Siyəzən RİHB-nın Həmyə kənd İƏD üzrə nümayəndəliyi

26/05/2026

Azad edilmiş torpaqları istisna etsək, bu gün ölkə üzrə qazlaşmanın səviyyəsi 96 faizdir
İlham Əliyevin kənd təsərrüfatı məsələlərinə həsr olunmuş müşavirədə çıxışı zamanı səsləndirdiyi “Azad edilmiş torpaqları istisna etsək, bu gün ölkə üzrə qazlaşmanın səviyyəsi 96 faizdir” fikri Azərbaycanda həyata keçirilən genişmiqyaslı infrastruktur layihələrinin uğurlu nəticələrini əks etdirir. Bu göstərici ölkənin sosial-iqtisadi inkişafı və əhalinin həyat şəraitinin yaxşılaşdırılması istiqamətində görülən işlərin mühüm nailiyyətlərindən biridir.
Azərbaycanda qazlaşdırma layihələrinin genişləndirilməsi xüsusilə regionların inkişafında mühüm rol oynayır. Kənd və qəsəbələrin təbii qazla təmin olunması əhalinin yaşayış səviyyəsinin yüksəlməsinə, məişət şəraitinin yaxşılaşmasına və kənd təsərrüfatının inkişafına müsbət təsir göstərir. Bu siyasət regionlar arasında sosial bərabərliyin təmin olunmasına da xidmət edir.
Prezident İlham Əliyevin müşavirədə vurğuladığı kimi, qazlaşdırma səviyyəsinin yüksək olması dövlətin vətəndaşların rifahına göstərdiyi diqqətin göstəricisidir. Son illərdə həyata keçirilən layihələr nəticəsində minlərlə yaşayış məntəqəsi təbii qazla təmin edilmiş, müasir infrastruktur yaradılmışdır. Bu, həm də ekoloji baxımdan daha təhlükəsiz və rahat enerji təminatı deməkdir.
Azad edilmiş ərazilərdə aparılan bərpa və yenidənqurma işləri çərçivəsində də qazlaşdırma məsələsinə xüsusi diqqət yetirilir. Həmin ərazilərdə müasir standartlara uyğun infrastrukturun qurulması gələcəkdə ümumi qazlaşdırma səviyyəsinin daha da artmasına şərait yaradacaqdır. Bu proses regionların sosial-iqtisadi dirçəlişində mühüm rol oynayır.

