BFAR SAAD Bicol

17/03/2026

𝐍𝐞𝐰𝐬 𝐑𝐞𝐥𝐞𝐚𝐬𝐞 | CFPPA Kumita ng ₱26,335 sa Night Market at Agri Trade Fair sa Albay

Ipinamalas ng Cagbatano Fisherfolk Para sa Pagbabago Association (CFPPA) ang kanilang kakayahan sa paggawa ng value-added na produkto sa Night Market and Agri Trade Fair noong Marso 8–15, 2026. Bahagi ito ng pagdiriwang ng Tinapa Festival at ika-62 taong anibersaryo ng Pio Duran, Albay, kung saan tampok ang kanilang calamares, espesyal na Lumpiang Tamisan mula sa higanteng pusit, at iba’t ibang sariwang huli.

Sa loob ng pitong araw ng aktibidad, nakapagtala ang CFPPA ng kabuuang benta na umabot sa ₱26,335.00. Ang halagang ito ay patunay ng lumalaking pagtangkilik ng publiko sa kanilang mga produkto at ng potensyal ng kanilang Community-Based Enterprise (CBE) bilang dagdag na kabuhayan para sa asosasyon.

_____

For more information about the Program, visit our WEBSITE: https://saad.bfar.da.gov.ph/

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

17/03/2026

| Huling pinagyaman: Likhang-dagat ng mangingisdang Castilla

Mula sa baybayin ng Castilla, Sorsogon ipinagmamalaki ng Poblacion Unified Fisherfolk Association ang kanilang hanay ng dekalidad na produktong dagat na bunga ng sipag, diskarte, at sama-samang pagkilos ng mga mangingisda sa kanilang komunidad.

Sa tulong ng Bureau of Fisheries and Aquatic Resources sa ilalim ng Special Area for Agricultural Development Program (BFAR-SAAD), napa-angat ng asosasyon ang kanilang kabuhayan sa pamamagitan ng pagproseso at paglikha ng value-added fishery products.

Kabilang sa kanilang mga produktong ipinagmamalaki ang tinapang lawlaw, tinapang bangus, tinapang turingan, marinated bangus, bottled alamang, pati mga trial products tulad ng mackerel in oil at bottled sardines.

Ang mga ito ay maingat na pinoproseso gamit ang mga post-harvest equipment na kanilang natanggap mula sa BFAR-SAAD, na makakatulong upang mapanatili ang kalinisan, kalidad, at mas mahabang shelf life ng kanilang paninda, isang mahalagang hakbang upang makasabay sa pamantayan ng merkado.

Ang kasalukuyang presyo ng kanilang mga produkto ay ang mga sumusunod: ang tinapang lawlaw ay Php200 kada kilo, tinapang bangus ay Php400 kada kilo, tinapang turingan ay Php300 kada kilo, at ang marinated bangus ay Php350 kada kilo, habang ang bottled alamang naman ay Php120 bawat bote. Maaaring magbago ang presyo depende sa supply at dami ng order.

Karaniwang mabibili ang kanilang mga produkto sa Barangay Poblacion at mga kalapit na komunidad, pati na sa iba’t ibang bahagi ng bayan, at tumatanggap din sila ng orders mula sa mga restaurant at online buyers—patunay ng kanilang aktibong pag-abot sa mas malawak na merkado.

Para sa mga nais sumuporta at makatikim ng kanilang produktong dagat, maaaring makipag-ugnayan sa mga numerong 0930-780-6608 o 0935-723-8215, o bisitahin ang kanilang tanggapan sa Barangay Poblacion.

Source: Jizelle Anne Buenaflor, BFAR - SAAD PRDC Unit

16/03/2026

News Release | PUFA Nagpakitang-Gilas sa Pagbebenta ng mga Naprosesong Produktong Isda sa Pamilihang Bayan

Ipinakita at ibinenta ng Poblacion Unified Fisherfolk Association (PUFA) ang kanilang mga lokal na naprosesong produktong pangisdaan sa Poblacion Public Market noong Marso 12, 2026 sa Barangay Poblacion, Castilla, Sorsogon. Ito na ang ikaapat na produksyon ng samahan ngayong taong 2026, na nagpapakita ng kanilang patuloy na pagsusumikap na mapanatili ang produksyon ng tinapa at mapalawak ang kanilang merkado.

SAAD, kaagapay sa maunlad na buhay!

