19/07/2026
سالانہ کارکردگی جائزہ اجلاس
ڈائریکٹر جنرل کامرس ایجوکیشن اینڈ مینجمنٹ سائنسز، پروفیسر عمر علی خان کی زیرِ صدارت تعلیمی سال 2025–2026 کی سالانہ کارکردگی کا جائزہ لینے کے لیے ایک اہم اجلاس منعقد ہوا۔ اجلاس کا مقصد اداروں کی مجموعی کارکردگی، حاصل شدہ کامیابیوں اور آئندہ کے اہداف کا جائزہ لینا تھا، جو نہایت کامیاب رہا۔
اجلاس کے دوران مختلف سرکاری کالجوں کے پرنسپلز نے تعلیمی سال 2025–2026 کی سالانہ کارکردگی رپورٹس پیش کیں۔ انہوں نے اپنے اداروں کی ترقی، نمایاں کامیابیوں، اہم اقدامات اور سال بھر کی کارکردگی سے شرکاء کو آگاہ کیا۔ اس کے ساتھ ساتھ درپیش چیلنجز پر بھی روشنی ڈالی گئی اور ادارہ جاتی بہتری کے لیے مختلف تجاویز اور اقدامات پر تبادلۂ خیال کیا گیا۔
اس موقع پر ڈائریکٹر جنرل پروفیسر عمر علی خان نے بھی اپنے زیرِ انتظام ڈائریکٹوریٹ جنرل کامرس ایجوکیشن اینڈ مینجمنٹ سائنسز کی مجموعی کارکردگی پیش کرتے ہوئے اہم کامیابیوں، جاری اصلاحاتی اقدامات اور تعلیمی و انتظامی معیار کو مزید بہتر بنانے کے لیے کی جانے والی کاوشوں سے آگاہ کیا۔
اپنے اختتامی کلمات میں پروفیسر عمر علی خان نے تمام پرنسپلز اور ڈائریکٹوریٹ کے افسران و عملے کی محنت، لگن اور پیشہ ورانہ خدمات کو سراہا۔ انہوں نے اس امید کا اظہار کیا کہ تمام متعلقہ افسران و ملازمین مستقبل میں بھی اسی جذبے، عزم اور ذمہ داری کے ساتھ اپنی خدمات انجام دیتے رہیں گے تاکہ ادارہ مزید کامیابیاں حاصل کرے اور تعلیمی معیار میں مسلسل بہتری آتی رہے۔
اجلاس کا اختتام ادارہ جاتی ترقی، اعلیٰ کارکردگی اور مسلسل بہتری کے عزم کے ساتھ ہوا۔
