Tumenye kwivura.

24/06/2023

AMAHIRWE YO KUBA MUZIMA

“Ukundwa, ndagusabira kugira ngo ugubwe neza muri byose, ube mutaraga nk’uko
umutima wawe uguwe neza” (3 Yohana 2).
Kuba muzima ni ubutunzi, ni igishoro kidahomba, ni imbaraga zitaneshwa, ni
umurage udateye ipfunwe. None se kuba muzima ni iki?
Umuntu muzima ni ufite umubiri ushoboye kwihanganira umuruho, intekerezo
zishoboye kwihanganira ibibazo, n’imico ibana neza n’abandi. Muri make, ni umuntu
wishimira imirimo, agatekereza ibyiza kandi yishimiye kubana neza n’abandi. (Pour le
meilleur et pour la vie, p. 170)
Ubuzima bwo mu bwenge
« Ipfa ni kimwe mu bishuko bikomeye mwene muntu agomba guhangana na byo…
kwirengagiza umubiri, ni ukwirengagiza ubwenge. Imibiri irwaragura hamwe
n’ubwenge bugufi ntibishobora guhesha Imana icyubahiro. Gutwarwa n’inda nini
utitaye ku buzima bwawe ni ukwiyangiza. Abatitegeka mu mirire no mu minywere
cyangwa mu kandi kantu ako ari ko kose, bisesagura imbaraga z’impagarike kandi
bikagabanya imbaraga zo gutunganya… Umucunguzi w’isi yari azi ko gutegekwa n’ipfa
ryawe bimugaza umubiri bigakamura ingingo zishinzwe ubushishozi kugeza ubwo
umuntu azimiza ubushobozi bwo gutahura ibyera n’iby’iteka ryose. » (Témoignages,
vol. 1, p. 476-477)
« Ibyiza byo gukoresha umubiri.—Abagabura, abigisha n’abanyeshuri ntibateza
imbere ubuhanga bwabo nk’uko byari bikwiriye kumera mu gihe bakorera imyitozo
ngororangingo ahari umwuka mwiza. Bajya birengagiza iyo nshingano y’ingenzi mu
gufata neza ubuzima. Bahora bunamye mu bitabo byabo kandi bakarya
nk’iby’abakora imirimo yo hanze. Akamenyero nk’ako kabatera kugira ibinure bitewe
n’uko ingingo zabo zitinyagambura.
« Abandi bahorana intege nke bitewe n’uko imbaraga z’ubuzima bwabo zigushwa
agacuho no kwikuraho umutwaro w’indyo irenze urugero. Umwijima urananirwa
ukaba utagishoboye gukura imyanda mu maraso. Indwara zigahita ziyadukiza.
Uwagira ngo gukoresha umubiri bifatanywe no gukoresha ubwenge, amaraso
yatembera ku rugero rwiza, umutima ugasohoza akazi kawo neza, imyanda yasohoka
neza, ubugingo bushya bukumvikanisha ibyiza byabwo mu migabane yose
y’umubiri. » (Témoignages, vol. 1, p. 481)
« Kuzimiza ubushobozi bwo kwibuka.—Abasazishijwe n’umutwaro w’uducogocogo
tw’umurimo w’Imana bashobora gusanga mu bwonko bwabo harimo ibyuho
by’amahugwe mu birebana n’ibibera ahabazengurutse, ibyababayeho mu gihe cya
vuba bishobora guhita bihanagurika mu bwenge bwabo; nyamara kandi bakibuka
amapica n’ibyababayeho mu buto bwabo. Oh! Uwagira ngo abasore bamenye ukuntu
ari iby’ingenzi kurinda intekerezo zabo zikaba izera kandi zihagaze neza,
zitarangwamo ibitekerezo byononekaye, ndetse no kurinda imitima yabo akamenyero
kayangiza, kuko kwera cyangwa kwandura ko mu busore kugira ingaruka zizageza no
mu busaza. (Pour un bon équilibre mental et spirituel, vol. 2, p. 776; The Youth’s
Instructor, 25 oct. 1894. Sons and Daughters of God, 78)
« ... Iyo ugeze ku meza, ugaragaza ubusambo. Ngiyo imwe mu mpamvu zituma
utagira amakenga no gukunda kwibagirwa. Nkuziho guhamya ibintu, nyuma
ukabihakana ugira ngo ushyigikire ibinyuranye n’ibyo wari waravuze. Nsanzwe mbizi,
ariko byose nabiherereje ku ngaruka z’imirire yawe… » (Pour un bon équilibre mental et
spirituel, vol. 2, p. 776; Conseils sur la Nutrition, 164)

