Këshilli Kombëtar i Integrimit Europian, Tirana (2026)

25/05/2026

Këshilli Kombëtar i Integrimit Europian (KKIE) organizoi një takim ndërgjegjësues mbi rolin e Kuvendit të Shqipërisë në procesin e negociatave në Bashkimin Europian, në të cilën morën pjesë përfaqësues nga Shoqata Evropiane e Studentëve të Ligjit (ELSA).

Qëllimi i takimit ishte njohja me rolin e Kuvendit dhe të KKIE-së në forcimin e funksionit mbikëqyrës dhe monitorues në kuadër të procesit të negociatave me Bashkimin Europian.

Takimi u përshëndet nga z. Taulant Balla, Bashkëkryetar i KKIE-së, i cili parashtroi se vendi ndodhet në një moment historik të procesit të integrimit europian, në prag të zhvillimit të Konferencës së 8-të Ndërqeveritare Shqipëri–BE, që pritet të shënojë hyrjen në fazën përmbyllëse të negociatave për anëtarësim në BE.

Z.Balla i njohu të rinjtë me ecurinë e deritanishme të negociatave, rolin e Kuvendit në avancimin e reformave, forcimin e monitorimit parlamentar, forcimin e standardeve demokratike dhe të shtetit të së drejtës, punën e Kuvendit për miratimin e projektligjeve për përafrimin e legjislacionit shqiptar me atë të BE-së, por dhe në diplomacinë parlamentare.

Z. Balla ndau me të pranishmit sfidat që shoqërojnë procesin, të cilin e cilësoi njëkohësisht sa teknik aq dhe politik, si dhe theksoi se procesi i negociatave është një projekt transformimi i thellë i shoqërisë shqiptare dhe se përfituesit përfundimtarë të reformave integruese do të jenë qytetarët.
Duke u ndalur në procesin legjislativ, z.Balla informoi mbi projektligjet dhe disa prej reformave të miratuara në kuadër të procesit të përafrimit të legjislacionit me BE, si: ndryshimet në Kodin Penal, ligji për barazinë gjinore, ndryshimet në ligjin për mbrojtjen nga diskriminimi, ligje që lidhen me reformën në sistemin e drejtësisë, ligji për mbrojtjen e sinjalizuesve, ndryshimet në ligjin për mediat audio-vizive, etj.

Duke e konsideruar të rëndësishëm momentin z.Balla theksoi rëndësinë e ruajtjes së ritmit e avancimit të procesit të negociatave me Bashkimin Europian.

Takimi vijoi me një sesion pyetjesh dhe diskutimesh mbi rolin e deritanishëm të Kuvendit në procesin e negociatave, ecurinë e përmbushjes së detyrimeve për grupkapituj të caktuar, ndryshimet në Rregulloren e Kuvendit, etj.

08/05/2026

Këshilli Kombëtar i Integrimit Europian (KKIE) zhvilloi sot takimin e radhës, në të cilin u diskutuan tema: “Shqipëria - në fazën e fundit të Rrugës Europiane”, si dhe Raporti Vjetor i KKIE për vitin 2025 e plani i aktiviteteve për vitin 2026.

Takimi u përshëndet nga Bashkëkryetari i KKIE-së, z.Taulant Balla, Ministrja e Shtetit dhe Kryenegociatorja znj. Majlinda Dhuka, Ministri Drejtësisë, z.Toni Gogu, të cilët në fjalën e tyre vlerësuan progresin e arritur në procesin e negociatave me BE-në, duke nënvizuar se hapja e të gjithë grupkapitujve brenda një periudhe të shkurtër kohore përfaqëson një arritje historike për vendin.

Bashkëkryetari i KKIE-së, z.Taulant Balla parashtroi se takimi zhvillohet në kuadër të Ditës së Europës dhe përkon me një moment ku vendi ndodhet në fazën përfundimtare të rrugëtimit për anëtarësimin në BE. Z.Balla theksoi se mbështetja e gjerë e qytetarëve shqiptarë për integrimin europian është një dëshmi e qartë e orientimit strategjik të Shqipërisë dhe e konsensusit kombëtar për të ardhmen europiane të vendit. Duke u ndalur në vendimmarrjen e Komisionit për Punët e Jashtme të Parlamentit Europian për raportin e Shqipërisë për vitin 2025, theksoi se ishte një sinjal të fortë mbështetjeje nga institucionet europiane për progresin e reformave dhe ritmin e negociatave. Z.Balla theksoi se reforma në drejtësi, lufta kundër korrupsionit dhe krimit të organizuar, si dhe forcimi i institucioneve demokratike kanë rritur besueshmërinë e Shqipërisë në sytë e partnerëve europianë. Në përfundim z.Balla nënvizoi se objektivi për mbylljen e negociatave të anëtarësimit deri në fund të vitit 2027 duhet të mbetet një angazhim i përbashkët politik dhe institucional.

