Florinda Zegullaj

09/06/2026

08/06/2026

08/06/2026

Sot zhvilluam inspektim në Shkollën e Mesme të Bashkuar “Trajan Gjorgjiovski dhe Mitre Kolevski” në Pustec, si dhe në Gjimnazin “Ymer Dishnica” Korçë, në kuadër të ndjekjes së zbatimit të elementeve të Paketës së Sigurisë në Shkolla.

Fokusi i inspektimit ishte verifikimi i kushteve të sigurisë, perimetrit të shkollave, sinjalistikës, kamerave të sigurisë, pajisjeve kundër zjarrit, si dhe bashkëpunimit me institucionet përgjegjëse për garantimin e një mjedisi sa më të sigurt për nxënësit dhe stafin pedagogjik.

Siguria në shkolla mbetet prioritet i përbashkët institucional. Çdo problematikë e evidentuar do të ndiqet me përgjegjësi dhe afate të qarta, në bashkëpunim me bashkitë, strukturat arsimore, policinë dhe institucionet e tjera përkatëse.

Fëmijët dhe të rinjtë tanë meritojnë shkolla të sigurta, funksionale dhe dinjitoze.

08/06/2026

📍Kalendari i takimeve dhe aktiviteteve 1 - 7 Qershor 2026

07/06/2026

7 Qershor – Dita Botërore e Sigurisë Ushqimore

7 Qershori është shpallur nga Organizata e Kombeve të Bashkuara si Dita Botërore e Sigurisë Ushqimore, me qëllim ndërgjegjësimin mbi rëndësinë e ushqimit të sigurt dhe rolin e tij në mbrojtjen e shëndetit të njerëzve.

Siguria ushqimore është një përgjegjësi e përbashkët dhe një element thelbësor për shëndetin publik, zhvillimin ekonomik dhe mirëqenien e shoqërisë. Ushqimi i pasigurt mund të cënojë cilësinë e jetës, prandaj garantimi i standardeve të sigurisë në çdo hallkë që nga prodhimi, përpunimi, transporti e deri te tregtimi dhe konsumimi, mbetet një prioritet i përhershëm.

Rol kyç në këtë proces luan bashkëpunimi ndërmjet institucioneve, prodhuesve, tregtarëve, bizneseve dhe konsumatorëve, për të ndërtuar një sistem ushqimor më të sigurt, më të qëndrueshëm dhe më të besueshëm.

Vetëm përmes përgjegjësisë së përbashkët dhe bashkëpunimit të vazhdueshëm mund të sigurojmë që ushqimi që arrin në tryezat tona të jetë i sigurt dhe cilësor.

Siguria ushqimore nuk është vetëm një standard, por është një garanci për shëndetin, besimin dhe të ardhmen e shoqërisë sonë.

06/06/2026

“Protesta, Mjedisi dhe Zhvillimi: Nevoja për një Debat të Ndershëm”

Shqipëria po përjeton një nga periudhat më të rëndësishme të transformimit ekonomik dhe turistik në historinë e saj moderne. Krahas këtij zhvillimi, po shtohen edhe debatet publike mbi projektet strategjike, investimet e mëdha dhe ndikimin e tyre në mjedis, pronë dhe komunitet.

E drejta për të protestuar është një nga shtyllat themelore të demokracisë. Çdo qytetar ka të drejtë të ngrejë zërin kur mendon se cenohet interesi publik, mjedisi apo prona e tij. Një shoqëri që nuk proteston për padrejtësitë rrezikon të humbasë aftësinë për të korrigjuar veten.

Por po aq e rëndësishme është që protestat të mbështeten mbi fakte, transparencë dhe interes të sinqertë publik.

Mbrojtja e mjedisit nuk duhet të përdoret si pretekst për të penguar çdo investim zhvillimor. Në të kundërt, zhvillimi ekonomik nuk mund të justifikojë asnjëherë dëmtimin e trashëgimisë natyrore dhe të pasurive publike. Pikërisht këtu qëndron sfida: të gjejmë ekuilibrin mes zhvillimit dhe qëndrueshmërisë.

Është legjitime të kërkohen studime të plota mjedisore, transparencë institucionale dhe respektim i ligjit. Është po aq legjitime të shtrohet pyetja nëse çdo kundërshtim buron realisht nga shqetësime mjedisore apo në disa raste ushqehet nga interesa të tjera ekonomike, politike apo konkurruese.

Askush nuk mund të mohojë ndryshimin që ka pësuar Shqipëria gjatë dekadës së fundit në sektorin e turizmit. Rritja e numrit të vizitorëve, përmirësimi i infrastrukturës, transformimi i hapësirave publike dhe rritja e interesit të investitorëve ndërkombëtarë kanë krijuar mundësi të reja zhvillimi për ekonominë kombëtare dhe lokale.

Turizmi mbetet një nga sektorët me ndikimin më të madh në punësim, sipërmarrje dhe zhvillim rajonal. Për këtë arsye, çdo investim strategjik duhet të vlerësohet me përgjegjësi, pa paragjykime dhe pa emocione politike.

Në një kohë kur konkurrenca për investime, turistë dhe kapital është globale, Shqipëria nuk mund të lejojë as dëmtimin e mjedisit dhe as bllokimin e zhvillimit. Të dyja janë humbje për të ardhmen e vendit.

Prandaj, sfida jonë si shoqëri nuk është të zgjedhim mes mjedisit dhe zhvillimit. Sfida është të garantojmë zhvillim që respekton mjedisin, pronën, ligjin dhe interesin afatgjatë të qytetarëve.