24/06/2023

Ubuzima bw’imyororokere

“Ndagushimira yuko naremwe uburyo buteye ubwoba butangaza, imirimo wakoze
ni ibitangaza, ibyo umutima ubizi neza. Igikanka cyanjye ntiwagihishwe, ubwo
naremerwaga mu rwihisho, ubwo naremesherezwaga ubwenge mu byo hasi y’isi. Nkiri
urusoro amaso yawe yarandebaga…” (Zaburi 139:14-16)
Ubuzima bw’imyororokere, bugotewe impande zose. Abahungu bari kubyiruka
bambara imyambaro ihambiriye imyanya ndangagitsina, ikabura ubwisanzure,
n’ubushyuhe bukayangiriza. Abenshi muri bo bimenyereza imibonano mpuzabitsina
imyanya myibarukiro itarakura, bakangirika prostate, umugongo n’imvubura ya
ipofize (hypophyse), imitsi yabo igahombana batarakura, maze bakazasaza imburagihe
(guta umuhoro).
Indwara z’ibyuririzi ni aho zibafatira, mu gihe ubwenge bwabo butari bwamenya
kugira amakenga, kuvangura no kwitegeka. Ubumuga bw’amagufwa, umugongo,
amaso no gushegeshwa k’ubwonko bigatongora. Benshi muri bo bakarwara indwara
ziruhije isuzuma.
Abakobwa na bo, imyambarire itabamara imbeho mu kiziba cy’inda, igituza
kitambaye neza, ubwoko bw’imyambaro butemerewe kwegera igitsina, isuku idahagije
ku mubiri wose no ku myambaro, kutamenya amategeko agenga imikorere y’imyanya
myibarukiro, no kwimenyereza imibonano utarakura, imibonano mu gihe cy’imihango,
imibonano irengeje urugero, guhora hafi y’abo mudahuje igitsina, bikabyutsa iruba
ryangiriza ubwenge n’imitsi yumva. kutamenya isuku y’utwite, iy’umaze kubyara
n’iy’uwonsa na byo bigira ingaruka. Gukoresha isukari nyinshi, byica vitamini A, E, B,
C; ari ryo shingiro ry’ubutaraga bw’imyanya myibarukiro n’ubwonko bushinzwe
gutunganya iby’imyororokere.
Ibi hamwe n’ibindi byinshi, ingaruka zabyo zibasira urwungano rw’imyororokere,
inda zigakunda kuvamo, zikanga gufata, imisemburo ngengamubiri ikavuburwa mu
kajagari, abana bakavukana uburema bwo ku mubiri n’ubwo mu bwenge, uburakari
n’amahane.
Muri make, kutamenya amategeko agenga imyororokere, biteje imiryango myinshi
amakuba, agahinda n’ingorane.
Ubuzima bwiza ni urufatiro rw’umuryango mwiza. Soya n’ibiyikomokaho (tofu,
amata yayo) bikize ku byitwa « phyto-œstrogènes » bitunganya neza ukwezi
k’umugore, bikabuza prostate kubyimba, bikayirinda kanseri.
Kugira ngo imyamya myibarukiro ikore neza, no kurinda umubiri kanseri,
hakenewe vitamini A (ibijumba, imboga, spirulina,…). Hakenewe na vitamini E
(iboneka muri tomate, ibinyampeke, amashaza, igihaza n’inzuzi zacyo,…).
Zibukira urugimbu rukomoka ku nyamaswa, kuko ruri mu bitera ibibyimba no
kuziba kw’imiyoborantanga, ibise bike no kononekara kw’imyanya ndangagitsina
y’impinja uhereye mu nda za ba nyina. Gabanya umunyu, reka: inzoga, kawa, icyayi.
Dore ibyokurya bikize muri vitamini E : soya ifite 1,95 (muri garama 100); amavuta
y’ibigori: 192, aya elayo: 12, ay’ibihwagari:51; ingano zimeze: 14, avoka: 2,3.
Ikigaragara ni uko vitamini E yo mu bimera iruta by’ihabya ikomoka ku nyamaswa,
kuko amagi afite: 1,05 ; amata y’inka: 0,1.
Ikomoka ku bimera ifite n’akandi kamaro gakomeye ko gukingira no gukiza indwara
nka kanseri, no kubuza amaraso gukonja, indwara zo kubyimbagirana zikaba nkeya.
Umugore utwite yirinda : inzoga, itabi, inyama, ifiriti, isukari, amafi, amata y’inka
n’ibiyakomokaho, icyayi/kawa, mayoneze,… Ahubwo agomba kwibanda kuri avoka
n’ipapayi, elayo, imbuto zose muri rusange, ibinyampeke, imboga, inzuzi z’ibihaza,
noix de cajou, soya,… (soma igitabo: En bonne santé et forts)