Ministrja e Shtetit dhe Kryenegociatorja, znj.Majlinda Dhuka, vlerësoi progresin e arritur nga institucionet shqiptare, Kuvendi, qeveria dhe institucionet e drejtësisë, përfshirë SPAK, GJKKO, Prokurorinë e Përgjithshme, gjykatat dhe këshillat e sistemit të drejtësisë, për forcimin e shtetit të së drejtës dhe avancimin e reformave. Kryenegociatorja nënvizoi se vendi po hyn në një fazë intensive të përgatitjeve teknike për mbylljen e kapitujve të parë të negociatave për anëtarësim në BE dhe informoi se deri më tani janë përmbushur 24 piketa të ndërmjetme përmes 92 nismave të rëndësishme, me mbështetjen e vazhdueshme të Komisionit Europian, i cili tashmë ka dhënë rekomandime pozitive për progresin e bërë. Dhuka vlerësoi edhe rolin e Kuvendit në miratimin e ligjeve që lidhen me reformën në drejtësi, forcimin e institucioneve të drejtësisë dhe luftën kundër korrupsionit, mbrojtjen nga diskriminimi, luftën kundër dhunës ndaj grave dhe dhunës në familje, por dhe nismat për mbrojtjen e gazetarëve dhe forcimin e lirisë së shprehjes përmes ndryshimeve në ligjin për median audiovizive dhe Kodin Penal, etj.

Z.Toni Gogu, Ministri i Drejtësisë parashtroi se reforma në drejtësi po hyn në fazën e konsolidimit të standardeve europiane, si dhe informoi se gjatë periudhës 2025 – shkurt 2026 janë përmbushur 14 pika të ndërmjetme të negociatave, në bashkëpunim me Komisionin Europian dhe 72 institucione shqiptare. Ministri i Drejtësisë u ndal tek rezultatet konkrete për qytetarët, si ulja e stokut të çështjeve gjyqësore, reduktimi me 60% i backlog-ut në Gjykatën e Lartë krahasuar me vitin 2020, zgjerimi i ndihmës juridike falas dhe digjitalizimi i sistemit gjyqësor përmes platformës JURONIX, si dhe informoi se po punohet për harmonizimin e mëtejshëm të Kodit Penal, Kodit të Procedurës Penale dhe legjislacionit për të drejtat themelore me “acquis” të BE.

Më pas takimi vijoi me diskutime ku znj.Milva Ekonomi, Kryetare e Komisionit për Ekonominë, Punësimin dhe Financat, z.Damian Gjiknuri, Nënkryetar i Komisionit për Çështjet Ligjore dhe Administratën Publike dhe njëkohësisht bashkëkryetar i Komisionit të Posaçëm Parlamentar për Realizimin e Reformës Zgjedhore, znj. Anila Denaj, Kryetare e Komisionit për Burimet Natyrore, Infrastrukturën dhe Zhvillimin e Qëndrueshëm, znj.Olta Xhaçka, Zëvendëskryetare e Komisionit për Çështjet e Brendshme dhe të Mbrojtjes, znj.Lefterije Lleshi (Luzi), Komisionere për Mbikëqyrjen e Shërbimit Civil, z.Endrit Shabani, Avokati i Popullit dhe z.Gledis Gjipali, Drejtor Ekzekutiv, Lëvizja Europiane në Shqipëri ndanë pikëpamje dhe diskutuan mbi ecurinë e procesit dhe arritjet e shënuara deri më tani.

Znj.Ekonomi u ndal tek nismat që po ndërmerren për përmbushjen e detyrimeve në kuadër të integrimit ekonomik, që lidhen me rritjen e konkurrueshmërisë, formalizimin e ekonomisë, përmirësimit të klimës së binzesit, forcimin e mbikëqyrjes financiare, krijimin e një tregu më transparent, si dhe duke sjellë si model pozitiv rastin e ligjit të ri për PPP, nënvizoi rëndësinë e angazhimit të shoqërisë civile dhe ekspertëve të fushës në konsultimin dhe diskutimin e legjislacionit që do të përshtatet me standardet europiane.

Z.Gjiknuri bëri një përmbledhje të disa prej ligjeve të miratuara në kuadër të përmbushjes së detyrimeve të procesit të negociatave, si ato që lidhen me vazhdimësinë e procesit të vetingut, duke u ndalur dhe në rëndësinë e punës së bërë në kuadër të mbikëqyrjes së zbatimit të reformës në drejtësi, koordinimin ndërinstitucional dhe institucionet e pavarura, si dhe u ndal tek disa piketa ku do të tregohet vëmëndje lidhur me monitorimin e akteve nënligjore në fushën e antikorrupsionit, konfliktit të interest, mbrojtjes së sinjalizuesve, nëse janë në linjë me standardet e kërkuara në Raportin e KE për vitin 2025, etj. Z. Gjiknuri u ndal edhe tek puna e komisionit të posaçëm lidhur me zbatimin e rekomandimeve të OSBE-ODHIR dhe raportin e KE për projektligjin për financimin e partive politike dhe fushatës zgjedhore, por dhe aspektet që kanë të bëjnë më barazinë e garës dhe aksesit në fushatë të barabartë, shmangien e keqpërdorimit të burimeve shtetërore, duke nënvizuar rëndësinë që ka pasur gjithëpërfshirja edhe konsesusi politik.

