12/06/2026
Instituti Parlamentar zhvilloi vizitë studimore në Shërbimin e Kërkimit të Parlamentit Evropian
Në datat 9 dhe 10 qershor, përfaqësues të Institutit Parlamentar të Kuvendit të Shqipërisë, drejtori dhe disa anëtarë të stafit të Shërbimit të Kërkimit dhe Analizës, së bashku me deputetët z. Erion Malaj dhe z. Kliti Hoti, zhvilluan një vizitë studimore pranë Shërbimit të Kërkimit të Parlamentit Evropian (EPRS), në Bruksel.
Vizita u fokusua në njohjen e mënyrës së organizimit dhe funksionimit të EPRS-së dhe të rolit të tij në mbështetje të procesit legjislativ dhe mbikëqyrës të Parlamentit Evropian. Gjatë takimeve u prezantuan produktet kërkimore dhe analitike të EPRS-së, mekanizmat e mbështetjes për deputetët dhe komisionet parlamentare, si dhe mënyrat e bashkëpunimit me parlamentet kombëtare. Diskutimet trajtuan gjithashtu çështje që lidhen me komunikimin institucional, zhvillimin profesional të stafit, vizualizimin e të dhënave, përdorimin e inteligjencës artificiale në kërkimin parlamentar, analizën financiare dhe buxhetore, si dhe çështje që lidhen me procesin e zgjerimit të Bashkimit Evropian.
Gjatë takimeve u shkëmbyen gjithashtu informacione dhe përvoja mbi organizimin e shërbimeve kërkimore parlamentare, veprimtarinë e Shërbimit të Kërkimit dhe Analizës të Kuvendit të Shqipërisë, mbështetjen që ai ofron për deputetët dhe komisionet parlamentare, si dhe zhvillimet në fushën e digjitalizimit dhe të kapaciteteve analitike.
Vizita shërbeu si një mundësi e vlefshme për shkëmbimin e praktikave dhe forcimin e bashkëpunimit institucional në fushën e kërkimit parlamentar dhe mbështetjes analitike të veprimtarisë parlamentare.
Vizita u organizua në kuadër të projektit “Mbështetje për Parlamentin dhe Edukimin Qytetar” (PACEP II), financuar nga SDC dhe zbatuar nga NDI Albania.
