23/09/2026
TALIYAHA TALISKA CIIDANKA GAARKA AH OO TABABAR HEERKIISU SAREEYO U SOO XIRAY CUTUBYO KA TIRSAN CIIDANKA GAARKA AH XDS OO LAGU TABABARAY DALKA MASAR
Qaahira, Masar: Taliyaha Taliska Ciidanka Gaarka ah ee Ciidanka Xoogga Dalka Soomaaliyeed, Sarreeye Guuto Aadan Maxamed Cumar, ayaa tababar heerkiisu sareeyo ugu soo xiray dalka Masar cutubyo ka tirsan Ciidanka Gaarka ah ee Xoogga Dalka Soomaaliyeed.
Munaasabadda lagu soo xirayay tababarka ayaa waxaa ka qeybgalay Kusimaha Safiirka Safaaradda Soomaaliya ee dalka Masar, Cabdixakiin Axmed Maxamed, U-qeybsanaha Milatariga Soomaaliya ee dalka Masar, Sarreeye Guuto Maxamed Cabdullaahi Maxamed, Taliyaha Ciidamada Dallayadaha (Airborne) ee dalka Masar iyo saraakiil kale.
Ciidamada tababarka qaatay ayaa muddo tababarro heer sare ah ku soo qaatay dalka Masar, kuwaas oo diiradda lagu saarayay xirfadaha Ciidanka Kumaandooska, la-dagaallanka argagixisada, dagaalka magaalooyinka iyo hawlgallada dallayadaha (Parachute).
Taliyaha Taliska Ciidanka Gaarka ah, Sarreeye Guuto Aadan Maxamed Cumar, ayaa munaasabadda ka jeediyay dardaaran iyo dhiirrigelin uu u jeediyay ciidamada tababarka soo dhammaystay, isagoo kula dardaarmay in aqoonta iyo xirfadaha ay barteen ay si hufan uga faa’iideystaan gudashada waajibaadka qaran.
Tababarkan ayaa qeyb ka ah iskaashiga amni iyo difaac ee u dhexeeya Soomaaliya iyo Masar, kaas oo lagu xoojinayo tayada, awoodda iyo xirfadaha Ciidanka Xoogga Dalka Soomaaliyeed, gaar ahaan Ciidamada Gaarka ah, si ay uga qeyb qaataan howlgallada ka dhanka ah Khawaarijta iyo sugidda amniga dalka.
