28/05/2026
युरोपेली संघ (ईयू) ले प्रधानमन्त्री बालेन्द्र (बालेन) शाहको नेतृत्वप्रति सकारात्मक धारणा व्यक्त गर्दै नेपालको सुधार र विकास यात्रामा सहकार्य विस्तार गर्ने संकेत दिएको छ।
नेपालका लागि ईयू राजदूत भेरोनिक लोरेन्जोले प्रधानमन्त्री शाहसँगको भेटपछि वर्तमान नेतृत्वमा परिणाममुखी सोच, स्पष्ट योजना र दीर्घकालीन सुधारको प्रतिबद्धता देखिएको बताइन्।
मंगलबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा काठमाडौं र नयाँदिल्लीस्थित ईयू तथा सदस्य राष्ट्रका राजदूतहरूको प्रतिनिधिमण्डलले प्रधानमन्त्री शाहसँग सामूहिक भेटवार्ता गरेको थियो।
पत्रकार सम्मेलनमा राजदूत लोरेन्जोले नेपाल अहिले महत्वपूर्ण अवसरको मोडमा रहेको उल्लेख गरिन्।
“प्रधानमन्त्रीसँग स्पष्ट एजेन्डा, कार्ययोजना र समयसीमा रहेको हामीले अनुभव गर्यौँ,” उनले भनिन्, “नेपालमा प्रभावकारी परिवर्तन ल्याउने बलियो इच्छाशक्ति देखिएको छ।”
प्रधानमन्त्री शाहले भेटका क्रममा नेपाली जनताको अपेक्षा पूरा गर्न सरकार प्रतिबद्ध रहेको बताएका थिए। साथै उनले युवापुस्तालाई राष्ट्र निर्माणको मुख्य शक्ति मान्दै उनीहरूको भूमिका निर्णायक हुने धारणा राखेका थिए।
छलफलमा नेपाल–ईयू सम्बन्ध, विकास सहकार्य, लगानी, शिक्षा, संस्कृति, पर्यटन र सुशासनका विषयमा विस्तृत कुराकानी भएको थियो।
ईयूका अनुसार जेनजी आन्दोलन र त्यसपछि बनेको नयाँ सरकारपछि नेपालप्रति युरोपेली समुदायको धारणा थप सकारात्मक बनेको छ।
नेपालमा लगानीको वातावरण अनुकूल बन्दै गएको भन्दै लोरेन्जोले अन्तर्राष्ट्रिय समुदायलाई नेपालसँग अझ सक्रिय सहकार्य गर्न आग्रह गरिन्।
उनले पछिल्लो समय युरोपेली निजी क्षेत्रको नेपालप्रतिको रुचि बढिरहेको जानकारी दिँदै बैंकिङ, पर्यटन र ऊर्जा क्षेत्र विशेष आशावादी देखिएको बताइन्।
ईयू प्रतिनिधिमण्डलले संस्कृति, पर्यटन तथा नागरिक उड्डयनमन्त्री खडक राज पौडेल, शिक्षा तथा खेलकुदमन्त्री सस्मित पोखरेल र परराष्ट्रमन्त्री शिषिर खनालसँग पनि भेटवार्ता गरेको थियो।
युरोपेली संघले शिक्षा, संस्कृति, पर्यटन र जनशक्ति विकासका क्षेत्रमा आगामी दिनमा थप प्रभावकारी सहकार्य गर्ने इच्छा व्यक्त गरेको छ।
यसैबीच, केही ईयू सदस्य राष्ट्र पुनः नेपालमा दूतावास खोल्ने तयारीमा रहेको जानकारी पनि दिइएको छ।
नेपाली वायुसेवा कम्पनीलाई ईयूको हवाई सुरक्षा सूचीबाट हटाउने विषयमा पनि सुधार प्रक्रिया अघि बढे सकारात्मक प्रगति सम्भव रहेको संकेत दिइएको छ।
