Prof. Salim Alio Ibro

02/06/2026

Geneva waxaan kulan wax-ku-ool ah kula yeeshay Mudane Naser Alhayen, Safiirka Dowladda Kuwait ee Qaramada Midoobay iyo Hay’adaha Kale ee Caalamiga ah ee fadhigoodu yahay Geneva.

Intii uu kulanku socday, waxaan is dhaafsanay aragtiyo ku saabsan sidii loo sii xoojin lahaa xiriirka iyo iskaashiga u dhexeeya Soomaaliya iyo Kuwait, gaar ahaan arrimaha shaqada, horumarinta xirfadaha iyo abuurista fursado shaqo oo dheeraad ah.

Waxaan aad u qadarinayaa doorka Dowladda Kuwait ay ka qaadato taageerada Soomaaliya iyo dadaallada horumarineed ee ka socda dalkeenna. Waxaa naga go’an inaan sii xoojinno wada-shaqeynta ku dhisan is-ixtiraam, dan wadaag iyo xiriirka qotada dheer ee ka dhexeeya labada dal ee walaalaha ah.

Waxaan kalsooni ku qabaa in wada-hadalladan iyo xiriirrada noocan oo kale ahi ay door muhiim ah ka qaadan doonaan horumarinta iskaashiga labada dal iyo kor u qaadista fursadaha ay ka faa’iideysanayaan shacabkeenna.

01/06/2026

Farxad weyn ayay ii tahay inaan maanta ka qeyb galo furitaanka Shirweynaha 114-aad ee International Labour Conference (ILC 2026) oo ka socda Xarunta Qaramada Midoobay ee Geneva, Switzerland.

Waxaan hoggaaminayaa wafdi saddex geesood ah oo ka socda Soomaaliya, kana kooban Dowladda Federaalka Soomaaliya, ururrada shaqaalaha ee FESTU, iyo wakiillo ka socda Rugta Ganacsiga Soomaaliyeed. Shirkan muhiimka ah ayaa fursad u ah in aan kor u qaadno codka Soomaaliya, isla markaana aan xoojinno iskaashiga caalamiga ah ee ku saabsan shaqada, xuquuqda shaqaalaha, iyo horumarinta fursadaha shaqo.

Waxaan rajeynayaa in doodaha iyo go’aannada ka soo baxa shirkan ay wax weyn ka tari doonaan horumarinta suuqa shaqada iyo caddaaladda bulshada ee dalkeenna iyo dunidaba.

📍 Geneva, Switzerland

27/05/2026

Waxaan shacabka Soomaaliyeed meel kasta oo ay joogaan ugu hambalyeynayaa munaasabadda barakeysan ee Ciidul Adxaa. Ciiddaan ciiddeeda, Alle ha inagu gaarsiiyo nabad, caafimaad, barwaaqo iyo horumar.

Ciid Mubaarak 🌙
— Prof. Salim Alio Ibro—

19/05/2026

Waxaan maanta xafiiskeyga ku qaabilay wafdi ka socday Kozuva Group of Companies, oo ay ka mid tahay shirkadda FAVORI ee maamusha Garoonka Diyaaradaha Aadan Cadde ee Muqdisho.

Kulanka waxaan diiradda ku saarnay xoojinta iskaashiga shaqo, ilaalinta xuquuqda shaqaalaha, iyo horumarinta jawi shaqo oo nabdoon, ammaan ah, isla markaana waafaqsan shuruucda dalka.

Sidoo kale, waxaan ka wada hadalnay arrimo shaqo oo dhawaan ka dhacay Garoonka Diyaaradaha Aadan Cadde, iyadoo la isku raacay muhiimadda ay leedahay hirgelinta buuxda ee Xeerka Shaqada Soomaaliyeed (Xeer Lr. 36), kor u qaadista wacyigelinta shaqaalaha, iyo xoojinta wada shaqeynta u dhexeysa Wasaaradda iyo shirkadaha ka hawlgala dalka.

Waxaan markale adkeynay sida ay nooga go’an tahay ilaalinta xuquuqda shaqaalaha Soomaaliyeed iyo dhisidda xiriir shaqo oo ku saleysan wada-faham, caddaalad iyo kalsooni.