24/05/2026

İstiqlal Bəyannaməsi xalqımızın müstəqillik hisslərini daha da gücləndirdi
Şərqdə və müsəlman aləmində ilk demokratik dövlət quruluşunu yaratmış Azərbaycan Xalq Cümhuriyyəti istiqlaliyyətimizi elan edərək, xalqımızın müstəqillik əzmini nümayiş etdirdi. 1918-ci il mayın 28-də Azərbaycan xalqı özünün və Şərqin ilk demokratik, hüquqi, dünyəvi və parlamentli respublikasını yaratdı.
Bu tarixdə Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan etmiş, xalqımızın çoxəsrlik dövlətçilik ənənələrini davam etdirmişdir. İstiqlal Bəyannaməsi xalqımızın müstəqillik hisslərini daha da gücləndirdi. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti öz müqəddəratını təyin etməyə qadir olduğunu nümayiş etdirdi. 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərmişdir. Qısa dövr ərzində Azərbaycanın ilk parlamenti, hökuməti yaradılmış, dövlət atributları təsis olunmuş, dövlət quruculuğu sahəsində mühüm tədbirlər həyata keçirilmiş, Cümhuriyyətin beynəlxalq münasibətlər sistemində tanınması, diplomatik müstəvidə milli maraqların qorunması istiqamətində mühüm addımlar atılmışdır. Yeni fəaliyyətə başlamış parlamentin qəbul etdiyi qanunlar milli müstəqilliyin möhkəmləndirilməsində, ölkədə siyasi, iqtisadi və mədəni inkişafın təmin olunmasında, habelə demokratik prinsiplərin təsbit edilməsində əsaslı rol oynamışdır.
Zamanın hökmü ilə ötən əsrin 90-cı illərində dövlət müstəqilliyini bərpa edən Azərbaycan Ermənistanın təcavüzü, xarici təzyiqlər və daxili çəkişmələr üzündən dünyanın siyasi xəritəsindən silinmək və dövlətçiliyini itirmək təhlükəsi ilə qarşılaşdı. Taleyimizin həll olunduğu ağır bir zamanda xalqın təkidli tələbinə səs verərək yenidən hakimiyyətə qayıdan Ulu Öndər Heydər Əliyev doğma Vətənin xilası naminə misilsiz fədakarlıq nümayiş etdirdi, ölkəmizi ictimai-siyasi pərakəndəliyin və anarxiyanın məngənəsindən qurtardı, bütün sahələrdə müşahidə olunan dərin tənəzzülün qarşısını aldı, yenidən qurduğu və hər cür qəsdlərdən qoruduğu dövlətin dayanıqlı inkişaf yolunu müəyyən etdi. Azərbaycan Ulu Öndər Heydər Əliyevin uğurlu siyasəti sayəsində dünyada tanınan nüfuzlu bir dövlətə çevrildi. Yalnız Ümummilli Liderin hakimiyyətə qayıdışından sonra Azərbaycan özünün geosiyasi imkanlarını gerçəkləşdirməyə başlamışdır. Azərbaycanın beynəlxalq aləmdən təcrid olunmaq təhlükəsi aradan qaldırıldı. Dünya siyasət meydanında cərəyan edən proseslərə təsir baxımından Ulu Öndər həmişə öz sözü və çəkisi ilə seçilmişdir. Heydər Əliyevin xarici siyasət məsələlərinə müstəsna əhəmiyyət verməsi, beynəlxalq miqyasda uğurlu və cəsarətli addımlar atması, milli məqsədlər naminə ən nüfuzlu tribunalardan bacarıq və məharətlə istifadə etməsi Azərbaycan dövlətçiliyinin bu günü və gələcəyi baxımından son dərəcə əhəmiyyətli olmuşdur.
Dahi şəxsiyyət Heydər Əliyevin şah əsəri olan müasir müstəqil Azərbaycan 2003-cü ildən Prezident İlham Əliyevin rəhbərliyi ilə daha möhtəşəm uğurlara imza atır. Bugünümüzün reallıqları bir daha təsdiqləyir ki, möhkəm təməl uğurların başlanğıcıdır. Eyni zamanda, bu reallıqlar onu da təsdiqləyir ki, müstəqilliyi qoruyub saxlamaq onu əldə etməkdən də çətindir. Müstəqilliyimizin bərpasının ilk illərində Azərbaycanın yaşadıqları tariximizin qaranlıq səhifəsi kimi daim vərəqlənir. Azərbaycan müstəqilliyini, bir dövlət kimi varlığını itirmək təhlükəsi ilə üz-üzə qalmışdır. Belə bir çətin vəziyyətdə hakimiyyətə qayıdan Ulu Öndər Heydər Əliyev müstəqilliyimizi tarixi nailiyyətimiz kimi dəyərləndirərək onu qorumağı, daha da möhkəmləndirməyi hər kəsin vətəndaşlıq borcu olduğunu bildirdi. Bu mühüm çağırışı səsləndirdi ki, müstəqilliyimizi, suverenliyimizi daimi etmək üçün harada yaşamasından asılı olmayaraq bütün dünya azərbaycanlılarından bir amal-azərbaycançılıq ideyası ətrafında sıx birləşmək tələb olunur.
Bu gün müasir müstəqil Azərbaycan həm də tarixi Zəfərinin yaratdığı reallıqlarla dünyanın diqqətindədir. 44 gündə 30 illik işğala son qoyan, 2023-cü ilin sentyabr ayında suverenliyini tam bərpa edən Azərbaycan nəyə qadir olduğunu bir daha sübut etdi. Qalib Azərbaycanın həyatında yeni dövr başlayıb. Atılan hər bir addım müstəqilliyimizin, ərazi bütövlüyümüzün qorunmasına, möhkəmləndirilməsinə xidmət edir. Ulu Öndər Heydər Əliyevin düşünülmüş və məqsədyönlü siyasəti nəticəsində müstəqilliyini daimi və sarsılmaz edən Azərbaycan hazırda Zəfərdən-Zəfərə inamla irəliləyir.

