https://www.facebook.com/685383018001634/

Sangguniang Bayan ng Morong Bataan, Burgos Street, Poblacion (2026)

28/08/2026

Pagpapaunlad ng Organikong Agrikultura, tinalakay sa Committee Hearing

Isinagawa ngayong araw, August 26, 2026 ng Sangguniang Bayan ang Committee Hearing para sa panukalang ordinansa na naglalayong itaguyod, palaganapin at paunlarin ang organikong agrikultura sa ating bayan, gayundin ang paglalaan ng kinakailangang pondo para sa pagpapatupad nito.

Pinangunahan ang pagdinig ni SB Ruben M. Pastelero, Committee Chairman on Fisheries and Coastal Resource Management, kasama ang mga miyembro ng komite. Dumalo rin si Mr. Jimboy Sandiego, Acting Municipal Agriculturist, upang makibahagi sa masusing talakayan at pagbibigay ng mga kinakailangang inputs para sa higit pang pagpapahusay at pagpipino ng mga probisyon ng Proposed Ordinance.

Sa pagtalakay, binigyang-pansin ang mga mahahalagang mekanismo na maaaring maging bahagi ng programa ng bayan para sa organikong agrikultura, kabilang ang pagpapalakas ng mga organisasyon ng organic farmers, teknikal at pinansyal na suporta, certification at Participatory Guarantee System (PGS), organic trading posts at market assistance, consumer education, gayundin ang pagtatatag ng mga lokal na sentro at bangko ng organikong binhi.

Layunin ng panukalang ordinansa na magkaroon ang Morong ng mas malinaw at pangmatagalang balangkas para sa pagpapaunlad ng sustainable at environment-friendly na pagsasaka, habang sinusuportahan ang kabuhayan ng ating mga magsasaka at mangingisda, pinangangalagaan ang likas na yaman at itinataguyod ang kaligtasan at kalidad ng pagkain para sa ating mga mamamayan.

Patuloy ang Sangguniang Bayan sa masusing pag-aaral at konsultasyon upang matiyak na ang bawat probisyon ng panukalang ordinansa ay makabuluhan, napapanahon, maisasakatuparan at tunay na makatutulong sa sektor ng agrikultura ng Morong.

17/08/2026

Pagdinig hinggil sa Usapin ng Right of Way at Nakatakdang Pagbabakod sa Sitio Fuerte | Committee Hearing

Ginanap noong August 5, 2026 ang Committee Hearing kaugnay ng Civil Case No. 10978 – Action for Reconveyance with an Urgent Prayer for a Writ of Preliminary Injunction and Temporary Restraining Order, na may kaugnayan sa planong pagpapabakod sa isang bahagi ng lupa sa Sitio Fuerte, Brgy. Poblacion.

Pinangunahan ang pagdinig ni SB Ruben M. Pastelero, Chairman ng Committee on Housing and Land Utilization, kasama ang mga miyembro ng Komite. Dumalo rin sina Engr. Joel Zulueta ng Municipal Engineering Office at Engr. Johnfel David ng Municipal Assessor’s Office, gayundin ang kinatawan ng may-ari ng lupa at ang mga apektadong occupant na naglahad ng kanilang mga saloobin.

Isa sa pangunahing tinalakay ay ang Right of Way na gagamitin ng mga residente sakaling maisagawa ang fencing.
Ipinaliwanag ng Municipal Engineering Office na na-issue na ang Fencing Permit batay sa mga dokumentong isinumite at proof of ownership ng may-ari. Gayunman, naging sentro ng talakayan ang alternatibong daan na unang iminungkahi, na tinatayang isang metro lamang ang lapad at maaaring makaapekto sa ilang istruktura at sa access ng mga residente. Sa pag-uusap, iginiit ng mga apektadong occupant ang kahalagahan ng kanilang nakasanayang daan, lalo na para sa mga may sasakyan at sa mga legal na property at negosyong matagal nang umaasa sa naturang access. Nais nilang matiyak na hindi tuluyang mawawala ang ligtas at praktikal na daanan patungo sa kanilang mga tahanan at establisimyento.

Sa kabilang panig, ipinaliwanag ng kinatawan ng may-ari ng lupa na handa silang magbigay ng mas maluwag na 1.5-meter Right of Way bilang huling alok sa kanilang panig. Ipinaliwanag din niya na ang planong fencing ay pansamantala lang kung kaya’t yero muna ang gagamitin habang inaayos pa ang mga susunod na hakbang.

Sa kabila ng naging mainit na palitan ng pananaw, nanatiling bukas ang Committee sa dayalogo at paghahanap ng praktikal na solusyon na makapagbibigay ng konsiderasyon sa magkabilang panig.

