11/06/2026
*تیسری پری فلڈ موک ایکسرسائز 2026*
*ٹوبہ ٹیک سنگھ: ممکنہ سیلابی صورتحال سے نمٹنے کیلئے ریسکیو 1122 اور ضلعی انتظامیہ کی جامع فرضی مشق*
صوبائی ڈیزاسٹر مینجمنٹ اتھارٹی (PDMA) کی ہدایات اور ڈپٹی کمشنر ٹوبہ ٹیک سنگھ جناب عمر عباس میلا صاحب کی زیرِ قیادت پیرمحل (مائی صفوراں) کے مقام پر پری فلڈ موک ایکسرسائز 2026 کا انعقاد کیا گیا۔ اس موقع پر ریسکیو 1122، ضلعی انتظامیہ اور تمام لائن ڈیپارٹمنٹس کے افسران نے بھرپور شرکت کی، جبکہ ڈسٹرکٹ ایمرجنسی آفیسر ریسکیو 1122 میاں فراز منیر نے مجموعی مشقوں کی نگرانی کی۔
تقریب کے آغاز پر ریسکیو 1122 کے ریسکیو بوٹس پر مشتمل چاق و چوبند دستے نے ڈپٹی کمشنر ٹوبہ ٹیک سنگھ جناب عمر عباس میلا صاحب کو سلامی پیش کی، جس کے بعد ڈپٹی کمشنر نے ریسکیو بوٹس، آلات اور دیگر امدادی وسائل کا تفصیلی معائنہ کیا۔
کسی بھی ہنگامی صورتحال سے مؤثر انداز میں نمٹنے کے لیے ریسکیو 1122 کی جانب سے جائے وقوعہ پر ایک مکمل انسیڈنٹ کمانڈ پوسٹ (ICP) قائم کی گئی، جہاں سے تمام امدادی سرگرمیوں، وسائل کی لائیو مانیٹرنگ اور مختلف اداروں کے درمیان مؤثر رابطہ کاری (Coordination) کی نگرانی کی گئی۔ اسی طرح میڈیکل کیمپ اور فیلڈ ہسپتال بھی قائم کیے گئے جہاں متاثرین کو فوری طبی امداد کی فراہمی کے انتظامات کا جائزہ لیا گیا۔ مزید برآں، فیلڈ میں ایک عارضی ریسکیو ورکشاپ بھی فعال رکھی گئی تاکہ کسی بھی فنی خرابی کی صورت میں آلات اور بوٹس کی فوری مرمت اور بحالی کو یقینی بنایا جا سکے۔
ڈسٹرکٹ ایمرجنسی آفیسر ریسکیو 1122 میاں فراز منیر نے موک ایکسرسائز کے مختلف مراحل، ادارہ جاتی رابطہ کاری اور سیلابی صورتحال سے نمٹنے کی تیاریوں پر تفصیلی بریفنگ دیتے ہوئے کہا کہ ریسکیو 1122 جدید آلات، تربیت یافتہ عملے اور مکمل وسائل کے ساتھ ہر قسم کی ہنگامی صورتحال سے نمٹنے کے لیے ہمہ وقت تیار ہے۔
سیلاب کے ممکنہ خطرات کے پیشِ نظر ضلعی انتظامیہ اور ریسکیو 1122 ٹوبہ ٹیک سنگھ کی جانب سے ہائی الرٹ جاری کرتے ہوئے فلڈ وارننگ اور ارلی الرٹنگ سسٹم کو فعال کر دیا گیا۔ اس سلسلے میں کسی بھی ہنگامی صورتحال سے نمٹنے اور تیاریوں کو جانچنے کے لیے ایک جامع عملی مشق کا انعقاد کیا گیا، جس کے دوران شہریوں کے بحفاظت اور قبل از وقت انخلا (Early Evacuation) کے ساتھ ساتھ ان کے قیمتی مال مویشیوں کو بھی محفوظ مقامات پر منتقل کرنے کی عملی مشقیں کامیابی سے مکمل کی گئیں۔ ضلعی انتظامیہ اور ریسکیو 1122 شہریوں کی جان و مال کے تحفظ کے لیے مکمل طور پر الرٹ اور تیار ہیں۔
اس موقع پر متاثرین بالخصوص مرد، خواتین، بچوں اور خصوصی افراد (PWDs) کے لیے الگ الگ ریلیف کیمپس قائم کیے گئے، جہاں بنیادی سہولیات، خوراک، صاف پانی اور واش رومز کی فراہمی کو یقینی بنایا گیا۔ خصوصی افراد کی سہولت کے لیے ویل چیئرز اور سٹریچرز بھی دستیاب رکھے گئے، جبکہ تربیت یافتہ خواتین ریسکیو اہلکاروں کو بھی تعینات کیا گیا۔ ہر کیمپ میں رپورٹنگ ڈیسک قائم کیا گیا جہاں متاثرین کا مکمل ڈیٹا درج کیا جا رہا ہے تاکہ بروقت امداد اور مؤثر انتظامات ممکن بنائے جا سکیں۔
فرضی مشقوں کے دوران دریا میں پھنسے اور تیز بہاؤ میں ڈوبتے ہوئے شخص کو ریسکیو کرنے کا لائیو مظاہرہ کیا گیا۔ ریسکیو 1122 کے واٹر ریسکیو اہلکاروں نے پیشہ ورانہ مہارت کا مظاہرہ کرتے ہوئے متاثرہ شخص کو بحفاظت پانی سے نکالا، لائف سیونگ تکنیکس (CPR) کے ذریعے ابتدائی طبی امداد دی اور بعد ازاں ایمبولینس کے ذریعے ہسپتال منتقل کرنے کا عمل کامیابی سے مکمل کیا۔
ڈپٹی کمشنر عمر عباس میلا اور ایڈیشنل ڈپٹی کمشنر ریونیو وقار اکبر چیمہ نے تمام کیمپس، ریسکیو آلات اور فرضی مشقوں کا باریک بینی سے جائزہ لیا اور ریسکیو 1122 سمیت تمام لائن ڈیپارٹمنٹس کی تیاریوں پر مکمل اطمینان کا اظہار کیا۔ ڈپٹی کمشنر نے کہا کہ:
"ایسی مشقوں کا بنیادی مقصد تمام اداروں کی آپریشنل استعدادِ کار کو جانچنا اور ان کے مابین کوآرڈینیشن کو مزید مضبوط بنانا ہے تاکہ کسی بھی قدرتی آفت کی صورت میں شہریوں کو فوری اور مؤثر ریلیف فراہم کیا جا سکے۔"
آخر میں ڈسٹرکٹ ایمرجنسی آفیسر میاں فراز منیر نے اس عزم کا اظہار کیا کہ ریسکیو 1122 ٹوبہ ٹیک سنگھ اور ضلعی انتظامیہ کسی بھی ممکنہ سیلابی صورتحال سے نمٹنے کے لیے 24 گھنٹے الرٹ ہیں اور عوام کے جان و مال اور ان کے مویشیوں کے تحفظ کے لیے تمام دستیاب وسائل بروئے کار لائے جائیں گے۔
