District Education Office - SE Narowal

03/06/2026

*نصابی سرگرمیاں تو سارا سال چلتی رہتی ہیں ۔۔۔طلبہ کی جسمانی نشوونما اور ہمہ گیر تربیت اساتذہ کا فرض ہے ۔ سمر کیمپ کو طلبہ کے لیے موثر اور مفید بنائیں* ۔
محترم زاہد محمود رانا صاحب ڈسٹرکٹ ایجوکیشن افیسر ضلع نارووال اور محترم عبدالمنان بٹ صاحب سابق پرنسپل گورنمنٹ ہائی سکول احمد اباد کا وزٹ ۔۔۔انہوں نے طلبہ کی مختلف تعلیمی سرگرمیوں کا مشاہدہ کیا ، طلبہ سے بات چیت کی اور اطمینان کا اظہار کیا ۔ محترم زاہد محمود رانا صاحب نے اظہار خیال کرتے ہوئے کہا کہ یہ اپنی نوعیت کا منفرد سمر کیمپ ہے جس میں طلبہ کی تعلیمی سرگرمیوں کے ساتھ ساتھ جسمانی نشوونما اور تربیت کا بھی خاص خیال رکھا جا رہا ہے ۔

02/06/2026

آج لاہور میں صوبائی وزیر ٹرانسپورٹ پنجاب بلال اکبر خان، چیئرمین امین بیت المال پنجاب خواجہ محمد وسیم بٹ اور وفاقی وزیر امور کشمیر و گلگت بلتستان انوار الحق چوہدری سے ملاقات۔

ملاقات کے دوران اساتذہ کرام کو درپیش مسائل، ضلع نارووال کے تعلیمی امور اور تعلیمی ترقی کے مختلف پہلوؤں پر تفصیلی تبادلۂ خیال کیا گیا۔ اس موقع پر اس عزم کا اعادہ کیا گیا کہ اساتذہ کرام کے جائز مسائل ترجیحی بنیادوں پر حل کیے جائیں گے اور تعلیمی نظام کو مزید مضبوط بنایا جائے گا۔

ضلع نارووال کو "علم کی بستی" بنانے کے لیے وفاقی وزیر منصوبہ بندی و ترقی پروفیسر احسن اقبال کے وژن کے مطابق طلبہ و طالبات کو معیاری اور بہترین تعلیمی سہولیات کی فراہمی یقینی بنائی جا رہی ہے۔ تعلیمی اداروں میں بنیادی سہولیات کی بہتری اور جدید تقاضوں سے ہم آہنگ ماحول کی فراہمی کے لیے عملی اقدامات جاری ہیں۔

تعلیم ہماری اولین ترجیح ہے اور نوجوان نسل کے روشن مستقبل کے لیے تمام ممکنہ وسائل بروئے کار لائے جائیں گے۔

زاہد محمود
ڈسٹرکٹ ایجوکیشن آفیسر (سیکنڈری) نارووال۔

31/05/2026

24/05/2026

محترمہ فرحت سلطانہ صاحبہ نے فروری 2025 میں گورنمنٹ گرلز ہائی سکول نمبر 2 شکرگڑھ کا چارج سنبھالا، اور مختصر عرصے میں اپنی انتھک محنت، بہترین انتظامی صلاحیتوں اور خلوصِ نیت سے ادارے کو ترقی کی نئی راہوں پر گامزن کر دیا۔
انہوں نے دن رات محنت کر کے نہ صرف تعلیمی معیار کو بہتر بنایا بلکہ سکول کے نظم و ضبط، صفائی، اساتذہ کی رہنمائی اور طالبات کی کردار سازی پر بھی خصوصی توجہ دی۔

ایک ادارہ صرف عمارت کا نام نہیں ہوتا بلکہ اس کی اصل پہچان اس کے قائد کی سوچ، وژن اور محنت ہوتی ہے، اور فرحت سلطانہ صاحبہ نے ثابت کیا کہ مخلص قیادت کسی بھی ادارے کی تقدیر بدل سکتی ہے۔
آج ان کی ریٹائرمنٹ یقیناً محکمہ تعلیم کے لیے ایک بڑا نقصان ہے، لیکن ان کی خدمات، ان کی محنت اور ان کی اچھی روایات ہمیشہ یاد رکھی جائیں گی۔
انہوں نے اپنی عملی زندگی سے یہ سبق دیا کہ ایک معلم صرف پڑھاتا نہیں بلکہ نسلوں کی تعمیر کرتا ہے۔

