18/05/2026
ایم پی اے چوہدری جاوید کوثر نے اپنے بیان میں کہا ہے کہ سابق وزیراعظم عمران خان کی حکومت کے خاتمے سے متعلق سامنے آنے والی حالیہ پیش رفت اور مبینہ سائفر کے مندرجات نے یہ واضح کر دیا ہے کہ عمران خان کو ایک منظم سیاسی سازش کے تحت اقتدار سے الگ کیا گیا۔
انہوں نے کہا کہ عمران خان نے اپنی حکومت کے خاتمے کے وقت قوم کو بتایا تھا کہ بیرونی دباؤ، اندرونی سیاسی عناصر اور مفاد پرست کرداروں کے گٹھ جوڑ کے ذریعے ان کی حکومت کے خلاف منصوبہ بندی کی گئی۔ اُس وقت بہت سے لوگ اس مؤقف کو تسلیم کرنے سے گریزاں تھے، مگر آج سامنے آنے والی معلومات اور سیاسی حلقوں میں جاری بحث نے اس بیانیے کو مزید تقویت دی ہے۔
چوہدری جاوید کوثر نے کہا کہ اپوزیشن جماعتوں کی جانب سے تحریکِ عدم اعتماد لانا، بعض منحرف اراکین کا کردار ادا کرنا اور اُس وقت کی سیاسی صورتحال اس بات کی نشاندہی کرتی ہے کہ عمران خان کو ایک باقاعدہ سازش کے تحت اقتدار سے ہٹایا گیا۔ انہوں نے کہا کہ یہ صرف ایک حکومت کی تبدیلی نہیں تھی بلکہ عوام کے مینڈیٹ پر شب خون مارنے کے مترادف اقدام تھا۔
انہوں نے مزید کہا کہ قوم آج بھی یہ سوال کر رہی ہے کہ آخر کن طاقتوں اور مفادات کے تحت ایک منتخب وزیراعظم کو اقتدار سے الگ کیا گیا۔ انہوں نے مطالبہ کیا کہ تمام حقائق قوم کے سامنے لائے جائیں تاکہ عوام کو سچائی سے آگاہ کیا جا سکے اور ملکی سیاست میں شفافیت کو یقینی بنایا جا سکے۔
چوہدری جاوید کوثر نے کہا کہ پاکستان کی خودمختاری، جمہوریت اور عوامی مینڈیٹ کا ہر صورت احترام ہونا چاہیے، کیونکہ عوامی فیصلوں کو طاقت یا دباؤ کے ذریعے تبدیل کرنا جمہوری اقدار کے منافی ہے