Bilang susunod na hakbang, inirekomenda ni Chairman Pastelero ang pagsasagawa ng Ocular Inspection sa mismong lugar upang makita ng Committee, mga technical personnel at affected occupants ang aktuwal na sukat at alignment ng proposed Right of Way, pati na rin ang mga posibleng maapektuhang bahay at istruktura.

Layunin ng hakbang na ito na magkaroon ng mas malinaw at aktuwal na batayan bago magpatuloy ang usapin, sapagkat sa mga sensitibong usapin na tulad nito ay mahalagang marinig ang bawat panig, makita ang tunay na kalagayan sa lugar at maghanap ng solusyong may konsiderasyon sa karapatan at kapakanan ng mga apektadong mamamayan.

09/08/2026

Conditional Business Permit on Business Establishments | 2nd Public Hearing

Ipinagpatuloy noong August 3, 2026 ng Sangguniang Bayan ang Public Hearing hinggil sa Panukalang Ordinansa ukol sa Conditional Business Permit on Business Establishments, na pinangunahan ni SB Hero Santos, Chairman ng Committee on Trade, Business Enterprise and Industry Promotion, kaagapay ang bawat miyembro ng Sangguniang Bayan. Dinaluhan din ito ng iba’t ibang tanggapan at sektor kabilang ang Business Permit and Licensing Office (BPLO), Bureau of Fire Protection (BFP), Sanitary Office, mga opisyal ng barangay, at mga kinatawan ng mga beach resort, na aktibong nagbahagi ng kanilang mga mungkahi at teknikal na inputs sa ilang probisyon ng panukala.

Sa naging talakayan, binigyang-diin ang kahalagahan ng malinaw na pagsunod sa umiiral na mga batas at regulasyon, partikular sa Fire Code at iba pang kaugnay na alituntunin. Ilan sa mga isyung tinalakay ay ang proseso ng pagkuha ng mga kinakailangang permit, kabilang ang Fire Safety Inspection Certificate (FSIC) at Occupancy Permit, upang matiyak ang tamang koordinasyon ng mga ahensya.

Bilang bahagi ng masusing pagsusuri, inirekomenda ni Chairman Santos na hintayin ang pormal na tugon mula sa BFP kaugnay ng mga inilapit na katanungan at paglilinaw, upang masiguro na ang kanyang panukalang ordinansa ay naaayon sa batas at handa para sa makatwirang pagpapatupad.

09/08/2026

Pagpupulong upang Paghandaan ang Nesting Season ng Pawikan | July 29, 2026.

Noong July 29, 2026, ginanap ng Sangguniang Bayan ang isang Special Meeting na may temang “Strengthening Partnerships for a Safer Nesting Season of Pawikan” na pinangunahan ni SB Jomar Albarda Castro, Committee Chairman on Environmental Protection and Natural Resources, katuwang ang mga miyembro ng komite.

Dinaluhan ang nasabing pagdinig ng mga inimbitahang Pawikan Conservation Volunteers, kabilang sina Ms. Angel, Manager ng Pawikan Conservation Center sa Brgy. Nagbalayong; Mr. Nikko Ibias, Head ng Bantay Pawikan Volunteers; pati na rin ang mga kinatawan mula sa Pawikan Sa Damara Association sa pangunguna ni Pres. Edson Puno at SAGIP Pawikan Sitio Fuerte sa pamumuno ni Pres. Arnold Mendoza.

Naging sentro ng talakayan ang mga suliraning kinahaharap ng mga hatchery bilang paghahanda sa nalalapit na nesting season ng mga pawikan. Kabilang sa mga pangunahing isyung tinalakay ang paggamit ng lambat pangalabaw na nagdudulot ng panganib sa mga pawikan; presensya ng mga asong gala na sumisira sa mga pugad at hatchlings; iligal na pangunguha ng itlog (poaching); mga ilaw mula sa mga beach resort; aktibidad ng mga campers at lumalabag sa curfew; at ang patuloy na problema sa basura na nakapipinsala sa ating karagatan.

Sa pamamagitan ng pagtutulungan ng lokal na pamahalaan at ng iba’t ibang samahan, patuloy nating pinagtitibay ang mga hakbang upang mapangalagaan ang mga pawikan at masiguro ang isang ligtas na nesting season para sa mga ito.

