30/08/2025
"پاراچنار سے بی ایس نرسنگ پروگرام کا خاتمہ ہمارے علاقے کے لیے کسی المیے سے کم نہیں۔ یہ صرف ایک تعلیمی پروگرام کا بند ہونا نہیں بلکہ ہمارے نوجوانوں کے خوابوں، ہماری بہنوں کے مستقبل اور پورے خطے کے صحت کے نظام پر کاری ضرب ہے۔ خاص طور پر وہ بچیاں جو اپنے علاقے سے باہر جا کر تعلیم حاصل نہیں کر سکتیں، ان کے لیے یہ واحد امید تھی، مگر اب ان کی راہیں بند کر دی گئی ہیں۔ یہ فیصلہ ان معصوم خوابوں کو کچلنے کے مترادف ہے۔
سب سے زیادہ دکھ کی بات یہ ہے کہ ہمارے نمائندے، نوشانِ قوم، اساتذہ اور وہ سب لوگ جو آواز بلند کر سکتے تھے، آج خاموش تماشائی بنے بیٹھے ہیں۔ ان کی یہ خاموشی دراصل اس ناانصافی میں شریک ہونے کے برابر ہے۔ بی ایس نرسنگ کو بند کرنا صرف ایک ادارے یا ڈگری کا مسئلہ نہیں بلکہ پورے علاقے کی محرومی ہے۔ یہ ظلم کسی صورت قبول نہیں۔
ہم پرزور مطالبہ کرتے ہیں کہ اس غیر منصفانہ فیصلے کو فوراً واپس لیا جائے، بی ایس نرسنگ پروگرام بحال کیا جائے اور ہماری بہنوں کے تعلیمی و عملی مستقبل کو بچایا جائے۔ اس کے ساتھ ہم اپنے ایم پی اے، ایم این اے، اور تمام متعلقہ ذمہ داران کو متنبہ کرتے ہیں کہ وہ اس معاملے پر فوری طور پر مؤثر کردار ادا کریں۔ ان کی خاموشی ناقابلِ معافی ہے، اور اگر انہوں نے یہ ذمہ داری پوری نہ کی تو عوام انہیں کبھی معاف نہیں کریں گے۔"
