07/03/2026
🚩 عظیم الشان احتجاجی و مذمتی ریلی 🚩
قائدِ ملتِ جعفریہ پاکستان علّامہ سید ساجد علی نقوی کے حکم پر ’’خونِ شہیداں سے تجدیدِ عہد اور ظالموں سے اعلانِ برات‘‘ کے عنوان سے ولی امر المسلمینِ جہاں، رہبرِ معظم اور مجاہدِ اسلام آیت اللہ العظمیٰ سید علی حُسینی خامنہ ای اور اُن کے باوفا رفقاء کی مظلومانہ شہادت نیز اِسلامی جمہوریہ ایران کے خلاف دشمنانِ اسلام و انسانیت کی جارحیت کے خلاف 6 مارچ بروز جمعۃ المبارک نمازِ جمعہ کے بعد ایک عظیم الشان اور پُرامن احتجاجی ریلی نکالی گئی۔
یہ عظیم الشان ریلی نمازِ جمعہ کے بعد مرکزی جامع مسجد حسینیہؑ مانہ احمدانی سے شروع ہو کر انڈس ہائی وے سے ہوتی ہوئی اڈہ مانہ احمدانی تک پہنچی، جہاں شرکائے ریلی نے مظلومین سے یکجہتی اور عالمی استکبار کے خلاف اپنے جذبات کا بھرپور اظہار کیا۔
ریلی کا انعقاد انجمن حُسینیہ مانہ احمدانی، شیعہ علماء کونسل اور جعفریہ اسٹوڈنٹس آرگنائزیشن پاکستان (مانہ احمدانی) کے زیرِ اہتمام کیا گیا، جس میں علاقے کے مختلف مکاتبِ فکر سے تعلق رکھنے والے افراد نے بڑی تعداد میں شرکت کی۔
شرکائے ریلی رہبرِ معظم آیت اللہ العظمیٰ شہید سید علی حُسینی خامنہ ای کی تصاویر اُٹھائے ہوئے تھے اور ’’لبیک خامنہ ای‘‘، ’’مردہ باد امریکہ‘‘، ’’مردہ باد اسرائیل‘‘، ’’مرگ بر امریکہ‘‘ اور ’’مرگ بر اسرائیل‘‘ کے فلک شگاف نعرے بلند کر رہے تھے۔
یہ احتجاجی جلوس یونین کونسل مانہ احمدانی پہنچ کر اختتام پذیر ہوا، جہاں ماسٹر صغیر احمدانی، دلبر حسین مولائی، سید علی حضور نقوی، قاری سید ضمیر عباس زیدی، حاجی ناصر عباس کوریجہ اور مولانا نیاز حسین کمیلی نے شرکائے ریلی سے خطاب کیا اور مظلوموں کی حمایت اور استکبار کے خلاف اتحاد پر زور دیا۔
مقررین نے اپنے خطابات میں رہبرِ معظم آیت اللہ العظمیٰ شہید سید علی حُسینی خامنہ ای کی خدمات کو خراجِ عقیدت پیش کرتے ہوئے عالمِ اسلام کے اتحاد و بیداری کی ضرورت پر زور دیا۔ آخر میں رہبرِ معظم آیت اللہ العظمیٰ شہید سید علی حُسینی خامنہ ای کے قاتلوں خصوصاً اسرائیل اور اس کے سہولت کاروں (امریکہ) کے خلاف دعا کی گئی کہ اللہ تعالیٰ ظالموں کو اپنے انجام تک جلد پہنچائے اور مظلوموں کی نصرت فرمائے۔
(آمین یا رب العالمین بحقِ محمدؐ و آلِ محمدؑ)
✍️ از طــرف: فـخــر عبــاس الاحمــدانی
(06-03-2026)