10/05/2026

01/05/2026

Bizim bayrağımız qaldırılanda bütün Azərbaycan xalqı qürur hissi keçirir, sevinir.
Azərbaycan Respublikasının dövlət bayrağı xalqımızın milli kimliyini, tarixini, müstəqilliyini və suverenliyini əks etdirən ən ali rəmzlərdən biridir. Dövlət Bayrağı Günü kimi rəsmi tarixlərin qeyd olunması da bu rəmzin xalqımız üçün nə qədər böyük əhəmiyyət daşıdığını göstərir. Xüsusilə beynəlxalq idman yarışlarında Azərbaycan bayrağının yüksəklərə qaldırılması, dövlət himninin səsləndirilməsi hər bir vətəndaş üçün böyük qürur və sevinc mənbəyidir. Bu qürur hissi ilk növbədə Azərbaycanın müstəqillik tarixindən qaynaqlanır. 1918-ci ildə Azərbaycan Xalq Cümhuriyyəti tərəfindən qəbul edilən üçrəngli bayraq milli dövlətçilik ənənələrinin rəmzi olmuş, 1991-ci ildə müstəqilliyin bərpasından sonra yenidən dövlət bayrağı kimi təsdiqlənmişdir. Bu tarixlər – 1918-ci il 9 noyabr və 1991-ci il 18 oktyabr – xalqımızın yaddaşında xüsusi yer tutur və bayrağa olan sevgi və bağlılığın əsasını təşkil edir. Beynəlxalq arenada əldə olunan uğurlar zamanı bayrağımızın yüksəklərə qaldırılması isə bu hissləri daha da gücləndirir. Məsələn, 2016-cı ildə Rio Yay Olimpiya Oyunları 2016 zamanı Azərbaycan idmançıları tərəfindən qazanılan medallar nəticəsində bayrağımız dəfələrlə ucaldılmış, bu anlar milyonlarla insan tərəfindən izlənilmişdir. Eyni hal 2020-ci ildə İkinci Qarabağ müharibəsi nəticəsində torpaqlarımızın azad olunması ilə də müşahidə olunmuş, azad edilmiş ərazilərdə bayrağımızın qaldırılması xalqımız üçün tarixi və mənəvi zəfər rəmzinə çevrilmişdir. Hər il keçirilən beynəlxalq yarışlarda – Avropa və dünya çempionatlarında, Olimpiya oyunlarında – Azərbaycan idmançılarının qazandığı uğurlar nəticəsində bayrağımızın yüksəlməsi milli birliyi və həmrəyliyi gücləndirir. Bu anlar yalnız idman uğuru deyil, həm də dövlətin gücünün, xalqın əzminin və vətənə bağlılığın ifadəsidir. Xüsusilə gənc nəsil üçün bu görüntülər vətənpərvərlik hisslərinin formalaşmasında mühüm rol oynayır. Bayrağımızın ucaldılması yalnız rəsmi tədbirlərlə məhdudlaşmır. Dövlət bayramlarında, hərbi paradlarda, beynəlxalq tədbirlərdə və hətta gündəlik həyatda belə bu rəmzə göstərilən hörmət xalqımızın milli dəyərlərə sadiqliyini nümayiş etdirir. Bu baxımdan bayraq təkcə parça deyil, xalqın tarixini, mübarizəsini və gələcəyə olan ümidlərini özündə birləşdirən müqəddəs simvoldur. Azərbaycan bayrağı qaldırılan hər bir an xalqımız üçün qürur, sevinc və fəxarət anıdır. Bu hisslər tariximizdən, qazandığımız qələbələrdən və gələcəyə olan inamımızdan qaynaqlanır. Bayrağımızın hər yüksəlişi Azərbaycanın gücünün, müstəqilliyinin və milli ruhunun parlaq təcəssümüdür.

28/04/2026

SOCAR Ukraynada uzun illərdir ki, uğurla fəaliyyət göstərir.
Azərbaycan Prezidenti İlham Əliyevin Ukrayna Prezidenti Volodimir Zelenskinin aprelin 25-də Azərbaycana səfəri zamanı mətbuata verdiyi bəyanatda iki ölkə arasında əməkdaşlığın əsas istiqamətləri geniş şəkildə əksini tapdı. Dövlət başçısı vurğuladı ki, Azərbaycan ilə Ukrayna arasında siyasi dialoq yüksək səviyyədə davam edir və qarşılıqlı etimada əsaslanır. Bu dialoq yalnız siyasi sahə ilə məhdudlaşmır, eyni zamanda iqtisadi və strateji istiqamətlərdə də özünü göstərir.
Prezident İlham Əliyev xüsusilə energetika sahəsində əməkdaşlığın əhəmiyyətinə diqqət çəkərək qeyd etdi ki, bu sahədə artıq mühüm nailiyyətlər əldə olunub. Azərbaycanın dövlət neft şirkəti SOCAR uzun illərdir Ukraynada uğurla fəaliyyət göstərir və bu, iki ölkə arasında iqtisadi əlaqələrin möhkəm təməllər üzərində qurulduğunu göstərir. Bununla yanaşı, gələcək üçün də geniş imkanların mövcud olduğu bildirildi. Birgə layihələr, yeni təşəbbüslər və qarşılıqlı sərmayə qoyuluşu məsələləri görüş zamanı ətraflı müzakirə olunub.
Dövlət başçısı qeyd etdi ki, mövcud əməkdaşlıq potensialı hələ tam reallaşdırılmayıb və qarşıda yeni imkanlar açılır. Xüsusilə energetika, nəqliyyat və infrastruktur sahələrində tərəfdaşlığın genişləndirilməsi üçün əlverişli şərait mövcuddur. Bu istiqamətdə atılacaq addımlar həm Azərbaycan, həm də Ukrayna üçün iqtisadi fayda gətirəcək.
Bəyanatda ticarət dövriyyəsinin artırılması məsələsi də xüsusi yer tutdu. Hazırda iki ölkə arasında ticarət dövriyyəsi yarım milyard dolları ötüb. Prezident İlham Əliyev ümidvar olduğunu bildirdi ki, yaxın illərdə bu rəqəm daha da artacaq. Onun sözlərinə görə, bunun üçün kifayət qədər potensial və imkanlar mövcuddur. Qarşılıqlı iqtisadi maraqların uzlaşdırılması və yeni bazar imkanlarının araşdırılması bu artımı stimullaşdıra bilər.
Prezident İlham Əliyevin bəyanatı Azərbaycan ilə Ukrayna arasında münasibətlərin dinamik inkişaf etdiyini və gələcəkdə daha da genişlənəcəyini göstərir. Energetika sahəsində mövcud uğurlar və planlaşdırılan layihələr bu əməkdaşlığın əsas dayaqlarından biri olaraq qalır. Bununla yanaşı, digər sahələrdə də əməkdaşlığın dərinləşdirilməsi üçün geniş perspektivlər mövcuddur.