Znj.Denaj informoi mbi ndryshimet që ka pësuar legjislacioni në kuadër të përmbushjes së rekomandimeve për grupkapitullin 4 dhe kapitullin 27, duke përmëndur ndryshimet në fushën e mjedisit, aviacionit civil, transportit, efikasitetin e energjisë, diversifikimin e energjisë, si dhe u ndal në vlerësimet e bëra përgjatë dëgjesave të zhvilluara me Sekretariatin e Komuniteti i Energjisë për dekarbonizimin dhe modernizimin e energjisë në vend, etj.

Znj.Xhaçka vlerësoi arritjet e Shqipërisë në fushën e sigurisë dhe stabilitetit në Rajon dhe theksoi se vendi ndodhet në një fazë historike të integrimit europian, ku procesi i anëtarësimit në BE po shndërrohet nga aspiratë në realitet konkret përmes hapjes së grupkapitujve negociues dhe reformave intensive ligjore. Znj.Xhaçka vlerësoi se Shqipëria paraqitet si një partner i besueshëm euroatlantik, plotësisht i harmonizuar me politikat e BE-së dhe NATO-s, ndërsa kërkohet që Bashkimi Europian ta trajtojë zgjerimin e rajonit me më shumë vizion, vendosmëri dhe urgjencë historike.

Znj. Lefterije Lleshi (Luzi), theksoi rëndësinë e një administrate publike profesionale, të paanshme dhe të bazuar në meritë, si një nga kushtet kryesore për avancimin e Shqipërisë në procesin e integrimit europian. Në fjalën e saj ajo evidentoi nevojën për forcimin e standardeve të ligjshmërisë, meritokracisë dhe profesionalizmit në administratën publike shqiptare, si dhe u theksua nevoja për ngritje të kapaciteteve, ndryshime ligjore si dhe sfida në zbatimin e vendimeve.

Z.Shabani, theksoi se matësi real i integrimit europian të Shqipërisë është zbatimi praktik të ligjit dhe mënyra se si qytetarët përjetojnë shërbimet e shtetit. Duke u ndalur në disa problematika të hasura dhe disa raste konkrete nga praktika e institucionit që drejton, z.Shabani paraqiti tre propozime konkrete për fazën para vlerësimit të IBAR-it, duke kërkuar rritje të financimeve për sistemin penitenciar, përfshirje më të madhe të institucioneve të pavarura në procesin e negociatave dhe vendosjen e detyrimit ligjor për zbatimin e rekomandimeve të institucioneve të pavarura.

Z.Gjipali theksoi rëndësinë e përfshirjes më thelbësore, jo vetëm formale të shoqërisë civile në proces, sidomos në diskutimin e piketave negociuese. Z.Gjipali theksoi rëndësinë e gjithëpërfshirjes dhe transparencës së këtyre diskutimeve, tashmë që piketat nuk janë më në fazën e hartimit dhe kërkojnë një njohje të madhe, nga ata që do të preken nga procesi i integrimit.

Në diskutim u përfshinë edhe anëtarë të tjerë të KKIE: znj.Anisa Subashi, z.Altin Haziaj. znj.Iris Luarasi, znj.Blerjana Bino, z.Florian Xhafa.

Në përfundim të mbledhjes këshilli miratoi Raportin Vjetor të KKIE për vitin 2025 dhe Planin e aktiviteteve për vitin 2026, të cilat do ti përcillen për diskutim, seancës plenare.

Aktiviteti u transmetua live në faqen web dhe “Facebook” të Kuvendit.

17/04/2026

Sekretariati Teknik i Këshillit Kombëtar të Integrimit Europian (KKIE) organizoi sot një takim ndërgjegjësues me temë “Ecuria e procesit të negociatave me BE dhe roli i KKIE dhe Kuvendit në këtë proces”, me pjesëmarrjen e studentëve nga shoqata studentore “Bourgogne Balkans Express”, nga Universiteti Science Po, Kampusi i Dijon.

Znj. Elda Zenelaj, Drejtoreshë e Sekretariatit Teknik të KKIE, pasi i uroi mirëseardhjen të pranishmëve, i informoi mbi rëndësinë dhe situatën aktuale të procesit të negociatave të Shqipërisë me Bashkimin Europian, rolin e Kuvendit dhe KKIE në këtë proces, bashkëpunimin me OSHC dhe grupet e tjera të interesit etj.

