04/06/2026
ہائی کورٹ آزاد جموں و کشمیر نے ایڈاک بنیادوں پر ہونے والی فارماسسٹ تعیناتیوں کو معطل کر دیا
میرپور/ ہائی کورٹ آزاد جموں و کشمیر نے ڈاکٹر گوہر غفور کی جانب سے دائر آئینی رٹ پر ابتدائی سماعت کے بعد فارماسسٹوں کی متنازعہ تعیناتیوں کے خلاف اہم حکم جاری کرتے ہوئے مذکورہ تقرریوں پر عملدرآمد تاحکم ثانی معطل کر دیا ہے۔
عدالتی حکم کے مطابق درخواست گزار نے مؤقف اختیار کیا تھا کہ فارماسسٹوں کی تعیناتیوں میں قواعد و ضوابط اور میرٹ کے تقاضوں کو نظرانداز کیا گیا۔ عدالت نے رٹ پٹیشن کو باقاعدہ سماعت کے لیے منظور کرتے ہوئے متعلقہ فریقین کو نوٹس جاری کر دیے ہیں اور جواب طلب کر لیا ہے۔
عدالت نے عبوری ریلیف دیتے ہوئے حکم دیا ہے کہ نجی فریقین کی متنازعہ تعیناتیوں پر آئندہ عدالتی فیصلے تک عملدرآمد نہیں کیا جائے گا۔ کیس کی مزید سماعت مقررہ تاریخ پر ہوگی ۔جہاں فریقین اپنے دلائل اور ریکارڈ عدالت کے روبرو پیش کریں گے۔
ڈاکٹر گوہر غفور کی جانب سے دائر اس رٹ کے بعد محکمہ صحت میں ہونے والی فارماسسٹ تعیناتیوں کے حوالے سے قانونی صورتحال مزید اہمیت اختیار کر گئی ہے۔ جبکہ عدالتی فیصلے کے نتیجے میں متعلقہ تقرریوں کا مستقبل آئندہ سماعتوں سے مشروط ہو گیا ہے۔