09/08/2026

Paglilinaw sa 20% Discount sa mga Pampasaherong Tricycle | Committee Hearing

Isinagawa noong July 29, 2026 ng Sangguniang Bayan ang isang Committee Hearing hinggil sa mga naitalang reklamo ukol sa hindi pagsunod sa ipinag-uutos na 20% discount para sa mga estudyante, senior citizens at persons with disability (PWD). Sa pangunguna ni SB Ac Noriega Millares, Committee Chairman on Transportation katuwang ang mga miyembro ng Komite, tinalakay ang mga suliranin at nararapat na hakbang upang masiguro ang patas at maayos na serbisyo sa publiko. Dumalo rin sa pagdinig ang iba’t ibang TODA sa ating bayan (MORBATODA, NATODI, ASTRODOM, PBSM), kasama sina Mr. Noriega (Head Marshal), PEMS Bautista ng Morong PNP, Ms. Duran ng BPLO at Mr. Angeles mula sa Tourism Office.

Iginiit sa pulong na ang 20% discount ay mandato ng batas at kinakailangang sundin ng lahat, kasabay ng paglalabas ng mas malinaw na Taripa na may kasamang computed discount upang maiwasan ang maling singil. Binigyang-diin din ang kahalagahan ng paglalagay ng Taripa at hotline numbers sa bawat terminal, gayundin ang pagsusuot ng vest ng mga driver bilang pagkakakilanlan at para sa kaayusan at kaligtasan ng mga pasahero.

Pinaalalahanan din ang mga tricycle driver na panatilihin ang pagiging magalang at propesyonal sa kanilang mga pasahero, bilang bahagi ng kanilang mahalagang papel bilang frontliners sa komunidad at turismo ng bayan. Patuloy ang Sangguniang Bayan sa pakikipagtulungan sa sektor ng transportasyon upang matiyak ang ligtas at maayos na serbisyo sa bayan.

09/08/2026

Amendment of Lifeguard & Safety Measures Ordinance | Committee Hearing

Noong July 28, 2026, ginanap ng Sangguniang Bayan ang isang Committee Hearing kaugnay sa Amendment of Municipal Ordinance No. 31, Series of 2026 o ang Lifeguard and Safety Measures Ordinance, na pinangunahan ni SB James Darwin Castro, Committee Chairman on Peace and Order & Public Safety katuwang ang kanyang mga miyembro. Dinaluhan din ito ng mga kinatawan mula sa iba’t ibang tanggapan kabilang ang MDRRMO, MFARMC at Tourism Office upang talakayin at suriin ang mahahalagang probisyon ng Ordinansa. Kabilang sa mga napag-usapan ang pagpapalakas ng implementing mechanisms, paglalagay ng mas malinaw at naaayon sa batas na mga parusa at ang mas mahigpit na pagpapatupad nito sa mga resort, pribadong establisyimento at maging sa publiko.

Binigyang-diin sa pulong ang kahalagahan ng koordinasyon ng iba’t ibang ahensya, kabilang ang Bantay-Dagat, Coast Guard, at mga barangay, upang matiyak ang epektibong pagpapatupad ng mga patakaran para sa kaligtasan ng lahat ng bumibisita at naninirahan sa ating baybaying-dagat.

Sa kabuuan, layunin ng naturang pag-amyenda na higit pang mapalakas ang seguridad at kaligtasan, kasabay ng pagpapanatili ng maayos na operasyon ng mga resort at turismo sa ating bayan.

09/08/2026

Proposed Tourism Code of Morong | Public Hearing

Isinagawa ng Sangguniang Bayan ang isang Public Hearing hinggil sa panukalang Tourism Code ng Morong noong July 21, 2026. Pinangunahan ang pagdinig ni SB Kathyleen Vicedo, Committee Chairman on Tourism and Cultural Affairs at dinaluhan ito ng mga miyembro ng Sangguniang Bayan at iba’t ibang ahensya at sektor na may mahalagang papel sa pagpapaunlad ng turismo. Aktibong nagbigay ng kanilang mga suhestiyon at pananaw ang mga dumalo upang mas mapalakas at masiguro ang pagiging inklusibo at sustenable ng nasabing Ordinansa.

Sa pagdinig, tinalakay ang mahahalagang aspeto tulad ng pagpapalakas ng Tourism Council, pagre-regulate ng mga tourism establishments, pagpapabuti ng tourism data at reporting system, pangangalaga sa kalikasan at kultura, pati na rin ang kaligtasan ng mga turista at kapakanan ng lokal na komunidad. Ang inisyatibong ito ay patunay ng patuloy na pagsisikap ng Lokal na Pamahalaan ng Morong na magkaroon ng isang organisado at pangmatagalang plano para sa turismo na hindi lamang nagtataguyod ng kaunlaran kundi nagbibigay din ng benepisyo sa bawat taga-Morong.