24/06/2023

Imibanire myiza y’abashakanye

Inshingano y’ibanze y’umugore, ni ukugandukira umugabo we (kumwumvira
anezerewe), naho inshingano y’umugabo, ni ugukunda no gukuyakuya uwo yashatse,
akamenya neza ko igisubizo cyo kwifuza kose k’umugore we gihishe muri we.
Kumwihanganira n’ubufatanye, biri mu bitera ubuzima n’ubwenge bw’uwo yashatse
kugubwa neza.
Abagambiriye gushaka n’abamaze gushaka, bagomba kumenya ko uwamaze
gushaka, inama z’ababyeyi zigomba gufata umwanya wa kabiri. Bakamenya ko
inshuti zibuzwa kwinjira mu mabanga y’urugo, ko imbaraga zabo ari zo bazakesha
kugubwa neza, buri wese akibagirwa iby’iwabo.
“Bagore, mugandukire abagabo banyu nk’uko mugandukira Umwami wacu, kuko
umugabo ari we mutwe w’umugore we, nk’uko Kristo ari umutwe w’Itorero… Bagabo,
mukunde abagore banyu nk’uko Kristo yakunze itorero akaryitangira ngo aryeze,…
Ukunda umugore we aba yikunda, kuko ari nta muntu wakwanga umubiri we,
ahubwo yawugaburira akawukuyakuya nk’uko Kristo abigirira Itorero.” (Abefeso 5:22-
33)
“”Ni cyo gituma umuntu azasiga se na nyina, akabana n’umugore we akaramata,
bombi bakaba umubiri umwe.” (Itangiriro 2:24) “Umva mukobwa, utekereze utege
ugutwi, kandi wibagirwe ishyanga ryanyu n’inzu ya so...” (Zaburi 45:11)
“Imana ni yo yacyuje ubukwe bwa mbere. Uwo muhango wahanzwe n’Umuremyi wa
byose… Iyo amahame mvajuru yumviwe, gushyingirwa biba umugisha. Ni ingabo
ikingira kwera n’umunezero w’umuntu. Bimurangiriza amakene y’imibanire ye
n’abandi, bikuza imiterere y’impagarike ye, iy’ubuhanga n’iyo gutunganya.
(Patriarches et Prophètes, p. 23-24)
“Mu mibereho yanyu ya buri munsi, mujye mwihatira kwigana urukundo
n’ubugiraneza bwa Data wo mu ijuru. Imibereho yo mu muryango ijye ihora
ishyuhijwe n’ibyishimo. Mutume hahora umutuzo uzasigira abana banyu inzibutso zo
guhishurirwa amahoro n’umunezero byo muri paradiso. Ibyo bibafitiye agaciro karuta
ak’ubukonde n’amafaranga. Nta gushidikanya, abagize umuryango bose ntibateye
kimwe, kandi mu ruhande rwawe ibyo bizagusaba kwihangana hamwe n’imbabazi.
Impuhwe n’umutuzo ni byo bizagushoboza kurushaho kwegeranya abawe.”
(Patriarches et Prophètes, p. 154)
“Urukundo nyakuri rukomoka ku ihame ryera kandi ryisumbuye, ruhabanye mu
buryo bwuzuye n’urukomotse ku rukundo rugurumana rw’akanya gato rujya
ruherako ruzima rugikubitana n’ikigeragezo gishaririye. Gusohoza neza inshingano
z’imuhira zikureba ni byo bishoboza urubyiruko kwitegura mu birebana no
kuzashinga izabo ngo. Imuhira ni ho umuntu yigira kwiyanga, ubugiraneza, urugwiro
n’impuhwe za gikristo. Umwana wawe, ufite umutima wuzuye urukundo rushyushye,
akava iwawe akava munsi y’igisenge cy’inzu yawe agiye kuyobora urwe rugo rushya,
azaba azi uburyo bwo kunezeza uwo yahisemo ngo amubere umufasha mu buzima.
Gushyingirwa, aho kugira ngo bibe iherezo ry’urukundo, ahubwo bizaba itangiriro
ryarwo.” (Patriarches et Prophètes, p. 154-155)