04/05/2026

Nairobi, Kenya – 3 May 2026

Maanta waxaan si rasmi ah u furay kulanka Implementation Support Mission for BOOST YOU (Baxnaano) oo ka socda Nairobi, kaas oo socon doona muddo hal toddobaad ah si loo dardargeliyo howlaha muhiimka ah ee barnaamijka.

Kulankan wuxuu muhiim u yahay xoojinta iskaashiga Dowladda Federaalka Soomaaliya iyo bah-wadaagta horumarinta, si loo hubiyo in barnaamijka Baxnaano uu sii gaarsiiyo taageero wax ku ool ah bulshada nugul ee Soomaaliyeed.

Waxaan kulanka kula wadaagnay bah-wadaagta, oo ay ka mid yihiin Bangiga Adduunka (World Bank), WFP iyo Maareeyaha Mashruuca BOOST YOU Baxnaano Fardosa Ahmed, horumarka la gaaray iyo sida aan u sii xoojin karno dadaallada socda.

Waxaa naga go’an in aan sii xoojino dadaallada lagu horumarinayo nidaamka ilaalinta bulshada, si loo gaaro horumar waara oo ay ka faa’iideystaan dhammaan shacabka Soomaaliyeed.

01/05/2026

Maanta oo ah Maalinta Shaqaalaha Adduunka, waxaan hambalyo u dirayaa dhammaan shaqaalaha Soomaaliyeed meel kasta oo ay joogaan.

Shaqaaluhu waa laf-dhabarta horumarka dalka, Wasaaradduna waxaa ka go’an ilaalinta xuquuqdooda iyo abuurista fursado shaqo oo sharaf leh.

Aan sii xoojino wada-shaqeynta si aan u gaarno horumar waara.

Shaqo Wanaagsan, Bulsho Horumarsan.

————————————————————
Prof. Salim Alio Ibro
Wasiirka Shaqada iyo Arrimaha Bulshada

26/04/2026

Waxaan maanta si rasmi ah u furay aqoon-is-weydaarsi qaran oo ku saabsan Siyaasadda Qaran ee Socdaalka Shaqada iyo Xeerka Shirkadaha Shaqo-siinta ee Gaarka loo leeyahay, kaas oo ka qabsoomay magaalada Muqdisho.

Kulankan wuxuu muhiim u yahay xoojinta hirgelinta siyaasadaha shaqada, ilaalinta xuquuqda shaqaalaha Soomaaliyeed gudaha iyo dibadda, iyo dhisidda iskaashi wax ku ool ah oo u dhexeeya dowladda, loo shaqeeyayaasha iyo shaqaalaha.

Waxaan uga mahadcelinayaa dhammaan daneeyayaasha, gaar ahaan International Labour Organization (ILO), Dowladda Boqortooyada Ingiriiska, Xiriirka Ururrada Shaqaalaha Soomaaliyeed (FESTU) iyo Rugta Ganacsiga iyo Warshadaha Soomaaliyeed (SCCI) taageeradooda iyo doorkooda muhiimka ah.

19/04/2026

Maanta waxaan xarunta Wasaaradda Shaqada iyo Arrimaha Bulshada ku qaabilay wafdi ka socday Hay’adda SOS oo uu hoggaaminayay Agaasimaha Hay’adda, Mudane Cabdulqaadir Dakane, iyadoo uu kulanka qeyb ka ahaa Lataliye Sare oo ka tirsan Wasaaradda.

Kulanka waxaan diiradda ku saarnay xoojinta iskaashiga, taageerada bulshada nugul, horumarinta xirfadaha dhalinyarada, iyo abuurista fursado shaqo oo waara.

Waxaan adkeynay muhiimadda ay leedahay wada-shaqeyn dhab ah oo u dhexeysa dowladda iyo hay’adaha la shaqeeya si loo gaaro horumar muuqda oo bulshada Soomaaliyeed ka faa’iideysato.

11/04/2026

08/04/2026

Waxaa sharaf ii ah inaan maanta furo kulanka isku-dubaridka mashruuca BAXNAANO (BOOST-YOU) oo ka socda Muqdisho.

Kulankan wuxuu muhiim u yahay xoojinta iskaashiga Dowladda Federaalka iyo Dowlad Goboleedyada, si loo horumariyo ilaalinta bulshada loona abuuro fursado shaqo oo dhalinyarada Soomaaliyeed.

Waxaa naga go’an dardargelinta barnaamijyada wax ku oolka ah ee ka jawaabaya baahiyaha bulshada.