05/06/2026
Bashkia Shkodër zhvilloi sot takimin në kuadër të projektit TERRITORY (Strengthening Disaster Response Capacities through Drone Technology), pjesë e Programit Interreg IPA South Adriatic 2021–2027.
Aktiviteti u hap nga nënkryetari i Bashkisë Shkodër, Rudin Beka, ndërsa në takim morën pjesë përfaqësues të institucioneve partnere nga Italia, përfaqësues të SASPAC (Agjencia Shtetërore e Programimit Strategjik dhe Koordinimit të Ndihmës), si dhe ekspertë të fushës së menaxhimit të emergjencave, teknologjisë së dronëve dhe inteligjencës artificiale.
Gjatë takimit u prezantuan objektivat kryesore të projektit, i cili synon forcimin e kapaciteteve për menaxhimin e fatkeqësive natyrore përmes përdorimit të teknologjisë së dronëve (UAS) dhe Inteligjencës Artificiale.
Në kuadër të prezantimeve, Giuseppe Pompameo, përfaqësues i Distriktit Teknologjik Ajror (DTA) në Itali dhe iniciativës DTA + Drones Beyond, prezantoi aktivitetet dhe objektivat e projektit në fushën e teknologjisë së dronëve. Më pas, përfaqësues të SASPAC prezantuan Programin Interreg IPA South Adriatic 2021–2027 dhe mundësitë që ai ofron për bashkëpunimin ndërkufitar.
Nga ana e Bashkisë Shkodër, Xhehnet Dani, drejtor i Drejtorisë së Emergjencave Civile, paraqiti rolin dhe angazhimin e Bashkisë në projekt, si dhe rëndësinë e përdorimit të teknologjive të avancuara në monitorimin dhe menaxhimin e situatave emergjente.
Gjithashtu, Prof. Asoc. Genta Rexha, përfaqësuese e Institutit për Kërkim dhe Zhvillim Barleti (BIRD), prezantoi kuadrin e bazuar në Inteligjencën Artificiale dhe dronë për parandalimin e fatkeqësive dhe menaxhimin e riskut territorial.
Përmes këtij projekti synohet:
✅ përmirësimi i menaxhimit të riskut dhe reagimit në situata emergjente;
✅ monitorimi më efektiv i territorit dhe zbulimi i hershëm i risqeve;
✅ analiza dhe përpunimi i të dhënave në kohë reale;
✅ mbështetja e operacioneve të kërkim-shpëtimit.
Bashkia Shkodër, si partnere në këtë projekt ndërkombëtar, e konsideron përdorimin e teknologjive inovative një element të rëndësishëm për rritjen e kapaciteteve të Mbrojtjes Civile, përmirësimin e monitorimit të territorit dhe forcimin e sigurisë së komuniteteve. Projekti TERRITORY përfaqëson një hap konkret drejt modernizimit të sistemeve të menaxhimit të emergjencave dhe rritjes së qëndrueshmërisë së territorit përballë sfidave natyrore dhe klimatike.
