14/02/2024
Maktabadda Laascaanood waxa ay qabanaysaa “Tartanka Sheekada-gaaban ee Dr Xaange.” Waa tartan furan oo ay ka qayb geli karaan dhalinyarada qoraalka xiiseey ee degmada Laascanaanood ku nool. Guulaystayaashu waxay helayaan abaalmarinno. Muddada qabashada sheekooyinku way kooban tahay waxa ay ka bilaabmaysa 14-bisha Febarweri llaa iyo 14 Maarso. Fadlan haddaad xiiseynayso in aad ka qaybqaadato, sheekadadaada ku soo dir Email-ka hoos ku xusan, ama waxaad geyn kartaa xarunta maktabadda.
[email protected]
Haddaba, sheekada gaaban waa maxay? Maxaa ayse yihiin astaamaha looga baahanyahay in ay yeelato sheekada gaaban?
Barbilowga sheeko gaaban (Novela), sida magaceeda ka muuqata waa sheeko gaaban, dherer ahaanna 900-1000 erey ama ku dhaw. Wixii intaa ka badan sheeko gaaban ma sii noqon karto. Sheekada gaabani waxa ay leedahay astaamo iyo xeerar ka soocaya dhammaan noocyada kale ee sheekada oo ay ka mid tahay sheeko xariirada iyo sheeko dheer. Qodobada ugu muhiimsanna waxaa ka mid ah barbilowga sheekada, ubucda iyo gunanadka sheekada gaaban.
Tan ugu sii muhiimsan waa in sheekada gaaban aanay yeelan gogolxaar, maadaama ay gaaban tahayna waa in toos loo abbaaro nuxurka ay sheekadu xambaarsan tahay. Waxay diiradda saartaa mawduuca laga hadlayo oo lagu ma sii tiigaalo waxyaalo kale oo aan mawduuca muhiimad gooni ah u lahayn. Sheekada gaabani waa in ay toos u abbaartaa dareenka aqristaha oo aanu ka sii fekerin in aanay dhicin iyo in ay dhacday, waa in inta ugu badan iyo sida ugu adagba u tahay mid suurtagal ah oo nolol maalmeedkeena taabanaysa. Mar labaad waa in aanay sheekadu lahayn xakam dhexe, doodo iyo waxyaalo kale oo ay suurtagal tahay in laga helo sheekada dheer. Sheekada gaaban waxa muhiim ah in jilayaasha ku jira ay yihiin kuwa kooban, si looga gaabsado in ay sheekadu yeelato doorar badan oo aysan qaadi karin sheekada gaaban ee asalkeeda loogu talgalay in ay qodobo kooban si kooban oo suugaan ah uga doodo.
Bilowga horeba waa in aad toos u abbaarto ujeedda qoraalka. Ka hor inta aanad qorinna waa in maankaaga ay ku uruursan yihiin ujeedada aad u qoraysid, tii oo kuu fududayn karta in aad toos u abbaarto, tusaale ahaan maxaad u doontay in aad qorto; ma in aad qofka wax u weriso keliya, ma in aad ka qosliso, ma in aad dareenkiisa murug ku abuurto iyo wixii la mid ah.
Qodobka ugu muhiimsan ee xigana waa horta yaa sheekada ka sheekeynaya, ama inoo werinaya. Kaalinta jilaaga, iyo ma qofka koobaad ee sheekada ka sheekeynaya mise qofka saddexaad oo ah qofka aragtida leh. Sidoo kale ka taxaddar in aadan isticmaalin tilmaamo badan oo laga yaabo in ay booskiina kaa buuxiyaan, nuxurkii sheekadana uu noqdo mid balfiyay.
Maduucyada ugu mudan ee aan hadda halkan ku xulan karno waxaa ka mid noqon kara; saamaynta colaadaha ay yeeshaan ubadka koraya iyo sida ay garaadkooda u saameeyaan, abaaraha iyo saamaynta ay ku yeeshaan dabciga aadanaha abaaraha qaayibay, kulaylka iyo is beddelka cimilada iyo saamaynta uu deegaanka ku yeesho, sidoo kale colaaddu saamaynta ay ku leedahay deegaanka iyo dhulka, waxa kale oo qodob muhiim ah noqon kara xoolodhaqatada iyo beeraleyda haddii si qumman loo adeegsado saamaynta togan ee ay bulshada ku yeelan karaa, ama haddii ba la dayaco saamaynta taban ee ay bulshada ku yeelan karaan.
