28/05/2026
📊 Nga të dhënat te vendimmarrja, drejt një transporti më efikas ⚓️
Autoriteti Portual Durrës mori pjesë në TODIS Stakeholder Conference 2026, të zhvilluar në Beograd nga Transport Community, me pjesëmarrjen e rreth 60 përfaqësuesve dhe aktorëve të sektorit të transportit nga vendet e Ballkanit Perëndimor.
Konferenca u fokusua në forcimin e mënyrës se si institucionet mbledhin, përpunojnë, verifikojnë dhe përdorin të dhënat e transportit për planifikim më të saktë, monitorim më efektiv dhe vendimmarrje të bazuar në evidencë.
Gjatë aktivitetit u prezantuan funksionalitete të reja të platformës TODIS – Transport Observatory Database and Information System, përfshirë:
🔹 treguesit KPI sipas Rregullores së re TEN-T 1679/2024
🔹 modulin për reziliencën klimatike të infrastrukturës së transportit
🔹 modulin për monitorimin e tregut hekurudhor
🔹 mbledhjen, rishikimin dhe ngarkimin masiv të të dhënave sipas mënyrave të transportit
🔹 përmirësimin e koordinimit rajonal për të dhëna më të besueshme dhe të krahasueshme
Për Portin e Durrësit, pjesëmarrja në këtë proces ka rëndësi të veçantë. Si porta kryesore detare e Shqipërisë dhe një nyje strategjike e rrjetit të transportit rajonal, porti ka nevojë për të dhëna të sakta, të përditësuara dhe të integruara mbi trafikun, kapacitetet, projektet infrastrukturore, lidhjet multimodale, qëndrueshmërinë klimatike dhe performancën operacionale.
Përdorimi i TODIS ndihmon në një monitorim më të mirë të zhvillimeve portuale, në identifikimin e nevojave për investime dhe në përafrimin e projekteve të Autoritetit Portual Durrës me standardet e rrjetit TEN-T dhe objektivat e integrimit në sistemin europian të transportit.
🤝 Autoriteti Portual Durrës mbetet i angazhuar në bashkëpunimin rajonal dhe në përdorimin e të dhënave si instrument kyç për zhvillimin e një porti më modern, më të qëndrueshëm dhe më të lidhur me korridoret europiane të transportit.
WesternBalkans TogetherConnected