24/06/2023

Kurya neza kandi ku gihe

Kurya neza ni ukurya ibihuje n’amakene y’umubiri. Nyir’ukurya akwiye kumenya
ko buri rugingo rufite ibyokurya rwagenewe, kugira ngo rube ruzima kandi rukore
neza. Ikigero cy’imyaka na cyo kigomba kwitabwaho n’abatetsi bajijutse. Ibyokurya
by’uruhinja n’iby’igitambambuga, bigomba kuba bizwi n’umuhungu n’umukobwa
bateganya kurushinga. Ibyokurya by’utwite bigomba gushyirwa mu igenamigambi
ry’umutungo w’umuryango. Uwonsa agomba kumenya ko ari kugaburira babiri.
Ingimbi igomba kubona ibitera imbaraga, ubwenge n’ubufatanye. Umusore kimwe
n’abakuze agomba kwita ku bitera ubushobozi, ubugenzuzi n’igenamigambi.
Ibikwerere, abashika n’abasaza, bagomba kuzirikana ibyoroshya amagufwa
n’ibiyakomeza, n’ibirinda ubwonko kuyoyoka. Abazima n’abarwayi bagomba kurya
ibikingira n’ibivura indwara. Abahuye n’ibibazo bagomba guhabwa ibirinda
n’ibirwanya ubwihebe.
Ibyiza byose, iby’ingirakamaro byose, bikwiye guherekezwa no kubirya ku gihe
kidahindagurika, utashonje cyane, kandi utari hafi yo gusinzira, ntubiryane ubwoba
n’igihunga, kenshi ugasangira n’abandi unezerewe. Ibyo byose bishingiye ku mbuto,
imboga n’ibinyampeke, kunywa amazi no kwiyuhagira.
« Ingaruka y’ubusambo.—Gutegekwa n’ipfa ni ubusambo. Kurya amoko menshi ku
igaburo rimwe birahagije gutera akajagari mu gifu maze bigatera kudacya mu maso.
Ni yo mpamvu Imana isaba buri muntu wese gukorana na yo kugira ngo hatagira
n’umwe urenga imbibi ze bwite mu birebana n’ibyokurya cyangwa mu kurya indyo
mbi. Kunezeza ipfa utyo bihembura imbaraga ya kinyamaswa maze bigakamura
igishyika kiboneye cyo mu bwenge. Impagarike y’umuntu yose ikaba ihindanijwe,
maze umuntu agahinduka imbata y’ipfa rye, agashyonyagiza irari ry’umubiri maze
rikamuyobora iyo rishaka. » (Pour un bon équilibre mental et spirituel, vol. 2, p. 400-
401).
« Kurya ku masaha ahindagurika no kwirengagiza amategeko
y’ubuzima.—Inshuro nyinshi, intekerezo zijya zinanirwa zikanagusha nyirazo mu
bwihebe bidatewe n’imirimo ikomeye no kwiga cyane ahubwo bitewe no kuba wariye
ibyokurya bidakwiriye kandi ku masaha adakwiriye, kandi byatewe no kwirengagiza
amategeko y’ubuzima… Ingaruka yo kurya no kuryama ku masaha ahindagurika
bishegesha imbaraga z’ubwonko. Intumwa Paulo avuga ko ushaka kugera ku rugero
ruhanitse rwo kwera agomba kuba ari uwirinda muri byose. Imirire, iminywere
n’uburyo twambara bifite ingaruka zahuranije ku iterambere ry’iby’umwuka. (Pour un
bon équilibre mental et spirituel, vol. 2, p. 400; The Youth’s Instructor, 31 mai 1894)
« Gutsindagira igifu bicogoza intekerezo.—Na none ni ngombwa kwirinda
kurenza mbiga, n’ubwo byaba ari ibyokurya byiza. N’ubundi impagarike ikoresha ibyo
buri rugingo rukeneye; ibirenzeho bisenyagura ingingo. Akenshi abantu bibwira ko
abanyeshuri bajya barwazwa n’uko bakoze cyane, kandi aho icyabiteye ari ukurya
byinshi. Uwaha agaciro kenshi amategeko y’ubuzima mu buryo bukwiriye, nta
wakongera kwikanga kugwa agacuho; inshuro nyinshi iyo ngirwamunaniro wo mu
bwenge ukomoka ku gutsindagira igifu bikananiza umubiri kandi bigacogoza
intekerezo. (Pour un bon équilibre mental et spirituel, vol. 2, p. 400; Education, 232
(1903