03/03/2026

𝐆𝐎𝐅𝐅𝐀, 𝐊𝐮𝐦𝐢𝐭𝐚 𝐧𝐠 𝐌𝐚𝐡𝐢𝐠𝐢𝐭 ₱13𝐊 𝐬𝐚 𝐊𝐚𝐝𝐢𝐰𝐚 𝐧𝐠 𝐏𝐚𝐧𝐠𝐮𝐥𝐨

GOA, Camarines Sur — Bunga ng kanilang tuluy-tuloy na pagsisikap at sama-samang pagtutulungan, nakapagtala ng mahigit ₱13,600.00 na kita ang 64-miyembrong Goa Farmers and Fisherfolk Association (GOFFA) matapos lumahok sa Kadiwa ng Pangulo noong Pebrero 27, 2026.

Ibinida ng samahan ang kanilang mga produktong lumpia, nuggets, at tilanggit, na tinangkilik ng mga mamimili sa naturang aktibidad. Ang nasabing kita ay patunay sa lumalakas na kakayahan ng asosasyon sa pagpoproseso ng kanilang mga produktong pangisdaan.

Ayon sa GOFFA, malaki ang naitulong ng kanilang kolektibong pagsisikap at patuloy na suporta ng mga katuwang na ahensya upang mapaunlad ang kanilang kabuhayan at mapalawak ang merkado ng kanilang mga produkto.

Patuloy ang GOFFA sa pagpapalakas ng kanilang produksyon at marketing initiatives upang mas mapataas pa ang kanilang kita at makapagbigay ng de-kalidad at abot-kayang produkto sa publiko.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

02/03/2026

𝐆𝐎𝐅𝐅𝐀, 𝐊𝐮𝐦𝐢𝐭𝐚 𝐧𝐠 𝐌𝐚𝐡𝐢𝐠𝐢𝐭 ₱13𝐊 𝐬𝐚 𝐏𝐚𝐠𝐥𝐚𝐡𝐨𝐤 𝐬𝐚 𝐊𝐚𝐝𝐢𝐰𝐚 𝐧𝐠 𝐏𝐚𝐧𝐠𝐮𝐥𝐨

Bunga ng kanilang tuluy-tuloy na pagsisikap, buong pagmamalaking nakapagtala ng mahigit ₱13,600.00 na kita ang 64-miyembrong Goa Farmers and Fisherfolk Association (GOFFA) ng Goa, Camarines Sur mula sa pagbebenta ng kanilang Tilapia lumpia, nuggets, at tilanggit sa isinagawang Kadiwa ng Pangulo noong Pebrero 27, 2026.

𝐹𝑢𝑙𝑙 𝑠𝑡𝑜𝑟𝑦; https://www.facebook.com/share/p/182TqWMZjA/

About DA-BFAR SAAD Phase 2:
The Department of Agriculture - Bureau of Fisheries and Aquatic Resources-Special Area for Agricultural Development (DA-BFAR SAAD) Program Phase 2 aims to contribute to poverty reduction and improve the living conditions of vulnerable fisherfolk and their communities by providing sustainable livelihood opportunities and support for poor fishing sectors. These interventions intend to complement the DA banner programs and assist beneficiaries in establishing community-based fishery enterprises. The BFAR-SAAD strives to enhance food security and promote economic growth in targeted areas across the Philippines.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

01/03/2026

27/02/2026

𝐏𝐀𝐍𝐎𝐎𝐑𝐈𝐍 | 𝐌𝐮𝐥𝐚 𝐬𝐚 𝐏𝐚𝐥𝐚𝐢𝐬𝐝𝐚𝐚𝐧 𝐇𝐚𝐧𝐠𝐚𝐧𝐠 𝐬𝐚 𝐏𝐚𝐦𝐢𝐥𝐢𝐡𝐚𝐧!

Ipinakita ng Goa Farmers and Fisherfolk Association ang kanilang pagproseso ng tilapia bilang lumpia, nuggets, at tilanggit, at ang pagbenta ng mga ito sa Kadiwa ng Pangulo.

Sa pamamagitan ng value-adding at pagtutulungan, mas napapataas ang kita ng kanilang asosasyon at mas naipapakilala ang de-kalidad at abot-kayang produktong lokal sa mas maraming mamimili.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

26/02/2026

𝗛𝗜𝗟𝗜𝗡𝗚𝗔 | ENOT NA ANI NIN TILAPIA SA MALINAO, ALBAY, UMINABOT NIN 1.77 TONELADA-BFAR SAAD V

25/02/2026

𝐏𝐔𝐅𝐀 𝐊𝐮𝐦𝐢𝐭𝐚 𝐧𝐠 ₱22𝐊 𝐦𝐮𝐥𝐚 𝐬𝐚 𝐏𝐚𝐠𝐩𝐫𝐨𝐬𝐞𝐬𝐨 𝐧𝐠 𝐓𝐢𝐧𝐚𝐩𝐚 𝐚𝐭 𝐌𝐚𝐫𝐢𝐧𝐚𝐭𝐞𝐝 𝐁𝐚𝐧𝐠𝐮𝐬

Nakapagtala ang Poblacion Unified Fisherfolk Association (PUFA) ng humigit-kumulang ₱22,200 na kabuuang benta mula sa kanilang isinagawang pagproseso ng tinapa at marinated bangus noong Pebrero 22–23, 2026 sa processing area ng samahan sa Poblacion, Castilla, Sorsogon.