Takimi u përshëndet nga z.Genci Gjonçaj, Sekretar i Përgjithshëm i Kuvendit, i cili në fjalën e tij, theksoi se anëtarësimi në BE për Shqipërinë është jo vetëm kulminimi i një procesi të gjatë, por edhe transformimi strategjik dhe konsolidimi institucional për vendin. Ai i informoi mbi rolin e Kuvendit për të facilituar procesin legjislativ dhe përafrimin e legjislacionit kombëtar me atë të BE. Z. Gjonçaj gjithashtu theksoi që procesi i zgjerimit mbetet, nga këndvështrimi i BE-së, mjeti më i fuqishëm gjeostrategjik për të siguruar stabilitet dhe qëndrueshmëri në Europën Juglindore.

Znj. Zenelaj i njohu me tej, studentët me rëndësinë e përmbushjes së detyrimeve dhe ndjekjen e rekomandimeve të lëna në progres raportet e KE; punën e bërë nga Sekretariati i KKIE për përfshirjen e sa më shumë target grupeve në proces dhe diskutimin e çështjeve të procesit të integrimit në të gjitha fushat.

Takimi vijoi me diskutime mbi sfidat e procesit të negociatave, vështirësitë që mund të hasen gjatë negociatave, zgjerimin e BE, etj.

12/02/2026

Këshilli Kombëtar i Integrimit Europian (KKIE) organizoi, në bashkëpunim me Akademia e Integrimit Europian dhe Negociatave - AIEN, një takim ndërgjegjësues mbi rolin e Kuvendit të Shqipërisë në procesin e negociatave në Bashkimin Europian. Në këtë aktivitet morën pjesë rreth 45 përfaqësues nga OSHC, bota akademike, institucione të ndryshme të pushtetit qendror dhe lokal etj, të cilët janë studentë të Akademisë së Negociatave.
Diskutimi u përqendrua në rolin e Kuvendit dhe të KKIE-së, jo vetëm në forcimin e funksionit mbikëqyrës dhe kontrollues ndaj qeverisë për hapat e ndërmarrë në kuadër të procesit të negociatave, por edhe në rritjen e transparencës dhe ndërgjegjësimit publik mbi këtë proces.

Takimi u përshëndet nga z. Taulant Balla, Bashkëkryetar i KKIE-së, i cili, pasi u uroi mirëseardhjen pjesëmarrësve, theksoi rëndësinë e përfshirjes së të rinjve dhe të gjithë aktorëve të shoqërisë në procesin e neogiciatave me Bashkimin Europian. Z.Balla prezantoi ecurinë e deritanishme të negociatave, pritshmëritë për përmbylljen e kapitujve brenda vitit 2027, si dhe rolin që pritet të luajë Kuvendi në diplomacinë parlamentare për përshpejtimin e ratifikimit të Traktatit të Aderimit nga parlamentet e 27 vendeve anëtare të BE-së.

Z. Balla ndau gjithashtu sfidat që shoqërojnë procesin, të cilin e cilësoi njëkohësisht teknik dhe politik, si dhe theksoi rolin e Kuvendit në përmbushjen e piketave të ndërmjetme. Ai vuri në dukje punën e bërë nga KKIE për organizimin e takimeve informuese me grupe interesi dhe aktorë të ndryshëm të shoqërisë, me synim informimin e gjerë mbi procesin, duke nënvizuar se përfituesit përfundimtarë të reformave integruese janë qytetarët.

Duke e konsideruar jetike shndërrimin e integrimit në një debat gjithëpërfshirës, z. Balla theksoi rëndësinë e organizimit të aktiviteteve ndërgjegjësuese për të informuar qytetarët mbi përfitimet dhe detyrimet që shoqërojnë anëtarësimin në Bashkimin Europian.

Në vijim, znj. Elda Zenelaj, Drejtoreshë e Sekretariatit Teknik të KKIE-së, dhe znj. Ana Çoba, Koordinatore Projekti në Akademinë e Negociatave, inkurajuan të rinjtë të jenë sa më aktivë në promovimin e vlerave evropiane dhe në rritjen e ndërgjegjësimit qytetar.Takimi vijoi me një sesion pyetjesh dhe diskutimesh mbi rolin e deritanishëm të Kuvendit në procesin e negociatave, detyrimet për raportimin e ecurisë, transparencën e procesit legjislativ dhe përafrimin me acquis të BE-së, përfshirjen e pushtetit vendor dhe kontributin e shoqërisë civile në këtë proces, etj.

04/02/2026

Këshilli Kombëtar i Integrimit Europian (KKIE) në bashkëpunim me European Movement Albania zhvilluan takimin ndërgjegjësues me temë: “Ecuria e adresimit të rekomandimeve të Raportit të KE-së 2025 sa i përket fushës së sigurisë ushqimore dhe sfidat sa i përket plotësimit të angazhimeve në kuadër të procesit të negociatave në Grupkapitullin 5 “Burimet, Bujqësia, Kohezioni”/ Kapitulli 12 ku morën pjesë përfaqësues të institucioneve shtetërore, biznesi, grupet e interesit, bota akademike dhe OSHC, pjesë e KKIE.

