23/04/2026
پنجاب ایمرجنسی سروس
ریسکیو 1122 ٹوبہ ٹیک سنگھ
تاریخ: 23 اپریل 2026
*پری فلڈ موک ایکسرسائز 2026*
*ٹوبہ ٹیک سنگھ: ممکنہ سیلاب سے نمٹنے کے لیے ریسکیو 1122 کی تیاریاں مکمل*
*ڈسٹرکٹ ایمرجنسی آفیسر: میاں فراز منیر*
ٹوبہ ٹیک سنگھ: آمدہ ہدایات PDMA اور ڈپٹی کمشنر ٹوبہ ٹیک سنگھ جناب عمر عباس میلا صاحب کی زیر نگرانی ممکنہ سیلابی صورتحال سے نمٹنے کیلئے کمالیہ (تارا حویلی) کے مقام پر فرضی مشقوں کا انعقاد کیا گیا۔ جس کی قیادت ڈسٹرکٹ ایمرجنسی آفیسر ریسکیو 1122 ٹوبہ ٹیک سنگھ میاں فراز منیر نے کی۔
پری فلڈ موک ایکسرسائز میں بطور مہمان خصوصی ڈپٹی کمشنر ٹوبہ ٹیک سنگھ عمر عباس میلا صاحب نے شرکت کی۔ اس کے علاوہ ایڈیشنل ڈپٹی کمشنر ریونیو وقار اکبر چیمہ اور اسسٹنٹ کمشنر کمالیہ ارم شہزادی صاحبہ بھی موجود تھیں۔ مزید برآں سول ڈیفنس، پولیس، ہیلتھ، لائیو سٹاک، PDMA، ایجوکیشن اور دیگر تمام لائن ڈیپارٹمنٹس کے عہدیداران، ریسکیو آفیسرز، ریسکیو اہلکاروں اور ریسکیو والنٹیئرز نے بھی شرکت کی۔
پری فلڈ موک ایکسرسائز کے موقع پر ریسکیو 1122، محکمہ ریونیو، ہیلتھ، ایجوکیشن، سول ڈیفنس، لائیو سٹاک، زراعت، انہار، میونسپل کارپوریشن، سوشل ویلفیئر اور دیگر محکموں کی جانب سے ریلیف کیمپس لگائے گئے۔ ڈپٹی کمشنر ٹوبہ ٹیک سنگھ عمر عباس میلا نے تمام کیمپس کا معائنہ کیا اور سیلاب سے نمٹنے کیلئے ریسکیو 1122 ٹوبہ ٹیک سنگھ کی تیاریوں پر مکمل اطمینان کا اظہار کیا۔ انہوں نے سیلاب کے دوران ریسکیو اینڈ ریلیف کیلئے استعمال ہونے والے آلات کا بھی جائزہ لیا۔
مشقوں کے دوران ریسکیو والنٹیئرز نے اپنی صلاحیتوں کو بروئے کار لاتے ہوئے ڈوبتے ہوئے افراد کو بچانے اور CPR کے ذریعے جان بچانے کی عملی مشقوں کا مظاہرہ کیا۔ اس موقع پر ڈپٹی کمشنر عمر عباس میلا نے کہا کہ والنٹیئرز کی بغیر معاوضہ خدمات قابل تحسین ہیں اور امید ہے کہ وہ آئندہ بھی اسی جذبے کے ساتھ کام جاری رکھیں گے۔
ڈپٹی کمشنر ٹوبہ ٹیک سنگھ کا کہنا تھا کہ ڈسٹرکٹ ایمرجنسی آفیسر میاں فراز منیر کی قیادت میں ریسکیو 1122 کی کارکردگی قابل ستائش ہے۔ ریسکیو 1122 نے مختصر عرصے میں اپنی پیشہ ورانہ مہارت سے نمایاں مقام حاصل کیا ہے۔ انہوں نے کہا کہ فرضی مشقوں کا مقصد سیلاب کے دوران استعمال ہونے والے آلات اور متعلقہ محکموں کی کارکردگی کا جائزہ لینا ہے تاکہ کسی بھی ہنگامی صورتحال میں بروقت اور مؤثر کارروائی یقینی بنائی جا سکے۔
انہوں نے مزید کہا کہ گزشتہ سیلاب میں درپیش آنے والے مسائل کا جائزہ لے کر ان کا مؤثر تدارک کیا گیا ہے اور اس تجربے سے بہت کچھ سیکھنے کو ملا ہے۔ اب کوشش ہے کہ آئندہ ایسے کسی بھی مسائل سے بچا جا سکے اور عوام کو ہر ممکن ریلیف فراہم کیا جائے۔
انہوں نے مزید ہدایت کی کہ ممکنہ سیلابی صورتحال کے پیش نظر ریسکیو 1122، سول ڈیفنس اور دیگر ادارے ہمہ وقت چوکس رہیں اور عوام کو محفوظ مقامات پر منتقل کرنے کیلئے مشقوں کا تسلسل برقرار رکھا جائے۔
اس موقع پر ڈسٹرکٹ ایمرجنسی آفیسر میاں فراز منیر نے کہا کہ ریسکیو 1122 اور ضلعی انتظامیہ متوقع سیلاب سے نمٹنے کیلئے مکمل طور پر تیار ہیں اور تمام وسائل بروئے کار لائے جائیں گے۔ انہوں نے مزید کہا کہ ریسکیو 1122 ٹوبہ ٹیک سنگھ کسی بھی ناگہانی صورتحال سے نمٹنے کیلئے ہر وقت تیار ہے۔
سیلابی صورتحال سے نمٹنے کیلئے کامیاب فرضی مشق کے انعقاد پر ڈپٹی کمشنر عمر عباس میلا نے تمام ریسکیورز کی پیشہ ورانہ صلاحیتوں اور شاندار کارکردگی کو سراہا۔