07/04/2026

Cənubi Qafqaz regionunda sabitliyin, təhlükəsizliyin və iqtisadi əməkdaşlığın təmin olunmasında mühüm rol oynayan dövlətlərdən biri Azərbaycan Respublikasıdır. Müstəqillik dövründə Azərbaycan regionun geosiyasi və geoiqtisadi xəritəsində aparıcı aktorlardan birinə çevrilmiş, həyata keçirdiyi uğurlu daxili və xarici siyasət nəticəsində beynəlxalq münasibətlər sistemində nüfuzunu əhəmiyyətli dərəcədə artırmışdır. Bu kontekstdə Azərbaycan Respublikasının qonşu dövlətlərlə, xüsusilə də dost və qardaş Gürcüstan ilə münasibətləri xüsusi əhəmiyyət kəsb edir.
Azərbaycan ilə Gürcüstan arasında münasibətlər tarixən mehriban qonşuluq, qarşılıqlı hörmət və strateji tərəfdaşlıq prinsiplərinə əsaslanmışdır. İki ölkə arasında siyasi dialoq, iqtisadi əməkdaşlıq, enerji təhlükəsizliyi, nəqliyyat-kommunikasiya layihələri və regional təhlükəsizlik məsələləri üzrə əməkdaşlıq illər ərzində davamlı şəkildə inkişaf etmişdir. Bu münasibətlər təkcə ikitərəfli əməkdaşlıqla məhdudlaşmır, eyni zamanda regionun sabitliyi və Avrasiya məkanında yeni iqtisadi əlaqələrin formalaşması baxımından da mühüm rol oynayır.
Bu baxımdan Azərbaycan Respublikasının Prezidenti İlham Əliyevin 2026-cı il aprelin 6-da Gürcüstana etdiyi dövlət səfəri iki ölkə arasında strateji tərəfdaşlığın daha da möhkəmləndirilməsi baxımından xüsusi əhəmiyyət daşıyır. Səfər çərçivəsində dövlət başçısı Tbilisidə keçirilən görüşlər zamanı Gürcüstan rəhbərliyi ilə ikitərəfli münasibətlərin cari vəziyyətini və gələcək inkişaf perspektivlərini müzakirə etmiş, həmçinin mətbuata verdiyi bəyanatda Azərbaycan-Gürcüstan əməkdaşlığının mühüm aspektlərinə toxunmuşdur.
Prezident İlham Əliyev mətbuata bəyanatında Gürcüstana səfərindən məmnunluğunu ifadə edərək vurğulamışdır ki, “yenidən qardaş Gürcüstanda olmaq mənim üçün böyük şərəfdir”. Dövlət başçısı iki ölkə arasında mövcud olan dostluq və tərəfdaşlıq münasibətlərinin region üçün mühüm əhəmiyyət daşıdığını diqqətə çatdırmışdır.
Prezident İlham Əliyev Gürcüstanın son illərdə əldə etdiyi uğurlara da xüsusi diqqət yetirərək qeyd etmişdir ki, “Gürcüstanın dinamik iqtisadi inkişafı göz önündədir”. Onun sözlərinə görə, bu inkişaf həm regionun iqtisadi potensialının artmasına, həm də iki ölkə arasında iqtisadi əməkdaşlığın genişlənməsinə yeni imkanlar yaradır. İki ölkə arasında ali səviyyədə təşəkkül tapmış fəal siyasi dialoq ikitərəfli əməkdaşlığımızın təhlükəsizlik, müdafiə, iqtisadi, ticarət, enerji, nəqliyyat-logistika, turizm, mədəni-humanitar və digər sahələrində əldə olunmuş ciddi nəaliyyətlərin əsasını təşkil edir.
Azərbaycan və Gürcüstanın beynəlxalq müstəvidə də bir-birini daim dəstəklədiyini vurğulayan dövlət başçısı bildirmişdir: “Biz bütün beynəlxalq təşkilatlarda da hər zaman bir-birimizi dəstəkləyirik.” Prezident qeyd etmişdir ki, iki ölkə qarşılıqlı şəkildə bir-birinin suverenliyini, ərazi bütövlüyünü və sərhədlərinin toxunulmazlığını dəstəkləyir və bu prinsipial mövqe gələcəkdə də davam etdiriləcəkdir.
Azərbaycan-Gürcüstan əməkdaşlığının mühüm istiqamətlərindən biri iqtisadi sahədir. Prezident İlham Əliyev çıxışında bu sahədə əldə edilən nəticələri yüksək qiymətləndirərək bildirmişdir ki, iki ölkə iqtisadi əməkdaşlıq sahəsində böyük uğurlar əldə etmişdir. Bu əməkdaşlıq xüsusilə enerji və nəqliyyat layihələri vasitəsilə regionun iqtisadi inkişafına mühüm töhfə verir.
Məlum olduğu kimi, Azərbaycan və Gürcüstan birgə həyata keçirdikləri iri infrastruktur və enerji layihələri ilə Avrasiyanın enerji və nəqliyyat xəritəsinin formalaşmasında mühüm rol oynayırlar. Bu layihələr regionun enerji təhlükəsizliyinin təmin olunmasına və yeni iqtisadi əlaqələrin yaranmasına əhəmiyyətli təsir göstərir.
Prezident İlham Əliyev bəyanatında həmçinin qeyd etmişdir ki, hazırda Cənubi Qafqaz regionunda yeni geosiyasi reallıqlar formalaşır. Onun sözlərinə görə, “bu gün Cənubi Qafqazda tamamilə yeni vəziyyət yaranmaqdadır” və bu şəraitdə region ölkələri arasında əməkdaşlıq və qarşılıqlı etimad daha böyük əhəmiyyət kəsb edir.
Enerji təhlükəsizliyi məsələsinə toxunan dövlət başçısı vurğulamışdır ki, Azərbaycan uzun illərdir beynəlxalq enerji bazarında etibarlı tərəfdaş kimi tanınır. Prezident qeyd etmişdir ki, “Azərbaycan energetika sahəsində uzun illər bir çox ölkələrin enerji təhlükəsizliyini gücləndirən addımlar atmışdır”. Bu siyasət nəticəsində Azərbaycan Avropa və digər regionlar üçün etibarlı enerji mənbəyinə çevrilmişdir.
Ümumilikdə, Prezident İlham Əliyevin Gürcüstana səfəri və mətbuata verdiyi bəyanat bir daha göstərir ki, Azərbaycan-Gürcüstan münasibətləri strateji tərəfdaşlıq səviyyəsində inkişaf etməkdədir. İki ölkə arasında siyasi dialoqun yüksək səviyyədə olması, iqtisadi və enerji layihələrinin uğurla həyata keçirilməsi, eləcə də beynəlxalq təşkilatlar çərçivəsində qarşılıqlı dəstək regionda sabitlik və inkişaf üçün mühüm zəmin yaradır.
Bu baxımdan Azərbaycan ilə Gürcüstan arasında formalaşmış möhkəm dostluq və əməkdaşlıq münasibətlərinin gələcəkdə daha da genişlənəcəyi və regionun inkişafına yeni töhfələr verəcəyi şübhə doğurmur.