Takimi i konceptuar si një forum dialogu mes përfaqësueve të Kuvendit, qeverisë dhe grupeve të interesit pati në fokus ecurinë e adresimit të rekomandimeve të Raportit të Komisionit Europian për vitin 2025 në fushën e sigurisë ushqimore, si edhe sfidat me të cilat përballet vendi në plotësimin e angazhimeve në kuadër të procesit të negociatave në Grupkapitullin 5 “Burimet, Bujqësia, Kohezioni”/ Kapitulli 12”.

Aktiviteti u përshëndet nga z. Taulant Balla, Bashkëkryetar i Këshillit Kombëtar të Integrimit Europian, i cili pasi u uroi mirëseardhjen të ftuarve, theksoi rëndësinë e takimit në një fazë kyçe dhe mjaft intensive që do të ketë Kuvendi përgjatë vitit 2026 në procesin e negociatave të vendit me BE, për sa i përket volumit të projektligjeve që do të përafrohen me legjislacionin europian si edhe në përmbushjen e piketave gjatë procesit të negociatave me BE. Z Balla theksoi se siguria ushqimore dhe përmbushja e rekomandimeve në Grupkapitullin 5, “Burimet, Bujqësia, Kohezioni” përbëjnë një nga kapitujt më të rëndësishëm dhe sfidues të procesit të negociatave, pasi është një proces teknik, por me ndikim të drejtpërdrejtë politik, ekonomik dhe shoqëror, që kërkon një qasje tjetër të shoqërisë për shkak se lidhet me shëndetin e qytetarëve, besimin e konsumatorëve dhe me një funksionimin real të tregut të brendshëm në vend. Z. Balla u shpreh se politikat e sigurisë ushqimore, veterinarisë dhe fitosanitarisë janë gurë themeli për përgatitjen e vendit për tregun e brendshëm europian, si dhe nënvizoi se përmbushja e kërkesave në këtë fushë nuk mund të kufizohet vetëm në përafrimin e legjislacionit, por kërkohet ndërtimi i një sistemi kontrolli efektiv dhe transparent. Duke iu referuar rekomandimeve të Raportit të Komisionit Europian 2025, z.Balla vuri theksin tek zbatimi i legjislacionit të sigurisë ushqimore, rritjen e kapaciteteve të Autoritetit Kombëtar të Ushqimit, zhvillimin e laboratorëve dhe garantimin e standardeve në pikat e kontrollit kufitar, si dhe forcimi i bashkëpunimit mes institucioneve shtetërore për kontrollin e ushqimeve të importuara.
Z.Balla vlerësoi masat ligjore të ndërmarra me miratimin e ligjit të ri për Kontrollet Zyrtare, i përafruar me Rregulloren (BE) 2017/625, si dhe punën që po bëhet për ligjin e ri “Për Ushqimin”, si dhe investimet përmes projekteve si “EU4FOODSAFETY” dhe “CRAD”, forcimi i pikave të inspektimit kufitar, laboratorëve dhe kapaciteteve njerëzore, për të cilat u shpreh se janë dëshmi se procesi i përafrimit po shoqërohet me masa konkrete në terren.
Në përfundim z.Balla theksoi angazhimin e Kuvendit dhe KKIE jo vetëm për të miratuar legjislacionin e nevojshëm, por edhe për të ushtruar mbikëqyrje reale mbi zbatimin e tij, funksionimin e institucioneve përgjegjëse dhe mbi transparencën e procesit.

Z.Gledis Gjipali, Drejtor Ekzekutiv i Lëvizjes Europiane në Shqipëri, në fjalën e tij përshëndetëse vlerësoi rëndësinë e takimit në këtë moment, kur agjenda e integrimit ka hyrë në një fazë më të përshpejtuar, për të njohur dhe ndarë mendime mbi çështjet e sigurisë ushqimore, sfidat me të cilat lidhet procesi përgjatë këtij viti. Z.Gjipali theksoi se nevojitet një angazhim më i shtuar nga të gjithë aktorët në këtë fazë, për të ndjekur ndryshimet që po i bëhen legjislacionit në fushën e sigurisë ushqimore në kuadër të përafrimit me Direktivat dhe legjislacionin e BE-së, monitoruar përshtatjen që po bëjnë strukturat për të zbatuar këtë legjislacion, si dhe njëkohësisht të informohen grupet e interesit. Z.Gjipali theksoi se biznesi, shoqatat e agrobiznesit, konsumatorëve dhe grupeve të interesit, duhet të ftohen për të dhënë kontribut, por dhe për të qenë monitorues dhe informues për të gjithë këtë proces.

