30/07/2026
🌍🇪🇺 Agjencia Kombëtare e Mjedisit mori pjesë në takimin dyditor të projektit IMPEL STATE (Soil healTh And EcosysTem Services), i zhvilluar në Funchal, Madeira, Portugali.
Ky takim mblodhi përfaqësues të autoriteteve mjedisore, ekspertë dhe studiues nga vende të ndryshme evropiane për të diskutuar mbi mbrojtjen e tokës, menaxhimin e qëndrueshëm të saj dhe zbatimin e legjislacionit evropian në këtë fushë, në kuadër të Direktivës së re për Monitorimin dhe Reziliencën e Tokës.
Gjatë sesioneve të punës u prezantuan zhvillimet më të fundit mbi politikat evropiane, praktikat inovative për rehabilitimin e tokave të ndotura, monitorimin e cilësisë së tokës dhe shërbimet e ekosistemeve, duke shkëmbyer përvoja dhe praktika të mira mes vendeve pjesëmarrëse.
Në ditën e dytë, pjesëmarrësit vizituan projektin hidroenergjetik të Calheta, ku u njohën nga afër me praktikat e restaurimit të peizazhit, ripërdorimit të qëndrueshëm të materialeve të gërmimit dhe kontributin e këtij investimi në tranzicionin energjetik përmes teknologjisë së hidrocentraleve me depozitimin e energjisë.
Pjesëmarrja e Agjencisë Kombëtare të Mjedisit në këtë aktivitet forcon bashkëpunimin ndërkombëtar dhe shkëmbimin e njohurive, duke kontribuar në zbatimin e standardeve evropiane për mbrojtjen e tokës dhe promovimin e një menaxhimi të qëndrueshëm të burimeve natyrore.
EnvironmentalProtection SustainableDevelopment Madeira EuropeanUnion
Ramis Xhurxhi
