04/03/2023
Të nderuar banorë të bashkisë Prrenjas!
Kemi pak vite që shpesh reagojmë nëpër rrjete sociale, por reagimet e bëra ngelen në rrjete sociale dhe nuk kanë ndonjë impakt të madh.
Besojmë se jemi në një situatë shumë kritike, ku njerëzit, veçanërisht të rinjtë, nuk shohin rreze shprese. Bashkia e Prrenjasit është ndër zonat më të varfra të vendit dhe po të kishim ndonjë statistikë, nuk do të ishte habi që në rang Republike të ishim në vend të fundit.
Çfarë të ardhurash kanë banorët e zonës? Cilat janë aktivitetet kryesore ku janë punësuar? Sa përqind e tyre janë punësuar në Bashki? Sa në sektorin privat? Cilat janë prioritetet? Çfarë është bërë dhe çfarë duhet bërë? Si dhe sa kanë ndikuar politikat e Bashkisë në jetën e banorëve? Çfarë është arritur deri tani? Mjaft banorë janë të mendimit se puna e Bashkisë lë jashtëzakonisht shumë për të dëshiruar, madje një pjesë se është mjaft e korruptuar.
Një ndër pyetjet më kryesore është: Sa i përfaqëson në të vërtete Bashkia dhe këshilli bashkiak zgjedhësit e tyre? Me sa shohim, thuajse aspak dhe një nga shkaqet është mosfunksionimi i këshillit bashkiak, ku besojmë se ka individë që janë të kapur nga drejtuesit e bashkisë për të ndarë tortën e pushtetit, përndryshe nuk ka si shpjegohen shumë vendime të marra prej tyre.
Nisur nga sa më lart dhe nga dëshira për të sjellë sadopak ndryshim në mënyrën e politikëbërjes lokale, kemi vendosur të kandidojme për këshillin bashkiak Prrenjas dhe t’ju përfaqësojmë me dinjitet duke mbrojtur interesin publik, interesat tuaja. E marrim këtë nismë, duke e parë si një mënyrë që të kontribuojmë në mënyrë direkte (përmes vendimeve të këshillit bashkiak) dhe indirekte (duke propozuar bërjen e politikave për çështje të ndryshme). Ne nuk do të presim urdhra nga shefat e partisë ashtu sikundër bëjnë disa këshilltarë të sotëm që komandohen nga drejtues politikë. Një ndër shembujt më tipikë të vendimeve me komandim të këshillit është bashkimi i ujësjellësit me bashkinë e Pogradecit dhe dyfishimit të tarifës së ujit. Ky vendim është marrë para gati 1 viti dhe askush nga ne nuk e di se çfarë është kurdisur në kurriz të banorëve.
Sigurisht, nuk jemi magjistarë që të ndryshojmë gjërat në çast, por, do të jemi propozues dhe bashkëpunues me Kryetarin e bashkisë që të ndërmerren politika lokale për të ndryshuar zymtinë që ka pllakosur territorin e bashkisë sonë. Të papolitizuar, duam të jemi atje që të kërkojmë llogari, jo t’u japim drejtuesve të Bashkisë. Kjo është një rrugë aspak e lehtë dhe për të bërë ndryshimin që kërkojmë të sjellim, ne kemi vullnetin dhe guximin për t’u përballur me anëtarët e politizuar të këshillit bashkiak.
Gjëja e parë që do të kërkojmë dhe dëshirojmë të realizojmë është "Transparenca në vendimmarrje". Mund të thotë dikush se sa mbledhje këshilli janë transmetuar në facebook apo me ndonjë media, gjatë këtyre 3 viteve? Mund të thotë dikush se mbi ç’baza janë bërë punësimet? Bashkia nuk ka ende një organikë të publikuar në faqen e saj: PSE???? Takimet politike të PS (apo edhe pative të tjera), transmetohen live në Facebook, ndërsa mbledhjet e Bashkisë, jo.
Të udhëhequr nga përgjegjësia e lartë që shpresojmë të na i besoni në zgjedhjet e 14 majit dhe nga dashuria për zonën, lista jonë do të mundohet që këshilli të kthehet në anën e banorëve dhe pro interesave të tyre, sidomos atyre ekonomike.
Lista jonë nuk do ketë njerëz që pasi marrin mandatin, harrojnë lidhjen me ju dhe shikojnë vetëm interesin e vet për punësime apo favore personale në këmbim të votës, në kundërshtim me interesat publike.
Lista jonë nuk do ketë njerëz të cilët votojnë çdo gjë që u kërkojnë shefat e tyre vetëm për të mbajtur vendin e punës.
Lista jonë nuk do ketë këshilltarë që të votojnë për hidrocentrale shkatërrimtarë të natyrës duke sh*tur votën dhe veten për in teresat e përfituesive të tenderave, ndërkohë që njerëzit e thjeshtë përballen me sfidat e vështira të jetës, pa përkrahjen e duhur që të zgjedhin problemet e përditshme.
Duke shpresuar dhe besuar se do të kemi mbështetjen tuaj, për çdo informacion, propozime apo të tjera, mund të na kontaktoni te kjo faqe, të na shkruani në profilet tona Facebook, apo në adresat email: [email protected], [email protected].
Të gjithë bashkë për "Ndryshimin e politikëbërjes lokale".
Me shume respekt
Fari Lacka
Rigels Karriqi