31/03/2026

Dinc əhaliyə qarşı törədilmiş cinayətlər – Tariximizin qanlı səhifəsi
1918-ci ilin mart–aprel aylarında baş vermiş 1918-ci il Mart soyqırımı Azərbaycan xalqına qarşı həyata keçirilmiş ən dəhşətli faciələrdən biri kimi tarixə həkk olunmuşdur. Bu hadisələr zamanı minlərlə günahsız insan yalnız milli və dini mənsubiyyətinə görə amansızcasına qətlə yetirilmiş, yaşayış məntəqələri yerlə-yeksan edilmişdir.
Xüsusilə Bakı şəhərində baş verən qırğınlar misli görünməmiş qəddarlıqla həyata keçirilmişdir. Bununla yanaşı, Şamaxı, Quba, Salyan, Lənkəran və digər bölgələrdə də dinc əhaliyə qarşı genişmiqyaslı hücumlar təşkil olunmuşdur.
Bu qanlı hadisələr zamanı:
▪️ On minlərlə insan qətlə yetirilmiş, bütöv ailələr məhv edilmişdir
▪️ Qadınlar, uşaqlar və qocalar xüsusi qəddarlıqla öldürülmüşdür
▪️ İnsanlara işgəncələr verilmiş, bədən üzvləri kəsilmiş, ağır fiziki xəsarətlər yetirilmişdir
▪️ Məscidlər, evlər, məktəblər və tarixi-mədəni abidələr yandırılmış və dağıdılmışdır
▪️ Minlərlə insan öz doğma yurd-yuvasından didərgin salınmışdır
Bu hadisələr yalnız bir xalqın deyil, bütün bəşəriyyətin mənəvi dəyərlərinə qarşı törədilmiş ağır cinayətlərdən biri kimi qiymətləndirilir. Tarixi faktlar göstərir ki, bu faciə planlı şəkildə həyata keçirilmiş və məqsəd Azərbaycan əhalisini məhv etmək olmuşdur.
Bu gün bizim borcumuz həmin hadisələri unutmaq deyil, əksinə, gələcək nəsillərə çatdırmaq, tariximizi qorumaq və bu kimi faciələrin bir daha təkrarlanmaması üçün yaddaşımızda yaşatmaqdır.
🕯️ 1918-ci il mart-aprel qırğınlarının qurbanlarını dərin hüzn və ehtiramla yad edir, onların xatirəsini daim uca tuturuq.

