24/12/2023
لوگ آپکو کتنا نوٹ کرتے ہیں ؟
میں 11 سال کا تھا جب میں نے نظر کی کمزوری کے باعث عینک استعمال کرنا شروع کی، پھراکیس سالہ یہ سفر 15 اکتوبر کو لاہور میں لیزر سرجری کے ساتھ اختتام پذیر ہوا۔ ابتداء میں مجھے گلاسز کے بغیر اپنا چہرہ عجیب لگتا تھا۔ کچھ دن پاکستان میں زیرو نمبر کے گلاسز استعمال کرتا رہا کہ لوگوں کو عجیب نہ لگے مگر ایک دن میں نے فیصلہ کیا کہ اب لوگوں کو کچھ بھی لگے میں اب گلاسز استعمال نہیں کروں گا۔
قارئینِ کرام میں ہر ہفتے قریباً ڈیڑھ سو سے دو سو لوگوں کو ملتا ہوں جن میں 50 فیصد لوگ مجھے روٹین میں ملتے ہیں۔ آپ اندازہ کریں کہ 95 فیصد لوگوں کو تو احساس تک نہ ہوا کہ میں نے گلاسز لگانا چھوڑ دیے ہیں۔ باقی پانچ فیصد نے بھی یہی کہا کہ آپ تھوڑے مختلف لگ رہے ہو تو مجھے انہیں بتانا پڑا کہ اب میں گلاسز استعمال نہیں کرتا۔
مجھے یہ احساس شدت سے ہوا کہ ہمارے اکثر فیصلوں میں لوگوں کی جانب سے پیدا کردہ معاشرتی دباؤ اور لوگوں کی ہمارے بارے میں رائے کا اچھا خاصا عمل دخل ہوتا ہے اور لوگ ہمیں کتنا نوٹس کرتے ہیں؟ یہ سب لوگ اس چیز کو بھی نوٹ نہیں کر سکے جو آپ کے ساتھ اکیس سال سے تھی تو یہ آپکے غلط فیصلوں کا حساب کیا دیں گے ؟ لوگ صرف اسی چیز کو نوٹ کرتے ہیں جس میں ان کی دلچسپی ہو۔آپ اور آپکی ذات میں آپکی خود کی دلچسپی ہونی چاہیئے نہ کہ لوگوں کی۔
لوگ کیا کہیں گے ؟ انہیں کہنے دیجیئے۔ آپکو علم ہونا چاہیئے کہ آپ کیا کر رہے ہیں اور آپکی نیت کیا ہے؟ وہ جو کہیں گے ،کریں گے اس کا حساب دیں گے اور آپ خود کا حساب دیں گے۔ حساب سے پہلے احتساب بڑا ضروری ہے اور اگر یہ احتساب آپ تھرڈ پارٹی (کامل استاد) سے کرا لیں تو یقینا اصل امتحان میں کامیابی کا امکان بہت بڑھ جائے گا۔
محمد حماد آسٹریلیا
ڈاکٹر
بریسبین پوسٹ۔125
کوپی
