08/04/2026
مردان: ہسپتالوں کی تعمیر میں 20 سالہ تاخیر، امیرِ جماعت اسلامی کی رٹ پر پشاور ہائیکورٹ کا بڑا ایکشن
سیکرٹری ہیلتھ،سیکرٹری فنانس اور ایم ایس سمیت اعلیٰ un حکام طلب؛ 'ریفر ٹو پشاور' کی پرچیوں پر عدالت کی برہمی
رپورٹ :ایم بشیرعادل
جماعت اسلامی کے ضلعی امیر غلام رسول نے مردان کے دو بڑے طبی منصوبوں، بے نظیر چلڈرن ہسپتال اور ڈسٹرکٹ ہیڈ کوارٹر ہسپتال کی تعمیر میں دہائیوں پر محیط تاخیر، فنڈز کے مبینہ ضیاع اور بدانتظامی کے خلاف اپنے قانونی مشیر مسلم شاہ آریانی ایڈووکیٹ سپریم کورٹ آف پاکستان کی وساطت سے پشاور ہائیکورٹ میں رٹ پٹیشن دائر کر دی ہے ضلعی امیر غلام رسول کے وکیل مسلم شاہ آریانی ایڈووکیٹ کے مطابق پشاور ہائیکورٹ نے رٹ پٹیشن کو منظور کرتے ہوئے ڈویژن بنچ نے سماعت کی عدالت عالیہ نے ابتدائی دلائل سننے کے بعد محکمہ صحت کے اعلیٰ حکام بشمول سیکرٹری ہیلتھ، سیکرٹری فنانس، ڈائریکٹر بے نظیر چلڈرن ہسپتال، ڈی ایچ او اور ایم ایس ڈی ایچ کیو ہسپتال کو ریکارڈ اور جواب سمیت ذاتی حیثیت میں عدالت کے روبرو پیش ہونے کا حکم جاری کر دیا ہے۔رٹ پٹیشن میں موقف اختیار کیا گیا ہے کہ بے نظیر چلڈرن ہسپتال اور ہیڈ کوارٹر ہسپتال مردان پر تعمیراتی کام 2002 اور 2004 سے جاری ہے، مگر بیس سال کا طویل عرصہ بیت جانے کے باوجود ان ہسپتالوں کی تعمیر مکمل نہیں ہو سکی، جو کہ مردان کے عوام کے ساتھ سراسر ناانصافی اور انتظامی نااہلی کا منہ بولتا ثبوت ہے۔ درخواست گزار نے عدالت کو آگاہ کیا کہ ہسپتالوں میں علاج معالجے اور تیمار داری کی سہولیات نہ ہونے کے برابر ہیں اور مریضوں کو معمولی نوعیت کے کیسز میں بھی پشاور ریفر کر دیا جاتا ہے، جس کے باعث غریب عوام شدید زہنی اور مالی مشکلات کا شکار ہیں۔پٹیشن میں مزید کہا گیا ہے کہ ہسپتالوں میں مریضوں کے لواحقین سے کار پارکنگ کے نام پر غیر قانونی وصولیاں کی جا رہی ہیں جو کہ قدرتی قانون کے خلاف ہیں۔ عدالت سے استدعا کی گئی ہے کہ ہسپتالوں کے غائب ہونے والے قیمتی آلات کو فوری طور پر واپس لا کر ہسپتالوں کو مکمل طور پر فنکشنل کیا جائے اور فنڈز کی بروقت فراہمی اور استعمال میں رکاوٹ بننے والے ذمہ داروں کے خلاف سخت قانونی کارروائی عمل میں لائی جائے۔ امیر جماعت اسلامی مردان نے اس عزم کا اظہار کیا کہ وہ عوامی حقوق کے تحفظ کے لیے قانونی جنگ جاری رکھیں گے، جبکہ عدالت عالیہ نے متعلقہ افسران کو آئندہ پیشی پر طلب کرتے ہوئے سماعت ملتوی کر دی ہے