Më pas, Ministri i Bujqësisë dhe Zhvillimit Rural, z.Andis Salla informoi mbi prioritetet dhe angazhimet e institucionit që drejton në fushën e sigurisë ushqimore, veterinarisë dhe shëndetit të bimëve, në kuadër të procesit të integrimit të Shqipërisë në Bashkimin Evropian. Z.Salla theksoi se përgjatë periudhës së fundit është punuar intensivisht për përmirësimin e kuadrit ligjor, forcimin e kontrollit zyrtar në të gjithë zinxhirin “nga ferma në tavolinë”, rritjen e kapaciteteve institucionale dhe përmirësimin e infrastrukturës mbështetëse, si laboratorët dhe pikat e kontrollit kufitar. Duke nënvizuar se përafrimi i legjislacionit mbetet një nga detyrat kryesore të procesit, z.Salla informoi se për vitin 2026 parashikohet miratimi i rreth 90 akteve nënligjore dhe 5 akteve zbatuese në fushën e sigurisë ushqimore, 31 akte nënligjore në fushën e veterinarisë për periudhën 2026–2027, si dhe 10 akte nënligjore në fushën fitosanitare gjatë vitit 2026. Në fjalën e tij, ministri nënvizoi gjithashtu rëndësinë e mbështetjes së Bashkimit Europian dhe të qeverisë gjermane përmes projektit “EU4FOODSAFETY”, i cili synon përgatitjen e Programit Kombëtar për përmirësimin e standardeve të operatorëve të biznesit ushqimor dhe përmirësimin e cilësisë së qumështit të papërpunuar. Z. Salla theksoi se fokusi i dikastrit që drejton do të jetë edhe forcimi i kontrolleve zyrtare të bazuara në risk, për produktet e importit, eksportit dhe prodhimit vendor, në mënyrë që standardet të zbatohen njësoj në të gjithë territorin, si dhe u ndal në investimet e parashikuara për ndërtimin e shtatë Pikave të Inspektimit Kufitar, forcimin e mëtejshëm të kapaciteteve institucionale të AKU-së dhe ISUV-it.
Në përfundim, ministri theksoi se procesi i integrimit kërkon angazhim të përbashkët dhe shprehu angazhimin e MBZHR-së për mbështetjen praktike për operatorët dhe fermerët, me qëllim forcimin e besimit dhe garantimit të sigurisë ushqimore për konsumatorin.

Më pas aktiviteti vijoi me diskutime dhe pyetje drejtuar ministrit të Bujqësisë së Zhvillimit Rural nga: z. Granit Sokolaj, Drejtor Ekzekutiv i Qendrës ALERT, z.Florian Xhafa, Drejtor Ekzekutiv i Institutit për Politika dhe Ligj, z.Nikolin Jaka, Kryetar i Dhomës së Tregtisë dhe Industrisë, znj.Ersida Teliti, Drejtore Ekzekutive e Qendra për Konsumatorë Shqiptarë, z.Agim Rrapaj, Kryetar i Këshillit të Agrobiznesit Shqiptarë, lidhur kapacitetet dhe nevojën e reformimit të inspektorateve, nevojën për fushatë ndërgjegjësimi për fermerët dhe bizneset e lidhura me sigurinë ushqimore, mbi detyrimet dhe sfidat që lidhen me integrimin në Bashkimin Europian, nevojën që linjat e kontrollit mbi produktet ushqimore duhet të jetë e unifikuar “nga ferma në tavolinë”, etj.
Aktiviteti u transmetua live në faqen zyrtare web dhe “Facebook” të Kuvendit.

17/12/2025

Këshilli Kombëtar i Integrimit Evropian (KKIE) organizoi sot një takim ndërgjegjësues në bashkëpunim me Cooperation and Development Institute (CDI), ku u diskutua mbi progresin e arritur për periudhën 2024-2025 në realizimin e reformave të planifikuara në kuadër të Agjendës Kombëtare të Reformave 2024–2027. Ky takim kishte si qëllim vlerësimin e progresit të Shqipërisë në kuadër të integrimit në BE dhe hapave të ndërmarrë për të përshpejtuar konvergjencën socio-ekonomike me vendet anëtare të Bashkimit Evropian.

Takimi u drejtua nga z.Taulant Balla, Nënkryetar i Këshillit Kombëtar të Integrimit Europian (KKIE), i cili në fjalën e tij u përqendrua te objektivat kryesore të Agjendës Kombëtare të Reformave 2024–2027, si dhe theksoi se faza aktuale e procesit të negociatave të Shqipërisë me BE e bën të qartë nevojën për ngushtimin e hendekut të konvergjencës socio-ekonomike ndërmjet Shqipërisë dhe BE-së. Duke folur për drejtësinë, z.Balla u shpreh se objektivi ka qenë ndërtimi i një sistemi funksional dhe të besueshëm, në përputhje me standardet e Bashkimit Europian. “Qëllimi i kësaj reforme ka qenë ta themi troç: një sistem drejtësie i besueshëm, një drejtësi efektive, një drejtësi patjetër e pavarur, por pa harruar një drejtësi që të jetë edhe profesionale, e bazuar në parimet e shtetit të së drejtës dhe të ndarjes së pushteteve, në përputhje me standardet më të mira të vendeve anëtare të BE-së”, u shpreh z.Balla duke theksuar më tej se forcimi i sundimit të ligjit dhe thellimi i reformave mbeten jetike, gjë që kërkon intensifikim të luftës kundër krimit të organizuar, përmirësim të kuadrit ligjor dhe parandalim të çdo forme korrupsioni.