13/03/2026

Bakıda baş tutan yüksək səviyyəli görüşlər bir daha göstərdi ki, Azərbaycanla Avropa arasında münasibətlər artıq sadə diplomatik əlaqələr çərçivəsindən çıxaraq genişmiqyaslı strateji tərəfdaşlıq mərhələsinə qədəm qoyub. Azərbaycan Respublikasının Prezidenti İlham Əliyev ilə Antonio Koşta arasında keçirilən görüş və səsləndirilən bəyanatlar təkcə iki tərəf arasında münasibətlərin hazırkı vəziyyətini deyil, həm də gələcək istiqamətlərini aydın şəkildə ortaya qoydu.
Azərbaycan ilə Avropa İttifaqı arasında əməkdaşlıq bu gün müxtəlif səviyyələrdə fəal mərhələyə daxil olub. Son illərdə qarşılıqlı səfərlərin intensivləşməsi, siyasi dialoqun dərinləşməsi və iqtisadi əlaqələrin genişlənməsi tərəflər arasında formalaşan etimadın bariz göstəricisidir. Xüsusilə ticarət göstəriciləri bu dinamikanın real iqtisadi təzahürüdür. Cari ilin yanvar ayında Azərbaycanın ümumi ticarət dövriyyəsinin təxminən yarısının Avropa İttifaqı ilə bağlı olması Aİ-nin ölkəmiz üçün əsas ticarət tərəfdaşı statusunu bir daha təsdiqləyir. Bu fakt yalnız statistik göstərici deyil, həm də Azərbaycan iqtisadiyyatının Avropa bazarı ilə sıx inteqrasiyasının göstəricisidir.
Bu tərəfdaşlığın ən mühüm sütunlarından biri enerji əməkdaşlığıdır. Azərbaycanın Avropanın enerji təhlükəsizliyində oynadığı rol son illərdə daha da artıb. 2022-ci ildə Avropa Komissiyası ilə imzalanmış enerji sahəsində Strateji Tərəfdaşlıq sənədi bu istiqamətdə yeni mərhələnin başlanğıcı oldu. Həmin vaxtdan etibarən Azərbaycan qazının Avropaya ixracı həm həcminə, həm də coğrafiyasına görə genişlənib. Bu gün Avropa İttifaqının 10 üzv dövləti Azərbaycandan qaz alır və ümumilikdə 16 ölkə Azərbaycan qazı ilə təmin olunur. Bu göstərici ölkəmizi boru kəmərləri vasitəsilə qaz təchizatı sahəsində dünyada aparıcı mövqeyə çıxaran amillərdən biridir.
Enerji əməkdaşlığının genişlənməsi yalnız mövcud ehtiyatların ixracı ilə məhdudlaşmır. Azərbaycan yaxın illərdə qaz hasilatını daha da artırmağı planlaşdırır. Yeni yataqların istismara verilməsi nəticəsində növbəti iki-üç il ərzində mövcud həcmə əlavə olaraq ən azı 10 milyard kubmetr qaz hasilatı gözlənilir. Bu isə həm Avropa bazarının enerji ehtiyaclarının qarşılanmasına, həm də Azərbaycanın enerji ixracatçısı kimi mövqeyinin daha da güclənməsinə imkan yaradacaq.
Eyni zamanda enerji əməkdaşlığı yeni və strateji bir istiqamət – bərpaolunan enerji sahəsi ilə də zənginləşir. Azərbaycan öz təbii-coğrafi üstünlüklərindən istifadə edərək külək, Günəş və su elektrik enerjisinin inkişafına böyük sərmayələr yatırır. Ölkənin iqlim şəraiti bu sahədə böyük potensial yaradır: ildə 300-dən çox günəşli gün və geniş külək resursları Azərbaycanın gələcəkdə yaşıl enerji ixracatçılarından birinə çevrilə biləcəyini göstərir. Hədəf yaxın beş-altı il ərzində ixrac üçün hazır olan 6-8 giqavat gücündə bərpaolunan enerji potensialının formalaşdırılmasıdır. Bu isə Avropa ilə enerji əməkdaşlığını daha da şaxələndirəcək və qitənin yaşıl enerji strategiyasına mühüm töhfə verəcək.
Enerji və iqtisadi əlaqələrlə yanaşı, regionda sülh və sabitliyin təmin olunması da Azərbaycan-Aİ münasibətlərinin mühüm gündəliyində yer tutur. Prezident İlham Əliyevin vurğuladığı kimi, Azərbaycan cəmi yeddi aydır ki, tam sülh şəraitində yaşayır. Ermənistanla əldə olunmuş sülh razılaşması regionun gələcəyi üçün yeni imkanlar açır. Uzun illər davam edən münaqişədən sonra formalaşan bu reallıq yalnız iki ölkə üçün deyil, bütövlükdə Cənubi Qafqaz üçün yeni inkişaf mərhələsinin başlanğıcıdır.
Sülhün real nəticələri artıq hiss olunmağa başlayıb. Azərbaycan Ermənistanla iqtisadi və nəqliyyat əlaqələrinin normallaşması istiqamətində konkret addımlar atır. Ermənistana neft məhsullarının təchizatına başlanılması və Azərbaycan ərazisindən tranzit yüklər üçün bütün məhdudiyyətlərin aradan qaldırılması regionda qarşılıqlı etimadın bərpası üçün mühüm addım kimi qiymətləndirilə bilər. Bu siyasət Azərbaycanın sülhə yalnız diplomatik sənədlərlə deyil, real addımlarla sadiq olduğunu göstərir.
Bu yeni geosiyasi reallıq nəqliyyat və logistika sahəsində də mühüm perspektivlər açır. Xüsusilə Orta Dəhlizin inkişafı Avropa ilə Asiya arasında strateji bağlantı yaradır. Azərbaycanın bu layihədə oynadığı rol təkcə regional deyil, qlobal miqyasda əhəmiyyət daşıyır. Qara dəniz, Cənubi Qafqaz və Mərkəzi Asiyanı birləşdirən bu marşrut Avropa ilə Asiya arasında ticarətin daha sürətli və təhlükəsiz həyata keçirilməsinə imkan verir.
Bütün bu proseslər Azərbaycanla Avropa arasında münasibətlərin yalnız iqtisadi və enerji sahələri ilə məhdudlaşmadığını göstərir. Təhlükəsizlik, rəqəmsal transformasiya, innovasiya, təhsil və humanitar əməkdaşlıq kimi sahələr də tərəfdaşlığın mühüm istiqamətlərinə çevrilir. Terrorizm, mütəşəkkil cinayətkarlıq, insan alveri və qeyri-qanuni miqrasiya kimi qlobal çağırışlara qarşı birgə mübarizə də əməkdaşlığın prioritet mövzuları sırasındadır.
Bu münasibətlərin tarixi isə daha qədimdir və Azərbaycanın Avropa strukturları ilə inteqrasiyasının mühüm mərhələlərindən biri Avropa Şurası ilə əməkdaşlıqdır. 2001-ci ildə Azərbaycanın bu təşkilata tamhüquqlu üzv qəbul olunması ölkənin Avropa siyasi məkanına inteqrasiyasında mühüm dönüş nöqtəsi oldu. Bu üzvlük insan hüquqları, demokratiya və qanunun aliliyi sahələrində həyata keçirilən islahatların beynəlxalq əməkdaşlıq müstəvisində dəstəklənməsinə imkan yaratdı.

