Drejtoria Vendore e Policisë Lezhë

01/09/2026

01/09/2026

01/09/2026

🚔👮‍♀️👮Policia Rrugore Lezhë/Monitorim intensiv në të gjitha akset rrugore të qarkut, për parandalimin e aksidenteve rrugore dhe rritjen e sigurisë në rrugë.

Shërbimet e Policisë Rrugore Lezhë kanë vijuar monitorimin e pandërprerë të qarkullimit rrugor në të gjitha akset e qarkut, me qëllim garantimin e lëvizjes së lirshme dhe pa ndërprerje të mjeteve, pavarësisht fluksit shumë të lartë të qarkullimit gjatë kësaj periudhe. Gjithashtu, shërbimet e Policisë Rrugore kanë qenë në mbështetje të përdoruesve të rrugës, duke ndërhyrë dhe ofruar asistencë në çdo rast nevoje.

Në fokus të punës së Policisë Rrugore Lezhë, përgjatë muajit gusht, ishin evidentimi dhe ndëshkimi i drejtuesve të mjeteve që drejtonin automjetet nën efektin e alkoolit ose në gjendje të dehur, pa leje drejtimi, me shpejtësi tej normave të lejuara, kryenin parakalime të gabuara, si dhe shkelje të tjera të Kodit Rrugor.

Si rezultat i kontrolleve parandaluese, gjatë muajit gusht:

12 drejtues mjetesh janë referuar në Prokurori për drejtim mjeti në gjendje të dehur dhe pa leje drejtimi, konkretisht 5 të arrestuar për drejtim mjeti në gjendje të dehur dhe 7 të proceduar në gjendje të lirë për drejtim mjeti pa leje drejtimi;

4 drejtues mjetesh janë arrestuar për shkelje të rregullave të qarkullimit rrugor;

2806 drejtues mjetesh janë ndëshkuar me masë administrative për tejkalim të normave të lejuara të shpejtësisë, ndërsa 529 prej tyre janë ndëshkuar edhe me masë plotësuese, pezullim të lejes së drejtimit dhe zbritje pikësh;

2059 drejtues mjetesh janë ndëshkuar për parakalime të gabuara;

214 drejtues automjetesh dhe motomjetesh janë ndëshkuar për drejtim mjeti nën efektin e alkoolit.

Kontrollet e Policisë Rrugore Lezhë do të vijojnë pa ndërprerje në të gjitha akset urbane, interurbane dhe rurale të qarkut, me përdorimin e mjeteve bashkëkohore logjistike, me qëllim parandalimin e aksidenteve dhe rritjen e parametrave të sigurisë rrugore.

Policia Rrugore Lezhë apelon për të gjithë drejtuesit e mjeteve që të zbatojnë me rigorozitet rregullat e qarkullimit rrugor, të shmangin shpejtësinë, alkoolin dhe çdo sjellje që rrezikon jetën e përdoruesve të rrugës.

Ftojmë qytetarët të denoncojnë në numrin pa pagesë 112 çdo shkelje të rregullave të qarkullimit rrugor.

31/08/2026

28/08/2026

27/08/2026

Lezhë/Finalizohet operacioni i koduar “Unaza”

Qarkullonte me automjet të blinduar dhe i armatosur, nuk iu bind urdhrit të punonjësve të Policisë për të ndaluar dhe tentoi të largohej, kapet dhe arrestohet 41-vjeçari.

41-vjeçari me precedent penal për kanosje dhe kundërshtim të punonjësve të Policisë.

Sekuestrohen 1 armë zjarri pistoletë, me fishek në fole, krehri i saj me disa fishekë, si dhe automjeti i blinduar.

Nga strukturat për hetimin e krimeve të DVP Lezhë, në bashkëpunim me Forcën e Posaçme “Shqiponja” dhe shërbimet e Komisariatit të Policisë Lezhë, bazuar në informacionet e siguruara për një shtetas që qarkullonte i armatosur, u organizua dhe u finalizua operacioni i koduar “Unaza”, në kuadër të të cilit u arrestua shtetasi:

-A. M., 41 vjeç, banues në fshatin Malecaj-Torovicë, Lezhë.

Ky shtetas u lokalizua në fshatin Torovicë, duke qarkulluar me një automjet të blinduar.

Shërbimet e Policisë i kanë bërë shenjë ndalimi, por drejtuesi i automjetit nuk i është bindur urdhrit dhe ka vijuar lëvizjen me shpejtësi.

Pas disa minutash ndjekjeje, në fshatin Malecaj, u bë e mundur kapja dhe vënia në pranga e 41-vjeçarit.

Në cilësinë e provës materiale janë sekuestruar automjeti i blinduar, 1 armë zjarri pistoletë, me fishek në fole, dhe krehri i saj me disa fishekë, të cilat drejtuesi i automjetit i hodhi në tokë gjatë ndjekjes nga Policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.