Kabuuang 100 kilo ng sariwang bangus ang pinroseso ng 19 na aktibong kasapi at ginawang mga produktong may dagdag-halaga (value-added products). Mula rito, nakalikha ang samahan ng 24 kilo ng Smoked Bangus na naibenta sa halagang ₱400 bawat kilo, at 36 kilo naman ng Marinated Bangus na naibenta sa halagang ₱350 bawat kilo. Ito ang ikatlong production cycle ng PUFA para sa taong 2026, patunay ng tuloy-tuloy at maayos na pagpapatakbo ng kanilang enterprise.

Sa pamamagitan ng pagdaragdag-halaga sa kanilang produkto, mas napapakinabangan ng samahan ang potensyal sa merkado ng bangus sa pamamagitan ng pagpapabuti ng kalidad, pagpapahaba ng shelf life, at pagpapataas ng kita kumpara sa pagbebenta lamang ng sariwang isda. Nakatulong din ang aktibidad sa pagpapalakas ng kakayahan ng mga kasapi sa wastong pagpoproseso, sanitasyon, quality control, packaging, tamang pagpepresyo, at batayang pagtatala ng pananalapi.

Bahagi ang inisyatibang ito ng mas malawak na layunin ng PUFA Food Products na mapalawak ang merkado, makabuo ng matatag na customer base, at madagdagan ang ipon ng organisasyon na idinedeposito sa Rural Bank bilang puhunan sa mga susunod pang production cycle. Sa patuloy na pagre-reinvest ng kanilang kita, layon ng samahan na mapanatili ang sapat na kapital, mapataas ang produksyon, at unti-unting mapalawak ang kanilang operasyon.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

25/02/2026

𝐔𝐧𝐚𝐧𝐠 𝐂𝐫𝐨𝐩𝐩𝐢𝐧𝐠 𝐧𝐠 𝐓𝐚𝐧𝐚𝐰𝐚𝐧 𝐅𝐚𝐫𝐦𝐞𝐫'𝐬 𝐀𝐬𝐬𝐨𝐜𝐢𝐚𝐭𝐢𝐨𝐧, 𝐔𝐦𝐚𝐛𝐨𝐭 𝐬𝐚 1.775 𝐓𝐨𝐧𝐞𝐥𝐚𝐝𝐚

Malinao, Albay — Nakapagtala ng kabuuang 1.775 tonelada ng aning tilapia ang Tanawan Farmer’s Association (TFA) sa kanilang unang cropping sa tulong ng Bureau of Fisheries and Aquatic Resources – Special Area for Agricultural Development (BFAR-SAAD) Program.

Nakataon ang pag-aani sa panahon ng masamang lagay ng panahon dulot ng shear line noong Enero hanggang Pebrero, kung kailan naging limitado ang huli ng mga mangingisda sa dagat. Dahil dito, naging mataas ang demand sa alternatibong suplay ng isda sa komunidad, at naipagbili ng asosasyon ang kanilang ani sa halagang ₱150–₱160 kada kilo sa lokal na pamilihan.

Matatandaang kabilang ang bayan ng Malinao sa mga naapektuhan ng matinding pagbaha dulot ng Bagyong Uwan noong Oktubre. Sa kabila nito, labis ang pasasalamat at kasiyahan ng mga kasapi ng asosasyon sa matagumpay na unang ani.

Ayon kay Wilson Cellona, Pangulo ng TFA, malaking tulong ang proyektong pag-aalaga ng tilapia hindi lamang sa pagdagdag ng kita ng kanilang mga miyembro, kundi maging sa pagbibigay ng abot-kaya at tiyak na malinis na suplay ng isda para sa kanilang komunidad.

Bilang susunod na hakbang, pinangako ng asosasyon na higit pang pag-iigihin ang kanilang operasyon at target na makapagsagawa ng dalawang cropping ngayong taon. Layunin nilang mapalaki ang kita ng mga kasapi at patuloy na makapag-ambag sa pagpapalakas ng seguridad sa pagkain sa kanilang lugar.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