13/03/2026

12 mart 2026-cı ildə Azərbaycan Respublikasının Prezidenti İlham Əliyev Bakıda keçirilən XIII Qlobal Bakı Forumunun açılış mərasimində çıxış edib. Forum Nizami Gəncəvi Beynəlxalq Mərkəzinin təşkilatçılığı ilə “Keçid dövründə olan dünyada fikir ayrılıqlarının aradan qaldırılması” mövzusuna həsr olunub və beynəlxalq siyasətçiləri, ekspertləri və ictimai xadimləri bir araya gətirib.
Dövlət başçısı vurğulayıb ki, indi heç vaxt olmadığı qədər aydındır ki, təhlükəsizlik, sabitlik və müdafiə məsələləri hər bir ölkənin gündəliyində bir nömrəli prioritet olmalıdır. Çünki bunlar olmadan qalan bütün məsələlər tamamilə mənasızdır. İnkişaf üçün illərlə, hətta onilliklərlə investisiya qoymuş ölkələr indi risklərlə üz-üzədir. Buna görə də təhlükəsizlik və sabitlik səylərimizi birləşdirməli olduğumuz əsas amil olmalıdır. Hər zaman Azərbaycanın bölgədə və dünyada təhlükəsiz, sabit, əmin-aman bir şəraitin bərpa olunması, davam etməsinə tərəfdar olduğunu və bunun üçün bütün səylərini bu günə qədər olduğu kimi, bundan sonra da davam etdirəcəyini bildirdi. Regional təhlükəsizlik Azərbaycan üçün hər zaman bir nömrəli məsələ olub. Çünki işğal dövründə dəfələrlə qeyd etdiyim kimi, bizim üçün sülhün təmin olunması və suverenliyimizin bərpası gündəliyimizin əsas məsələsi idi.
Hazırda cəmi 7 aydır ki, biz sülh şəraitində yaşayırıq. Bu, bir daha onu göstərir ki, sülhə nail olmaq üçün zəruridir olan güclü siyasi iradə var, sülh və ədalət sahəsində bir sadiqlik var.
Prezident çıxışında Azərbaycanın uzun illər Ermənistanla münaqişə şəraitində yaşadığını və ərazilərinin bir hissəsinin işğal altında qaldığını xatırladıb. O qeyd edib ki, Azərbaycan öz suveren hüququndan istifadə edərək ərazi bütövlüyünü bərpa edib; müharibədən sonra regionda sülh və sabitliyin təmin olunması istiqamətində addımlar atılır.
Müasir dövrdə beynəlxalq münasibətlər sistemi müxtəlif siyasi, iqtisadi və hərbi gərginliklər səbəbindən ciddi sınaqlarla üz-üzə qalır. Dünyanın müxtəlif regionlarında baş verən münaqişələr, qlobal təhlükəsizlik problemləri və geosiyasi rəqabət dövlətlərin fəaliyyətinə birbaşa təsir göstərir. Buna görə də təhlükəsizlik və sabitliyin qorunması hər bir dövlət üçün əsas prioritetə çevrilməlidir. Dövlətlər ilk növbədə öz ərazilərində sabitliyi təmin etməli, vətəndaşların təhlükəsizliyini qorumaq üçün güclü siyasi və hüquqi mexanizmlər formalaşdırmalıdırlar. Təhlükəsizlik və sabitlik olmadan ölkədə normal iqtisadi mühitin yaranması mümkün deyil. Eyni zamanda beynəlxalq əməkdaşlıq, dövlətlər arasında etibarlı münasibətlərin qurulması və müxtəlif sahələrdə birgə layihələrin həyata keçirilməsi də təhlükəsiz və sabit mühit tələb edir. Buna görə də müasir dünyada davamlı inkişafın təmin olunması üçün təhlükəsizlik və sabitliyin qorunması xüsusi əhəmiyyət daşıyır.