Z.Balla u shpreh më tej se një nga prioritetet kryesore të Agjendës Kombëtare të Reformave është përmirësimi i konkurrueshmërisë së ekonomisë shqiptare, e cila mund të arrihet përmes rritjes së produktivitetit në sektorë kyç si: bujqësia, industria, turizmi i qëndrueshëm, shërbimet dhe teknologjia e informacionit, inovacioni, ekonomia e gjelbër, etj. Z. Balla theksoi se Kuvendi i Shqipërisë dhe Këshilli Kombëtar i Integrimit Europian luajnë një rol vendimtar në sigurimin e transparencës, llogaridhënies dhe efektivitetit në fazën e zbatimit të instrumenteve financiare të Bashkimit Evropian, si dhe shprehu angazhimin e Kuvendit, për të monitoruar dhe miratuar akte ligjore të rëndësishme për zbatimin e Agjendës Kombëtare të Reformave, rritjen e transparencës dhe ndërgjegjësimit publik mbi procesin e reformave.

Takimi u përshëndet nga Ambasadorja e Zvicrës në Shqipëri, Sh.T.Znj.Ruth Huber, e cila vlerësoi se instrumenti financiar i Bashkimit Europian “Faciliteti për Reforma dhe Rritje për Ballkanin Perëndimor” është i dyti më i rëndësishëm pas IPA, i cili synon përshpejtimin e konvergjencës socio-ekonomike të rajonit krahasimisht me vendet anëtare të Bashkimit Europian. Ambasadorja theksoi rëndësinë e transparencës dhe gjithëpërfshirjes në procesin e zbatimit të reformave dhe vlerësoi rolin e KKIE si një aktor kyç në mbështetje të këtij procesi. Znj.Huber theksoi angazhimin e Zvicrës për të mbështetur Shqipërinë në rrugëtimin e saj drejt Bashkimit Evropian, duke ndihmuar në forcimin e kapaciteteve institucionale dhe mbikëqyrjen e progresit të reformave.

Në fjalën e saj, znj. Krisela Haçkaj, Drejtore Ekzekutive e Institutit për Bashkëpunim dhe Zhvillim, vlerësoi rëndësinë e qeverisjes së mirë dhe implementimit të reformave për të përmbushur standardet e BE-së. Ajo theksoi se procesi i transparencës dhe mbikëqyrjes parlamentare është thelbësor për të siguruar që reformat të jenë në përputhje me angazhimet e Shqipërisë ndaj BE. Znj.Haçkaj vlerësoi se përfshirja efektive parlamentare është thelbësore për të maksimizuar ndikimin e reformave dhe për të mbikëqyrur shpenzimin e fondeve të BE-së dhe shprehu mbështetjen e CDI ndaj Këshillit Kombëtar për Integrimin Europian, për tu bërë platforma që lehtëson debatin publik dhe informimin e gjerë. Znj.Haçkaj theksoi rëndësinë e institucionalizimit të seancave dëgjimore dhe mekanizmave të raportimit për të forcuar transparencën dhe llogaridhënien.

Në pjesën e dytë të takimit znj. Eridana Çano, Drejtore e Përgjithshme e Agjencisë Shtetërore për Planifikimin Strategjik dhe Koordinimin e Ndihmës (SASPAC), si dhe Koordinatore Kombëtare për Planin e Rritjes, informoi për progresin e arritur në zbatimin e Agjendës Kombëtare të Reformave 2024-2027. Në fjalën e saj znj. Çano theksoi masat e marra për të përshpejtuar reformat dhe ndikimin e tyre në forcimin e administratës dhe menaxhimin e fondeve të Bashkimit Europian, duke u ndalur fillimisht te masat e marra në fillim të vitit, pas hyrjes në fuqi të Marrëveshjeve të Instrumentit të Reformave dhe Rritjes (RGF) dhe vendimeve të Këshillit të Ministrave që miratojnë dhe strukturojnë administrimin e këtij instrumenti. Ajo theksoi se Qeveria Shqiptare, përmes SASPAC, Ministrisë së Financave dhe ministrive të linjës, ka vendosur themelet për një arkitekturë të re koordinimi për fondet e BE-së. Kjo ka mundësuar që raportimi dhe monitorimi i masave të mos perceptoheshin më si një proces administrativ, por si një mekanizëm llogaridhënieje dhe ushtrim profesional i institucioneve.