24/02/2026

𝐃𝐚𝐲 – 3 | 𝐁𝐅𝐀𝐑 𝐒𝐀𝐀𝐃 𝐁𝐢𝐜𝐨𝐥 𝐏𝐢𝐧𝐚𝐠𝐭𝐢𝐛𝐚𝐲 𝐚𝐧𝐠 𝐎𝐫𝐠𝐚𝐧𝐢𝐳𝐚𝐭𝐢𝐨𝐧 𝐚𝐭 𝐃𝐑𝐑𝐌 𝐂𝐚𝐩𝐚𝐜𝐢𝐭𝐢𝐞𝐬 𝐧𝐠 𝐦𝐠𝐚 𝐀𝐫𝐞𝐚 𝐂𝐨𝐨𝐫𝐝𝐢𝐧𝐚𝐭𝐨𝐫𝐬 𝐚𝐭 𝐂𝐃𝐎𝐬

Tabaco City, Albay — Matagumpay na natapos ng Bureau of Fisheries and Aquatic Resources – Regional Office 5 (BFAR RO5), sa pamamagitan ng Special Area for Agricultural Development (SAAD) Program, ang tatlong-araw na Social Preparation Workshop noong Pebrero 20, 2026.

Nakatuon ang huling araw ng pagsasanay sa paksang Post-Disaster Risk Reduction and Management (DRRM): Application to Fisheries na pinangunahan ni Ana Liza C. De La Fuenta, Community Development Officer II, kung saan tinalakay nya ang kahalagahan ng maayos na rehabilitasyon, pagbangon, at pagpapatatag ng mga proyektong pangisdaan matapos ang mga kalamidad. Bilang pagtatapos ng kanilang workshop, nagbahagi ang mga kalahok ng mahahalagang aral at pananaw batay sa kanilang mga karanasan sa implementasyon ng SAAD sa kani-kanilang lugar.

Iginawad naman ang mga sertipiko ng pagkumpleto sa isang simpleng seremonya na pinangunahan ng mga tagapagsanay. Sa kanyang pangwakas na mensahe, binati ni Joelle M. Benavidez, Chief ng Regional Fisheries Training and Fisherfolk Coordination Division, ang mga kalahok sa kanilang aktibong pakikibahagi sa buong tatlong araw na pagsasanay. Hinikayat din niya ang mga ito na ipagpatuloy ang paggamit at pagpapalaganap ng mga natutunang kaalaman at kasanayan upang higit pang mapalakas ang implementasyon ng SAAD sa mga komunidad.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚!

17/10/2025

𝐒𝐌𝐅𝐀, 𝐊𝐮𝐦𝐢𝐭𝐚 𝐧𝐠 ₱1 𝐌𝐢𝐥𝐲𝐨𝐧 𝐦𝐮𝐥𝐚 𝐬𝐚 6.2 𝐓𝐨𝐧𝐞𝐥𝐚𝐝𝐚𝐧𝐠 𝐁𝐚𝐧𝐠𝐮𝐬

Sta. Magdalena, Sorsogon — Isang makabuluhang tagumpay ang naitala ng Sta. Magdalena Fisherfolk Association (SMFA) sa ilalim ng BFAR-SAAD Program matapos anihin ngayong Oktubre 2025 ang kabuuang 6.2 toneladang bangus, na nagbigay sa kanila ng kabuuang kita na ₱1,035,210 — ang pinakamataas na kita ng samahan mula nang maging benepisyaryo sila noong 2023.

Pinangunahan ng 19 kasapi (6 babae at 13 lalaki) ang huling ani noong Oktubre 16, na umabot sa 2,210 kilo, matapos ang unang ani na 4,064 kilo noong Oktubre 6. Naibenta ang kanilang produkto sa halagang ₱150–₱170 kada kilo, patunay ng mahusay na produksyon at maayos na pamamahala ng grupo.

Bilang patunay ng responsableng pamamahala sa pondo, nadagdagan ng SMFA ang kanilang ipon sa GSAC Bulan Branch, na magsisilbing puhunan para sa pagpapatuloy ng kanilang mga gawain sa aquaculture.

Nakipag-ugnayan din ang samahan sa mga mamimili mula Casiguran, Sta. Magdalena, at Irosin, kabilang ang Poblacion Unified Fisherfolk Association (PUFA) ng Castilla, na ginamit ang bangus ng SMFA para sa paggawa ng tinapa at sardinas. Ipinapakita nito ang diwa ng kooperasyon at bayanihan sa pagitan ng mga samahan sa ilalim ng SAAD Program.

Samantala, nakatakda ang SMFA na mag-restock para sa ikaapat nilang cropping ngayong huling linggo ng Oktubre, gamit ang sarili nilang ipon bilang counterpart.

Ayon sa grupo, ang kanilang tagumpay ay bunga ng disiplina, pagkakaisa, at sama-samang pamumuno. Taos-puso rin nilang pinasalamatan ang BFAR-SAAD sa tuloy-tuloy na gabay, pagsasanay, at suporta, na naging susi sa kanilang matagumpay at napapanatiling kabuhayan.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚.