18/05/2026
📚 Në ambientet e Bibliotekës Publike “Marin Barleti” në Shkodër u zhvillua aktiviteti i Klubit të Librit “Mësojmë nga e kaluara”, organizuar nga Autoriteti për Informimin mbi Dokumentet e ish-Sigurimit të Shtetit në bashkëpunim me Ministrinë e Arsimit, Bashkinë Shkodër, Bibliotekën Publike “Marin Barleti” dhe ZVA Shkodër.
Në qendër të takimit ishte libri memuaristik “Nëpër shtigjet e ferrit” i Viktor Martini, një dëshmi e drejtpërdrejtë mbi përsekutimin e familjes Martini gjatë diktaturës komuniste.
Aktiviteti solli përballë njëri-tjetrit librin, kujtesën personale dhe dokumentin arkivor, duke ndërtuar një rrëfim të plotë mbi mekanizmat e përsekutimit politik. Përmes kujtimeve të autorit dhe dosjeve të ruajtura në arkivën e ish-Sigurimit të Shtetit, pjesëmarrësit u njohën jo vetëm me fatin e një familjeje të goditur nga regjimi, por edhe me mënyrën se si dokumentohej dhe ushtrohej represioni institucional.
Në emër të AIDSSH takimin e hapi znj. Brunilda Cerraga, Përgjegjëse e Sektorit të projekteve dhe edukimit në Autoritetin për Informimin mbi Dokumentet e ish Sigurimit të Shetit. Më pas fjalën e rastit e mbajti z. Leka Ndoja, Drejtor i Arkivës ISKK. Takimi vijoi me diskutimet e mësueseve të shkollave të rrethit të Shkodrës, zonjat Merita Kastrati, Orjeta Dushi, Rudina Prendi dhe Mirela Sakej.
Aktiviteti u moderua nga znj. Rovena Rozhani, Punonjëse e AIDSSH-së.
Klubi i Librit “Mësojmë nga e kaluara” synon të përdorë letërsinë memuaristike dhe arkivën si mjete edukimi historik dhe qytetar, veçanërisht për të rinjtë dhe mësuesit, me qëllim që historia e diktaturës të njihet përmes fateve konkrete njerëzore dhe kujtesës së dokumentuar.
Gjatë këtij takimi, u themelua në Shkodër Klubi i Librit "Mësojmë nga e kaluara" një nismë e Autoritetit për Informimin mbi Dokumentet e ish-Sigurimit të Shtetit, në bashkëpunim me Ministrinë e Arsimit dhe Sportit, Bashkinë Shkodër, Bibliotekën Publike “Marin Barleti” dhe ZVA Shkodër.
