15/06/2026
Buugga: قلادة مردوخ / Siliskii Marduukh.
Bog :529
Qoraa: Axmed Sacaaddadiin , reer Masar ah.
Turjume: Raan Shiikh
Maanta waxaan soo dhammaystay akhriska buugga Siliskii Marduukh oo ka kooban 529 bog.
Buuggani wuxuu ahaa safar dheer oo i dhex mariyey ilbaxnimooyin h**e, boqortooyooyin, dagaallo, iyo dhacdooyin taariikheed oo kala duwan. Waxa ugu badan ee i soo jiitay ayaa ahaa sida qoraagu ugu guulaystay inuu isku xidho dhacdooyin aad u kala fog iyo jilayaal taariikhda caan ku ah, isaga oo sheekada ka dhigaya mid xiiso leh oo aan la saadaalin karin.
Intii aan akhrinayay, waxaan la kulmay magacyo iyo dhacdooyin badan oo aan h**e wax yar uga ogaa, balse buuggu wuxuu igu dhiirrigeliyey inaan sii baadho taariikhdooda. Waxa kale oo uu iga dhaliyey su'aalo badan oo ku saabsan sida ay dhacdooyinka taariikhdu isugu xidhan yihiin iyo saamaynta ay dunida ku yeesheen.
waa sheeko faneed si farshaxan sarraysa loo qoray, iskuna darsatay taariikh, mala-awaal (fantasy), qarsoodi, iyo tacabur.
Buuggu wuxuu ku wareegayaa silsilad qadiimi ah oo la yidhaahdo “Siliskii marduukh”, taas oo la rumaysan yahay inay xambaarsan tahay habaar iyo sir qarniyo badan soo jiray.
Sheekadu kuma koobna hal xilli ama hal goob oo keliya, balse waxay akhristaha la dhex mushaaxaysaa ilbaxnimooyin iyo waqtiyo kala duwan, laga bilaabo Baabiloonkii h**e ilaa uu ku dhammaado xilligii madaxweynihii Maraykanka, John F. Kennedy.
Buuggu waxa uu si cajiib ah iskugu xidhayaa dhacdooyin taariikheed oo kala durugsan, isaga oo dhex gelinaya siro qadiimi ah, khuraafaad, aragtiyo shirqool, iyo dhacdooyin dhab ah oo taariikhda dunida raad ku yeeshay, waxayna isaga dabqaadaysaa taariikho kala durugsan iyo dhacdooyin saamayntooda lahaa.
Waxyaabaha ugu xiisaha badan ee buuggan waxaa ka mid ah:
• Taariikhda ilbaxnimadii Baabiloon.
• Khuraafaadka iyo ilaaha Marduukh.
• Awoodda, hunguriga, iyo cawaaqibta rabitaanka xukunka.
• Siraha qadiimiga ah iyo habaarka qarsoon.
• Isku xidhka dhacdooyin taariikheed oo kala duwan.
Marka aad bogga ugu horreeya bilowdo, way adag tahay inaad dhigto ilaa aad ka gaadho bogga ugu dambeeya. Inta lagu jiro akhriska, waxa aad helaysaa aqoon iyo faham dheeraad ah oo ku saabsan taariikhda, siyaasadda, iyo aragtiyaha shirqoolka ee dunida.
Gunaanad, Waa buug mudan in la akhriyo, gaar ahaan qof kasta oo xiiseeya sheekooyinka ku qotoma taariikhda iyo siraha qadiimiga ah.
10/10000.
W/Q: Selma Abdirisak