میں بطور ڈسٹرکٹ ایجوکیشن آفیسر سیکنڈری نارووال، ان کی گرانقدر خدمات کو خراجِ تحسین پیش کرتا ہوں.
سفرِ شوق کے مرحلے ختم تو نہ تھے
یہ اور بات ہے رستے بدل گئے ہیں آج

رخصت ہوئے تو کیا ہوا، یادیں تو ساتھ ہیں
خدمت کے سب نقوش ابھی تک حیات ہیں

اللہ تعالیٰ محترمہ فرحت سلطانہ صاحبہ کو اپنی حفظ و امان میں رکھے اور ان کی آئندہ زندگی کو خوشیوں سے بھر دے۔

20/05/2026

الحمدللہ!

احباب احمد آباد کی جانب سے ایک بار پھر خدمتِ خلق اور فروغِ تعلیم کی روشن مثال قائم کرتے ہوئے سرکاری تعلیمی اداروں کے سینکڑوں مستحق طلبہ و طالبات کو تقریباً ایک لاکھ ستر ہزار روپے ( 170000) مالیت کے یونیفارم، شوز اور سکول بیگز فراہم کیے گئے۔

یہ کارِ خیر صرف امداد نہیں بلکہ ان بچوں کے خوابوں، امیدوں اور روشن مستقبل کو سہارا دینے کی ایک مخلصانہ کوشش ہے جو مالی مشکلات اور سہولیات کے فقدان کے باوجود علم حاصل کرنے کا جذبہ رکھتے ہیں۔

یاد رہے کہ گزشتہ سال بھی احباب احمد آباد نے گورنمنٹ بوائز ہائی سکول احمد آباد کے مستحق طلبہ کے لیے ستر ہزار (70000) روپے مالیت کے یونیفارم فراہم کیے تھے، جبکہ اس سال گورنمنٹ بوائز ہائی سکول احمد آباد، گورنمنٹ گرلز ہائیر سیکنڈری سکول احمد آباد اور گورنمنٹ بوائز پرائمری سکول نمبر 1 کی جانب سے مستحق طلبہ و طالبات کی فہرستیں فراہم کی گئیں تاکہ حقیقی ضرورت مند بچوں تک یہ امداد عزت و احترام کے ساتھ پہنچ سکے۔

احباب احمد آباد کی یہ خوبصورت روایت ہمیشہ کی طرح نمود و نمائش سے مکمل طور پر پاک رکھی گئی تاکہ کسی بھی طالب علم کی عزتِ نفس مجروح نہ ہو۔ یہی خاموش خدمت دراصل اصل انسانیت اور معاشرتی ذمہ داری کا عملی نمونہ ہے۔

تعلیم کے ساتھ ساتھ ماحول دوستی کے جذبے کو فروغ دیتے ہوئے شجرکاری مہم کے تحت گورنمنٹ بوائز ہائی سکول احمد آباد میں تقریباً 150 پودے جبکہ گورنمنٹ بوائز پرائمری سکول نمبر 1 میں 50 پودے لگائے گئے، تاکہ آنے والی نسلوں کو ایک سرسبز، صاف اور خوشگوار ماحول فراہم کیا جا سکے۔

احباب احمد آباد کا یہ مشن اس عزم کا مظہر ہے کہ کوئی بچہ صرف غربت یا وسائل کی کمی کی وجہ سے تعلیم سے محروم نہ رہے۔ ان شاء اللہ یہ تعمیری اور فلاحی سلسلہ آئندہ بھی اسی جذبے، اخلاص اور خدمت کے ساتھ جاری و ساری رہے گا۔

اللہ تعالیٰ اس عظیم اور بے لوث خدمت میں تعاون کرنے والے تمام احباب کو جزائے خیر عطا فرمائے، ان کے رزق، عزت اور زندگیوں میں برکتیں نصیب فرمائے اور انہیں مزید انسانیت کی خدمت کی توفیق عطا فرمائے۔ آمین ثم آمین۔

منجانب:
ایڈمنز احباب احمد آباد