21/07/2026
Në respekt të shqetësimit të disa banorëve të fshatit Malbardhë Fushë në lidhje me problematikën e rrugës, sqaroj se:
Rehabilitimi i rrugës “Rrënorja”, Njësia Administrative Milot, është parashikuar dhe miratuar për financim në buxhetin e këtij viti dhe brenda pak ditësh do të nisë puna për asfaltimin e saj.
Pa dyshim, do të kishte qenë mirë që ky investim të ishte realizuar më herët. Megjithatë, e rëndësishme është që tashmë ai është bërë realitet dhe, në një kohë të shkurtër, banorët do të kenë një rrugë të asfaltuar dhe një infrastrukturë shumë më të mirë.
Kaq për sa i përket shqetësimit të drejtë të banorëve që e presin prej 35 vitesh atë investim.
Metoda e re që, sapo merret vesh që do të fillojë një investim, shkohet në zonë, nxirret telefoni për video selfie apo takohen disa qytetarë që shprehin shqetësime të ndryshme, e më pas thuhet se ja, “ne e evidentuam hallin tuaj dhe ai u zgjidh brenda ditës”, ju them se nuk do t’ju çojë askund.
Ndoshta do ju shikojmë sërish me telefona nëpër duar duke “zgjidhur” halle lart e poshtë pasi do të jemi përsëri në kantiere të reja për përmirësimin e infrastrukturës rrugore në zona urbane e rurale. Me gjithë punën e kryer në këto vite, të cilën nuk dua ta evidentoj këtu se është diçka që e shohin qytetarët, ne jemi të vetëdijshëm që nevojat në territor mbeten prapë të mëdha.
Ndërsa për sa i përket sulmeve dhe akuzave nga përfaqësuesit e elektoratit të partisë së z. Kujtim Gjuzi dhe deklaratave në këtë vapë të madhe, ndjej vetëm keqardhje dhe asgjë më shumë. Mirë do të ishte që të jeni të njejtë, si kur dilni duke “protestuar” me telefon në dorë paradite, ashtu edhe kur shkruani sms pasdite.
Balta e hedhur prej jush veç ma shton vendosmërinë për t’ju shkuar deri në fund puneve të nisura e projekteve që janë planifikuar për t’u kryer.
