26/05/2026
Degmada Guriceel 26 May 2026
Wasiirka Wasaaradda Tamarta iyo Khayraadka Biyaha ee Galmudug, Mudane Cabdullaahi Maxamed Daahir, ayaa safar booqasho iyo ukuurgal ah ku tagay deegaanno badan oo ku yaalla koonfurta degmada Guriceel, kuwaas oo ay ka mid yihiin Xaarxaar, Iidow, Dabarre, Cawsley, Biyacaddo, Qawley, Biyaguduud, Yaayaaley, Ceelqorrax, Dhagaxyaale, Gurijeex, Dooyaale iyo Libiley, kuwaas oo dhammaantood qiyaastii 65KM u jira degmada Guriceel.
Safarkan oo uu ku weheliyay Wasiirka Wasaaradda Waxbarashada, Hidaha iyo Tacliinta Sare ee Galmudug, Mudane Maxamed Xaashi Dhoore, ayaa si gaar ah diiradda loogu saaray ukuurgalka xaaladaha ka jira deegaannadan, gaar ahaan dhinacyada biyaha iyo waxbarashada.
Intii lagu guda jiray booqashada, wafdigu waxa uu soo arkay bulsho isku tashatay oo si weyn ugu howlan horumarinta beeraha iyo kor u qaadista wax-soo-saarka deegaanka. Waxaa si gaar ah indhaha usoo jiitay beero si wanaagsan loo tabcay, dalagyo kala duwan oo miro dhalay, iyo dadaalka muuqda ee bulshada deegaanka ugu jirto sidii ay u gaari lahaayeen isku filnaansho nololeed iyo mid wax-soo-saar.
Sidoo kale, wafdigu waxa uu sameeyay indha-indheyn ku saabsan xaaladda ceelasha biyaha, nidaamyada waraabka iyo guud ahaan baahiyaha adeegyada aasaasiga ah ee ka jira deegaannadan.
Wasiirka ayaa xusay in deegaannadani leeyihiin fursado horumarineed oo ballaaran, haddii la helo taageero iyo maalgelin lagu xoojinayo adeegyada biyaha, beeraha iyo kaabeyaasha kale ee muhiimka u ah nolosha bulshada.
Ugu dambeyn, Wasiirku waxa uu bogaadiyay shacabka ku nool deegaannadan dadaalka, adkeysiga iyo isku tashiga ay muujiyeen, isaga oo tilmaamay inay yihiin bulsho mudan dhiirrigelin iyo garab istaag si loo sii xoojiyo horumarka ka socda deegaanka.
— DHAMMAAD —
Abdirahman Hussain Kulmiye
Xafiiska Warfaafinta & Xiriirka Warbaahinta
Wasaaradda Tamarta iyo Khayraadka Biyaha ee Galmudug
Wixii faahfaahin ah, fadlan kala xiriir;
E-mail: [email protected]
Facebook:https://www.facebook.com/share/1bttSng441/