Në aspektin financiar, Znj. Çano theksoi ndikimin e drejtpërdrejtë të RGF-së. Komisioni Europian ka konfirmuar përmbushjen e 21 hapave nga 41 të raportuar për periudhën dhjetor 2024 – qershor 2025, me një shkallë përmbushjeje prej 51%. Ky progres e rendit Shqipërinë në vend të parë ndër vendet e Ballkanit Perëndimor për sa i përket numrit dhe përqindjes së hapave të realizuar, si dhe shumës së fondeve të disbursuara, që arrin në 99,3 milionë euro. Po ashtu, Shqipëria ka përfituar 163,87 milionë euro duke përfshirë edhe fondet e parafinancimit. Znj. Çano vazhdoi me detaje mbi disa nga rezultatet konkrete të reformave të zbatueshme gjatë këtij viti: strategjinë e të Ardhurave Afatmesme; miratimin e hartës së parë të digjitalizimit të sistemit të kadastrës, implementimin e një programi të ri që synon mbështetjen e punëkërkuesve vulnerabël; miratimin dhe implementimin e Strategjisë së Specializimit SMART (S3); implementimin me sukses te rrjetit 5G, arritjet në Sektorin e Energjisë, etj. Znj. Çano nënvizoi se janë forcuar mekanizmat e koordinimit, përmes takimeve trilaterale mes Delegacionit të BE-së, SASPAC dhe institucioneve zbatuese, duke siguruar qartësi të jashtëzakonshme në ndërtimin e evidencave dhe dokumentimin e funksionalitetit të sistemeve.

Në fund, znj. Çano theksoi se hapat e mëtejshëm do të përfshijnë përmirësimin e klimës së biznesit, përpjekjet për forcimin e institucioneve të drejtësisë, promovimin e energjive të rinovueshme, dhe përmirësimin e efikasitetit energjetik. Ajo theksoi rëndësinë e angazhimit të institucioneve shqiptare dhe partnerëve ndërkombëtarë për të siguruar që reforma të vijojnë të implementohen me sukses, duke përmbushur standardet dhe angazhimet e Shqipërisë në procesin e integrimit në BE, etj.

Aktiviteti vijoi me pyetje dhe diskutime të hapura mes pjesëmarrësve ku morën fjalën z.Agim Rrapaj, Këshilli i Agrobiznesit Shqiptar dhe z. Ismail Varoshi, Këshilli i Organizatave të Punëdhënësve të Shqipërisë.

09/12/2025

Kuvendi i Shqipërisë, Këshilli Kombëtar i Integrimit Europian, ka organizuar një vizitë studimore 3-ditore për 14 përfaqësues të stafeve të parlamenteve të Ukrainës, Moldavisë dhe Armenisë. Ky aktivitet është pjesë e projekteve rajonale “Bashkëpunimi Rajonal për Integrimin në BE” dhe “Fondi Rajonal i Partneritetit Lindor për Administratën Publike III” të GIZ, dhe ka si qëllim forcimin e bashkëpunimit ndërparlamentar në rrugëtimin e përbashkët drejt integrimit të këtyre vendeve në Bashkimin Evropian.
Takimi u hap nga Sekretari i Përgjithshëm i Kuvendit, z. Genci Gjonçaj, i cili pasi u uroi mirëseardhjen të pranishmëve, i njohu me rolin kyç që ka Kuvendi në procesin e integrimit europian të vendit. Z. Gjonçaj theksoi se Parlamenti është vendi ku ndërtohet konsensusi politik për procesin e integrimit europian dhe përmendi masat e marra për forcimin e kapaciteteve të burimeve njerëzore të Administratës dhe vuri në dukje angazhimin e Kuvendit për të garantuar një proces sa më transparentë dhe cilësorë të përafrimit të legjislacionit shqiptar me "acquis" të Bashkimit Europian.
Një nga momentet kyçe të takimit ishte paneli “Roli i Parlamentit në procesin e integrimit europian”, ku Nënkryetari i Këshillit Kombëtar të Integrimit Europian, z. Taulant Balla, prezantoi punën e bërë për hapjen e të gjithë grupkapitujve të negociatave me Bashkimin Europian dhe nënvizoi se anëtarësimi në familjen europiane është një objektiv strategjik dhe një angazhim kombëtar, i mbështetur nga shumica e qytetarëve shqiptarë. Z.Balla njohu të ftuarit me masat e marra për përmirësimin e legjislacionit dhe përgatitjen e strukturave të Kuvendit për të mbështetur procesin e integrimit, si dhe u ndal në ndryshimet ligjore të fundit që kanë përmirësuar procesin e mbikëqyrjes parlamentare të negociatave dhe përafrimin e legjislacionit me “acquis” të BE-së.
Gjatë ditës së parë të vizitës, stafi i Kuvendit të Shqipërisë prezantoi përvojën e tyre dhe ndryshimet që ka pësuar roli i Kuvendit në procesin e integrimit europian, përgjegjësitë e organeve si Komisioni për Europën dhe Punët e Jashtme si dhe Këshilli Kombëtar i Integrimit Europian, Komiteti Parlamentar i Stabilizim Asociimit, përafrimin e legjislacionit europian, dhënien e mendimeve për pozicionet negociuese.

Për më tepër👉 https://www.parlament.al/lajme/4fc99b14-577d-4ff3-bd32-ae58b8aa8b8d

Këshilli Kombëtar i Integrimit Europian

25/05/2026

08/05/2026

17/04/2026

12/02/2026

04/02/2026

17/12/2025

09/12/2025

Address

Website

Alerts

Contact The Organization

Shortcuts

Share

Category