24/06/2023

Akamaro ko gusinzira

“Nzajya ndyama nsinzire niziguye, kuko ari wowe wenyine Uwiteka umpa kuba
amahoro.” (Zaburi 4:9/ 8).
Gusinzira ni umwe mu migabne y’umugisha Imana yahaye umuntu, ikaba n’inkingi
ikomeye y’ubuzima bw’ubwenge. Ni isanurangingo Imana yageneye umubiri. Ni
gahunda idapfa yo gukura imyanda mu bwonko no mu mubiri buri joro. Gusinzira
bigize icya gatatu (1/3) cyo kubaho k’umuntu.
Impamvu iyo ari yo yose ihungabanya gusinzira, iba yangirije ubuzima, ubwenge,
n’imico by’umuntu. Hari inzira eshatu nini zibujije abantu gusinzira: umutekano
muke, kurya nabi n’ubunebwe.
Umutekano muke
Muri iyi ngingo ya mbere, hari abantu benshi badasinzira bihagije bitewe no
kurinda umutekano w’abantu n’ibintu (abashinzwe umutekano w’igihugu), abaganga
barara ku barwayi bavura indembe, bakira izindi, babyaza, impagarara z’intambara
n’impuha zazo, n’ibindi.
Kurya nabi
Iyo uriye uri hafi yo kuryama, kurya ibyokurya bifite amavuta menshi nijoro, kurya
ugahaga cyane wenda kuryama, guhuza amoko menshi y’ibyokurya, kunywa byinshi
mu ijoro; ibi byose bihungabanya ibitotsi, bamwe bakabibura, abandi bigacagagurika,
abandi bakihagarika kenshi mu ijoro. Ibyo byose bigira ingaruka zo kugabanya
amasaha yagenewe gusinzira, bigaca intege umubiri n’ubwonko, no kugabanura
amaraso n’abasirikare b’umubiri.
Ubunebwe
Ni byiza kumenya akamaro k’umurimo. Uretse umusaruro umuntu abikuramo,
ahubwo gukora ndetse n’umwete umuntu abigiramo, bituma ahumeka umwuka
mwinshi, uwo mwuka ugatuma mu bwonko haruhuka neza. Imihore yananiwe
ikikuramo ibisazirwa by’ingirangingo, ibyuya bigasohoka, maze mu ijoro umuntu
agasinzira neza.
“Ibitotsi by’umukozi bimugwa neza, n’iyo ariye bike cyangwa byinshi, ariko guhāga
k’umukire kumubuza gusinzira.” (Umubwiriza 5:12/11)
“Aburahamu asubiye imuhira, ajya iruhande rw’uburiri bwa Isaka wari usinziriye
ibitotsi byimbitse, bituje bya gisore biherekejwe n’ubuziranenge…” (Patriarches et
Prophètes, p. 129). Burya n’umutima mwiza, ubuto n’ubukiranutsi bitera ibitotsi
byiza.
Gusinzira bituma umutima utera neza amaraso witonze, na wo ukaruhuka, ibihaha