08/03/2026

Şərqdə ilk dəfə Azərbaycanda qadınlara seçib-seçilmək hüququ verilib

Azərbaycan qadınlarının hüquqlarının təmin olunması və onların cəmiyyət həyatında fəal iştirak etməsi istiqamətində tarix boyu mühüm addımlar atılmışdır. Bu baxımdan Azərbaycan xalqı Şərq dünyasında mühüm bir tarixi yeniliyə imza atmışdır. Belə ki, Şərqdə ilk dəfə olaraq qadınlara seçib-seçilmək hüququ məhz Azərbaycanda verilmişdir. Bu hadisə Azərbaycanın demokratik ənənələrinin və insan hüquqlarına hörmətinin bariz göstəricisi kimi tarixə düşmüşdür. 1918-ci ildə yaradılmış Azərbaycan Xalq Cümhuriyyəti Şərqin ilk demokratik respublikası kimi bir çox mühüm islahatlara imza atmışdır. Bu islahatlar sırasında qadınlara seçki hüququnun verilməsi xüsusi yer tutur. Azərbaycan Xalq Cümhuriyyəti qadınların hüquqlarının təmin olunması istiqamətində mühüm qərarlar qəbul etmiş və onların ictimai-siyasi həyatda fəal iştirak etməsinə şərait yaratmışdır. Qadınlara seçib-seçilmək hüququnun verilməsi cəmiyyətin demokratik inkişafına mühüm töhfə vermişdir. Bu qərar təkcə Azərbaycan üçün deyil, bütövlükdə Şərq dünyası üçün böyük əhəmiyyət kəsb etmişdir. Hətta bəzi inkişaf etmiş Avropa ölkələrində qadınlara seçki hüququ daha gec verildiyi halda, Azərbaycanda bu hüququn tanınması ölkənin demokratik dəyərlərə sadiqliyini nümayiş etdirmişdir. Bu addım Azərbaycan cəmiyyətində qadınlara göstərilən hörmət və etimadın göstəricisi kimi də böyük əhəmiyyət daşıyır.

Qadınlara seçki hüququnun verilməsi onların ictimai-siyasi həyatdakı rolunun artmasına və dövlət idarəçiliyində daha fəal iştirak etməsinə imkan yaratmışdır. Qadınlar müxtəlif dövlət qurumlarında, parlamentdə və digər ictimai strukturlarda fəaliyyət göstərərək ölkənin inkişafına mühüm töhfələr verməyə başlamışlar. Müstəqillik illərində də qadınların hüquqlarının qorunması və onların cəmiyyət həyatında rolunun artırılması dövlət siyasətinin əsas istiqamətlərindən biri olmuşdur. Bu sahədə həyata keçirilən tədbirlər qadınların ictimai-siyasi həyatda fəallığının artmasına və onların müxtəlif sahələrdə uğurlar qazanmasına şərait yaratmışdır. Bu gün Azərbaycan qadınları dövlət idarəçiliyində, parlamentdə, elmi və mədəni sahələrdə, iqtisadiyyatın müxtəlif istiqamətlərində fəal iştirak edərək ölkənin inkişafına öz töhfələrini verirlər. Onların fəaliyyəti Azərbaycan cəmiyyətinin inkişafında mühüm rol oynayır və dövlətin tərəqqisinə xidmət edir. Şərqdə ilk dəfə olaraq Azərbaycanda qadınlara seçib-seçilmək hüququnun verilməsi ölkəmizin demokratik tarixində mühüm mərhələ olmuşdur. Bu qərar qadınların cəmiyyət həyatındakı rolunun güclənməsinə və onların dövlət quruculuğu prosesində fəal iştirak etməsinə geniş imkanlar yaratmışdır.