09/02/2026
گلگت بلتستان چیف کورٹ نے ہینزل 20 میگاواٹ اور نلتر 16 میگاواٹ منصوبوں کی عدم تکمیل سے متعلق مقدمہ سماعت کے لیے منظور کرتے ہوئے متعلقہ ٹھیکیدار کمپنیوں کو شوکاز نوٹس جاری کر دیے ہیں۔ عدالت نے ہدایت کی ہے کہ آئندہ سماعت پر تحریری جواب کے ساتھ پیش ہوں، بصورتِ دیگر عدم حاضری کی صورت میں مذکورہ کمپنیوں کی بولی سیکیورٹی اور پرفارمنس گارنٹی ضبط کرنے اور معاہدہ منسوخ کرنے کی سزا عائد کی جائے گی۔
عدالت کے مختصر حکم کے مطابق، ڈیوٹی جج، جسٹس مشتاق محمد نے مقدمے کی سماعت کے دوران ٹھیکیدار کمپنیاں CNEEC-FWO JV اور HMC کو فریق بناتے ہوئے درخواست میں شامل کر لیا ہے۔
شامل شدہ فریق نمبر 7 CNEEC-FWO JV کو طلب کیا جاتا ہے کہ وہ تحریری وضاحت کے ساتھ عدالت میں پیش ہو اور وجہ بتائے کہ کیوں نہ اس کا معاہدہ منسوخ کیا جائے اور اس کے ساتھ ساتھ بولی سیکیورٹی اور پرفارمنس گارنٹی ضبط کی جائیں۔
اسی طرح شامل شدہ فریق نمبر 8 HMC کو بھی طلب کیا جاتا ہے کہ وہ پراجیکٹ ڈائریکٹر کے دعوے کے مطابق منصوبے کی پیش رفت اور تکمیل سے متعلق اپنا تحریری جواب عدالت میں جمع کرائے۔
مذکورہ دونوں ٹھیکیدار کمپنیوں کو شوکاز نوٹس کے ہمراہ درخواست کی نقول ارسال کی جائیں معزز عدالت نے ۔ڈپٹی سیکریٹری غلام محمد کو ہدایت کردی کہ وہ صوبائی حکومت اور نومل، ہراموش، بگروٹ، پڈی بنگلہ، کارگاہ اور باسین کے علاقوں کے درمیان مبینہ طور پر طے پانے والے معاہدوں کی نقول عدالت میں جمع کرائیں، جو بجلی کی پیداوار پر ان کے سابقہ حق سے متعلق ہیں۔مزید کہ درخواست کی نقول حاضر فریقین کو فراہم کی جائیں اور انہیں ہدایت کی جائے کہ وہ پیرا وار (نکتہ وار) جوابات جمع کرائیں۔ مزید معزز عدالت نے متعلقہ برائچ کو ہدایت دی کہ خصوصی قاصد کے ذریعے نوٹسز کی تعمیل کرائے اور تعطیلات کے فوراً بعد درخواست کو بینچ کے روبرو پیش کیا جائے۔
