, şəhid ailələri, qazilər, rayon ictimaiyyətinin nümayəndələri iştirak ediblər.
Tədbirdə çıxış edənlər müqəddəs Ramazan ayının mənəvi dəyərlərindən, cəmiyyətdə həmrəylik, mərhəmət və xeyirxahlıq kimi ali keyfiyyətlərin təbliğində bu ayın xüsusi əhəmiyyətindən bəhs ediblər. Bildirilib ki, Ramazan ayı insanları birliyə, qarşılıqlı hörmətə və yardımlaşmaya çağıran müqəddəs bir dövrdür.
Eyni zamanda, dövlətimizin şəhid ailələrinə və qazilərə göstərdiyi diqqət və qayğıdan söz açılıb, onların cəmiyyətimizdə xüsusi ehtiramla qarşılandığı vurğulanıb.
İftar süfrəsində müqəddəs Ramazan ayının ölkəmizə və xalqımıza sülh, əmin-amanlıq və firavanlıq gətirməsi üçün dualar edilib.

13/03/2026

2026-cı il mart ayının 12-də Yeni Azərbaycan Partiyası Xətai rayon təşkilatı, Xətai Rayon İcra Hakimiyyəti və 2 nömrəli Uşaq-Gənclər İnkişaf Mərkəzinin birgə təşkilatçılığı ilə Novruz bayramına həsr olunmuş tədbir keçirilib.
Tədbirdə Xətai Rayon İcra Hakimiyyətinin sektor müdiri Pənah İmanov, Yeni Azərbaycan Partiyası Xətai rayon təşkilatının əməkdaşları Ülvü Abbasov, Ənvər Bayramov, Fidan Əliyeva, Bakı şəhəri üzrə Təhsil İdarəsinin “Məktəbdənkənar fəaliyyətin təşkili” sektorunun əməkdaşları Şəhanə Bağırova və Gülşən Əzimova, Azərbaycan Təhsil İşçiləri Azad Həmkarlar İttifaqının Bakı şəhəri Xətai Rayon Komitəsinin sədri Sehran Səfərov, həmçinin mərkəzin müəllim və şagird kollektivi iştirak ediblər.
Çıxış edənlər Novruz bayramının xalqımızın milli-mənəvi dəyərlərinin, adət-ənənələrinin yaşadılmasında xüsusi əhəmiyyətə malik olduğunu vurğulayıblar. Bildirilib ki, bu cür tədbirlər gənc nəslin milli irsə bağlılığının möhkəmlənməsində mühüm rol oynayır. Qonaqlar məktəbdənkənar təhsilin və gənclərlə aparılan maarifləndirici tədbirlərin əhəmiyyətindən bəhs edərək, belə layihələrin davamlı keçirilməsinin vacibliyini qeyd ediblər.
Tədbir çərçivəsində şagirdlərin hazırladıqları bayram proqramı, müxtəlif çıxışlar və təqdimatlar nümayiş olunub. Bayram ab-havasında keçən tədbirdə iştirakçılar Novruzun ənənələrini əks etdirən səhnəciklər, şeirlər və musiqi nömrələri ilə çıxış ediblər.
Sonda tədbirdə fəal iştirak edən şagirdlər və müəllimlər diplomlarla təltif olunublar.