bikaruhuka. Imvubura zishinzwe gusohora imyanda ziyinyujije mu ruhu zigakora
umurimo wazo neza. Ku bw’ibyo, ibitotsi ni ubutunzi bw’ubwiru butangaje.
Kudasinzira bitera ubwihebe, ubwenge budashakashaka, bunyurwa n’uko buri,
kurakazwa n’akadashyitse, kudacya mu maso, imico mibi, kumva ibintu nabi no kuba
nabi ku murimo wawe, kubabara ubusabusa.
Ni yo mpamvu kuba imburamukoro bituma benshi barara kuri telephone, kuri
teteviziyo no mu bitaramo bitagira umumaro, bikagira ingaruka ku mubiri no mu
bwenge.
Abandi benshi, ubwo bunebwe bubatera kugira amavuta menshi mu mubiri,
urugimbu rukabatera iruba rya kinyamaswa, bakarara bazerera, biyandarika.
Ngiyo intandaro y’indwara z’ibyuririzi, amakwe adasobanutse, ingo zitunguranye,
inda z’indaro, guta agaciro mu muryango no mu rungano, abana batagira iyo
babarizwa.

01/01/2021

https://youtu.be/l43RdLq0uvI
Sobanukirwa Indwara z'ibyorezo ibizitera, uko twazirinda ndetse n'ibiribwa byadufasha kongera ubudahangarwa kugira ngo twirinde gufatwa na zo ndetse urumvamo n'imiti yakugoboka ziramutse zagufashe. Ibuka no gukanda subscribe kubatarabikora no kubisangiza abandi kugira ngo uku kuri kugere ku bantu benshi.

01/01/2021

https://indatwa.rw/ibyadufasha-kwirinda-indwara-zibyorezo-video-nzungu-gadi/

Zirikana ko indwara z'ibyorezo zikomeye kurusha izindi

29/12/2020

https://indatwa.rw/indwara-zivurwa-nubuki-nuko-bukoreshwa-video-nzungu-gadi/

Wasoma ibijyaniranye n'ubuko nubundi mu buryo bwagutse, Uko buvura n'uko bukoreshwa. Ngaho isomere n'aha ngaha

Wumve niyo video

Ubuki ni isoko ngari ya mavitamini menshi nka *A,E, B1, B2, B5, B6, B12, K, P, D,* n’izindi. Harimo imisemburo ngengamubiri itera igikuriro (hormones de croissance), n’ibindi. Butera kurama, bwongera imbaraga mu mubiri no mu bwenge, kandi ni kimwe mu byifashishwa bakora ibyongera uburanga. Ubuki...

29/12/2020

https://youtu.be/i93KTO4zdtQ

Kurikirana akamaro k'ubuki n'uko bufasha mukuvura indwara zitandukanye nk'uko tubisobanurirwa na Nzungu Gadi.

20/12/2020

https://youtu.be/8EPLTe5G8yU

KANSERI IGICE CYA 2

20/12/2020

https://youtu.be/8EPLTe5G8yU

19/12/2020

https://youtu.be/efdkaTwX7Lk