03/08/2026

Pagtatatag ng Local People’s Council sa Morong | Public Hearing

Pinangunahan ni SB Jomar Albarda Castro, Committee Chairman on Cooperatives and People's Organizations, ang isinagawang Public Hearing noong July 22, 2026 hinggil sa Panukalang Ordinansa na naglalayong maitatag ang Local People's Council ng Bayan ng Morong. Layunin ng ordinansang ito na palakasin ang pakikilahok ng mga Civil Society Organizations (CSOs), People's Organizations (POs), Non-Government Organizations (NGOs), mga kooperatiba at iba pang samahang pangkomunidad sa pagbuo ng mga programa, polisiya at mahahalagang pagpapasya ng lokal na pamahalaan.

Dinaluhan ang pagdinig ng mga miyembro ng komite, mga kinatawan mula sa iba't ibang tanggapan, kasama sina MLGOO Gonzales, Jr. ng Department of the Interior and Local Government (DILG), Ms. Sagun ng CSO at mga kinatawan ng iba't ibang organisasyon sa bayan. Nagbahagi rin sila ng mahahalagang rekomendasyon upang higit pang mapabuti ang implementasyon ng nasabing ordinansa.

Sa naging talakayan, binigyang-diin ang kahalagahan ng pagkakaroon ng malinaw na sistema ng akreditasyon, mas matatag na representasyon ng mga organisasyon sa iba't ibang local special bodies at higit na pagpapalakas sa ugnayan ng pamahalaan at ng mamamayan. Patunay ang hakbang na ito na patuloy na isinusulong ng Pamahalaang Bayan ng Morong ang isang makatao at inklusibong pamamahala, kung saan ang bawat sektor ay may pagkakataong makilahok, makapagpahayag, at maging bahagi ng paghubog ng kinabukasan ng ating bayan.

01/08/2026

Pagdinig hinggil sa Alleged Illegal Hauling of Sand sa Sitio Fuerte, Brgy. Poblacion | Environmental Concerns

Pinangunahan din noong July 21, 2026 ni SB Jomar Albarda Castro, Committee Chairman on Environmental Protection and Natural Resources, ang isang Committee Hearing as a Whole ng Sangguniang Bayan kaugnay ng reklamong may kinalaman sa umano'y ilegal na paghahakot ng buhangin sa Sitio Fuerte, Brgy. Poblacion.

Dumalo sa pagdinig ang mga miyembro ng Sangguniang Bayan, kasama ang mga kinatawan mula sa Municipal Planning and Development Office (MPDO), Municipal Environment and Natural Resources Office (MENRO), Provincial Government–Environment and Natural Resources Office (PG-ENRO), DENR-Bagac at iba pang mga inimbitahang indibidwal na may kaugnayan sa usapin.

Sa pagdinig, tinalakay ang insidente noong July 8, 2026 kung saan naharang ang mga truck na may kargang buhangin na umano'y nagmula sa isang pribadong lupain sa Sitio Fuerte. Ibinahagi ng MPDO at MENRO ang kanilang mga naging obserbasyon at imbestigasyon, kabilang ang pagkakatuklas ng mga naihakot na buhangin na naitambak sa iba't ibang pribadong lugar. Ipinaliwanag naman ng kinatawan ng may-ari ng proyekto na ang buhangin ay nagmula sa paghuhukay para sa pundasyon ng isang residential development. Ayon sa kanila, ang pagpapahakot ng buhangin ay isinagawa sa mabuting hangarin upang maiwasan ang posibleng pinsala sa mga kalapit na kabahayan dahil sa nakaambang bagyo noong panahong iyon. Humingi rin sila ng paumanhin sa nangyari at nangakong hindi na ito mauulit.

Binigyang-diin ng PG-ENRO at MENRO na ang paghuhukay at paghahakot ng buhangin sa mga coastal areas ay mahigpit na kinokontrol ng batas sapagkat maaaring ito ay magdulot ng masamang epekto sa kalikasan, partikular sa marine biodiversity at sa mga baybaying nagsisilbing mahalagang habitat ng mga pawikan sa Morong. Ipinaalala rin na ang anumang ganitong gawain ay kinakailangang sumunod sa mga umiiral na permit at regulasyon.

Bilang resulta ng pagdinig, napagkasunduang maglalabas ang MENRO ng kaukulang Notice bilang pormal na dokumentasyon at paalala upang hindi na maulit ang naturang aktibidad. Tinalakay rin ng Komite ang paghahain ng mga rekomendasyon sa Pamahalaang Bayan upang higit pang mapalakas ang pagpapatupad ng mga batas at regulasyong naglalayong pangalagaan ang kapaligiran at likas na yaman ng Morong.

