23/08/2026
Njoftim për situatën e zjarreve në territorin e Bashkisë Mirditë.
Situata e zjarreve në territorin e Bashkisë Mirditë po mbahet nën kontroll falë ndërhyrjes së koordinuar dhe angazhimit të pandërprerë të strukturave në terren.
Vëmendja kryesore mbetet te vatra e zjarrit në zonën Tenë/Malaj, ku situata u përkeqësua për shkak të përhapjes së flakëve dhe afërsisë me banesat.
Me marrjen e njoftimit, në terren u angazhuan menjëherë forcat zjarrfikëse, shërbimi pyjor, strukturat e emergjencave civile dhe kapacitetet e tjera vendore në dispozicion.
Për shkak të rrezikut të drejtpërdrejtë për banesat dhe banorët, u kërkua mbështetje urgjente nga struktura të tjera. Në operacion u angazhuan forca zjarrfikëse të ardhura në ndihmë nga Bashkia Mat, Kamëz dhe Njësia Administrative Paskuqan, mjete të Forcave të Armatosura, si dhe kapacitete për ndërhyrje nga ajri. Për garantimin e sigurisë së banorëve, u bë edhe evakuimi i disa familjeve nga zona e rrezikuar.
Ndërhyrja u mbështet nga një bashkëpunim i ngushtë me Policinë e Shtetit dhe Urgjencën Mjekësore të Spitalit Bashkiak Mirditë. Për dy ditë me radhë, ndërhyrja nga ajri dhe puna e forcave në terren bënë të mundur izolimin e zjarrit dhe vënien e tij nën kontroll, duke shmangur përhapjen e mëtejshme drejt banesave.
Operacioni në Tenë/Malaj vijon në terren deri në shuarjen e plotë të vatrës dhe eliminimin e çdo rreziku për riaktivizim.
Në Kaçinar, vatra e zjarrit vijon të jetë aktive, por situata është nën kontroll dhe strukturat në terren po punojnë për shuarjen e plotë të saj dhe parandalimin e përhapjes.
Ndërkohë, vatrat e zjarrit në Tharri, Lufaj, Perlat dhe Velë janë shuar dhe situata në këto zona paraqitet e stabilizuar.
Bashkia Mirditë shpreh mirënjohjen për të gjitha strukturat dhe personat e angazhuar në përballimin e kësaj situate: Ministrinë e Mbrojtjes, Agjencinë Kombëtare të Mbrojtjes Civile, Prefektin e Qarkut Lezhë, Forcat e Armatosura, Policinë e Shtetit, forcat zjarrfikëse, shërbimin pyjor, strukturat e emergjencave civile, punonjësit e shërbimeve mbështetëse dhe njësive administrative, si dhe ekipet zjarrfikëse të ardhura në ndihmë nga Bashkia Mat, Kamëz dhe Nj. Adm. Paskuqan.
Një falënderim i veçantë u shkon banorëve të fshatrave, të cilët kanë qenë pranë strukturave në terren dhe kanë treguar solidaritet, përgjegjshmëri dhe gatishmëri për të mbrojtur komunitetet dhe pronat e tyre.
Bashkia Mirditë shpreh gjithashtu solidaritetin dhe mirënjohjen për nëntetarin Andrea Kaci, i cili u dëmtua gjatë aksionit për shuarjen e zjarrit.
Andrea Kaci është jashtë rrezikut për jetën dhe i urojmë shërim të shpejtë e të plotë.
Ndërhyrja e koordinuar e të gjitha strukturave ka bërë të mundur shmangien e dëmeve në banesa dhe mbrojtjen e banorëve, pronave dhe sipërfaqeve pyjore.
Në këto momente të vështira, puna dhe sakrifica e çdo personi të angazhuar në terren janë dëshmi e përgjegjësisë dhe e forcës së bashkëpunimit.
Mirënjohje për të gjithë ata që po punojnë për mbrojtjen e Mirditës.
Bashkia Mirditë vijon të jetë e angazhuar në terren deri në shuarjen e plotë të vatrave aktive dhe garantimin e sigurisë së banorëve dhe territorit.