Vetëm përmes dialogut të arsyeshëm, transparencës dhe përgjegjshmërisë institucionale mund të shmangim polarizimin dhe të ndërtojmë një model zhvillimi që i shërben Shqipërisë dhe brezave që do të vijnë.

06/06/2026

Çelja e sezonit turistik nuk është thjesht një moment simbolik, por një angazhim i përbashkët për zhvillimin ekonomik, promovimin e territorit dhe krijimin e më shumë mundësive për komunitetet tona.

Në këtë ditë të veçantë, pata kënaqësinë të marr pjesë në aktivitetet e organizuara me rastin e hapjes së sezonit turistik, duke falënderuar veçanërisht Ministrin e Turizmit, Kulturës dhe Sportit, z. Blendi Gonxhja, për praninë, vëmendjen dhe mbështetjen e vazhdueshme ndaj potencialit turistik të qarkut tonë.

Qarku ynë përfaqëson një nga destinacionet më të rëndësishme turistike të vendit, me vlera të jashtëzakonshme natyrore, kulturore dhe historike.
Sfida jonë sot nuk është vetëm të mirëpresim më shumë vizitorë, por të ndërtojmë ura më të forta bashkëpunimi mes institucioneve, operatorëve turistikë dhe njësive vendore, në mënyrë që turistët të zgjedhin të qëndrojnë më gjatë, të vizitojnë më shumë dhe të përjetojnë të gjithë pasurinë që ofron rajoni ynë.

Turizmi nuk njeh kufij administrativë. Ai fiton kur Korça, Pogradeci, Dardha, Voskopoja, Prespa dhe çdo destinacion tjetër i qarkut promovohen si pjesë e një eksperience të përbashkët dhe të integruar.

Le ta shohim këtë sezon turistik si një mundësi për të forcuar bashkëpunimin, për të rritur cilësinë e shërbimeve dhe për ta kthyer Qarkun e Korçës në një destinacion ku vizitorët jo vetëm vijnë, por dëshirojnë të rikthehen.

06/06/2026

Pogradeci hapi dyert e një sezoni të ri turistik, me vizion, energji dhe besim tek potenciali i jashtëzakonshëm që mbart.

Kënaqësi të isha pjesë e aktivitetit të çeljes së sezonit turistik veror, në një ditë që solli jo vetëm atmosferën e festës, por edhe mesazhin e qartë se turizmi në rajonin tonë po hyn në një fazë të re zhvillimi. Ardhja simbolike me hidroplan e ministrit përgjegjës për turizmin, kulturën dhe sportin, z. Blendi Gonxhja, ishte një imazh domethënës i ambicies për të eksploruar forma të reja promovimi dhe për të zgjeruar mundësitë që ofron ky destinacion unik.

Takimi me operatorët turistikë krijoi një mundësi të vyer për të dëgjuar zërin e sipërmarrësve dhe për të diskutuar mbi sfidat dhe prioritetet e sezonit.

Turizmi nuk matet vetëm me numrin e vizitorëve, por mbi të gjitha me cilësinë e përvojës që u ofrojmë atyre. Prandaj, menaxhimi i hapësirave publike, mbrojtja e mjedisit, pastërtia, mikpritja dhe standardet e shërbimit mbeten përgjegjësi të përbashkëta të institucioneve, biznesit dhe komunitetit.

Pogradeci është një nga perlat më të çmuara të Shqipërisë, një vend ku natyra, kultura, tradita dhe mikpritja bashkëjetojnë në harmoni. Le të punojmë së bashku që çdo vizitor të largohet me dëshirën për t’u rikthyer sërish në brigjet e mrekullueshme të liqenit të Ohrit.

Suksese të gjithëve! Qoftë ky një sezon sa më i mbarë për Pogradecin dhe gjithë qarkun tonë!

05/06/2026

Sot, me dhimbje dhe respekt të thellë, iu bashkova homazheve në nderim të efektivit të Policisë së Shtetit, z.Enea Mekolli, i cili humbi jetën në krye të detyrës.

Përulja para sakrificës së atyre që shërbejnë për sigurinë e qytetarëve është detyrim moral dhe institucional! Në këto momente të rënda, qëndrojmë pranë familjes, të afërmve dhe kolegëve të tij, duke ndarë me ta dhimbjen e kësaj humbjeje të madhe.

Mirënjohje e përjetshme për shërbimin dhe përkushtimin e tij!

U prehsh në paqe, Enea Mekolli!🕯️🇦🇱

04/06/2026

Hapja e një klase burimore në një institucion arsimor duhet të na ftojë në reflektim dhe jo vetëm në festim!!!!

Çdo investim në shërbimet mbështetëse për fëmijët me nevoja të veçanta është i mirëpritur, por duhet të kemi kujdes që këto struktura të mos shndërrohen në mekanizma ndarjeje dhe izolimi…..

Objektivi ynë duhet të mbetet arsimi gjithëpërfshirës, ku fëmijët mësojnë, rriten dhe ndërtojnë marrëdhënie së bashku me bashkëmoshatarët e tyre. Mbështetja e specializuar është e domosdoshme, por ajo duhet të shërbejë si urë drejt përfshirjes dhe jo si alternativë ndaj saj!!!

Si institucion dhe si shoqëri, kemi detyrimin të ndërtojmë shkolla që përshtaten me nevojat e fëmijëve, e jo t’u kërkojmë fëmijëve të përshtaten me kufijtë e sistemit. Çdo fëmijë ka të drejtën të jetë pjesë e komunitetit, të ndihet i pranuar dhe të zhvillojë potencialin e tij në një mjedis që promovon barazinë, respektin dhe dinjitetin njerëzor.