Patuloy na naninindigan ang Sangguniang Bayan ng Morong sa pagsusulong ng responsableng kaunlaran na may kaakibat na pangangalaga sa kalikasan, alinsunod sa umiiral na mga batas at sa kapakanan ng kasalukuyan at ng mga susunod na henerasyon.

01/08/2026

Usapin sa Environmental Concerns at Umano'y Illegal Quarrying sa Brgy. Nagbalayong | Committee Hearing

Noong July 21, 2026, pinangunahan ni SB Jomar Albarda Castro, Committee Chairman on Environmental Protection and Natural Resources, ang isang Committee Hearing as a Whole ng Sangguniang Bayan kaugnay ng pormal na reklamong inihain hinggil sa umano'y ilegal na quarrying at sa perwisyong dulot ng pagragasa ng putik sa farm-to-market road sa Brgy. Nagbalayong. Dinaluhan ang pagdinig ng mga Miyembro ng Sangguniang Bayan kasama ang mga kinatawan mula sa Municipal Planning and Development Office (MPDO), Municipal Environment and Natural Resources Office (MENRO), Provincial Government Environment and Natural Resources Office (PG-ENRO), Department of Environment and Natural Resources (DENR), DILG-Morong, mga opisyal ng Barangay Nagbalayong, mga apektadong residente, at ng nagpapakilalang may-ari ng lupa na siyang iniuugnay sa naturang reklamo.

Sa pagdinig, malayang naipahayag ng bawat panig ang kanilang mga paliwanag at saloobin. Ipinaliwanag ng nagpakilalang may-ari na ang isinagawang paghuhukay ay bahagi umano ng pag-develop ng kanilang lupain upang patagin ang lugar at magkaroon ng mas ligtas na daanan para sa mga naninirahan sa lugar. Samantala, binigyang-diin ng mga kinatawan ng LGU, PG-ENRO at DENR na ang anumang land development, excavation, hauling, o pagkuha ng lupa at bato ay kinakailangang sumunod sa umiiral na batas at dapat na kumuha muna ng kaukulang Development Permit at iba pang kinakailangang requirements bago magsagawa ng anumang operasyon sa lugar.

Ipinaliwanag din ng PG-ENRO na bagama't maaaring pribadong pag-aari ang lupa, ang mga mineral at quarry resources ay nananatiling pag-aari ng Gobyerno at ang anumang komersyal na pagkuha o paglalabas ng mga ito ay dapat may kaukulang pahintulot at pagbabayad ng itinakdang buwis alinsunod sa batas.

Bilang tugon sa agarang epekto ng pagguho ng lupa at pag-ipon ng putik sa kalsada, naglahad si Kap Mhar Geraldez ng mga pansamantalang hakbang tulad ng paglalagay ng sandbags at paggawa ng pansamantalang catch basin upang mapigilan ang pagragasa ng putik sa tuwing may malakas na ulan.

Iminungkahi naman ni MLGOO Mr. Gonzales, Jr. na siyang kinatawan din ng DILG na sa mga susunod na pagkakataong muling magkaroon ng pagguho ng lupa at pagragasa ng putik sa farm-to-market road, dapat na tawagin at atasan din ang mga operator at may-ari ng mga heavy equipment na ginamit sa naturang excavation upang sila mismo ang tumulong sa paglilinis at pag-aayos ng napinsalang bahagi ng kalsada. Binigyan niyang diin na sila rin ay may pananagutan sapagkat ang kanilang operasyon ang isa sa mga naging ugat ng suliranin. Aniya, hindi nararapat na ang Lokal na Pamahalaan at ang Barangay lamang ang paulit-ulit na gumagastos ng pondo ng bayan sa paglilinis ng problemang hindi naman sila ang may direktang gawa. Sa ganitong paraan, maisusulong ang pananagutan ng mga sangkot at maiiwasan ang patuloy na pag-aaksaya ng pondo ng mga mamamayan.

Sa pagtatapos ng pagdinig, muling binigyang-diin ng Komite ang kahalagahan ng pagsunod sa umiiral na batas, pangangalaga sa kalikasan at pagtutulungan ng mga mamamayan at iba't ibang ahensya ng pamahalaan upang makamit ang isang ligtas at may-boses na pamayanan.

Sangguniang Bayan ng Morong Bataan

28/08/2026

17/08/2026

09/08/2026

09/08/2026

09/08/2026

09/08/2026

09/08/2026

03/08/2026

01/08/2026

01/08/2026

Address

Website

Alerts

Shortcuts

Share

Category

Listing takedown request