17/01/2026
𝗢𝗣𝗜𝗦𝗬𝗔𝗟 𝗡𝗔 𝗣𝗔𝗛𝗔𝗬𝗔𝗚 𝗔𝗧 𝗣𝗔𝗡𝗔𝗪𝗔𝗚𝗔𝗡 𝗡𝗚 𝗨𝗣 𝗔𝗖𝗧𝗜𝗢𝗡 𝗡𝗘𝗧𝗪𝗢𝗥𝗞 𝗣𝗔𝗥𝗔 𝗦𝗔 𝗙𝗜𝗥𝗦𝗧 𝗗𝗔𝗬 𝗥𝗔𝗚𝗘 𝟮𝟬𝟮𝟲
ENERO 19, 2025 | 2:00 PM
HUMANITIES STEPS | WEAR RED!
Sa pagsisimula ng ikalawang semestre, tumatambad at sinasalubong na naman tayo ng samo’t saring problema’t krisis sa Sektor ng Edukasyon! Nakalinya na naman ang kakulangan sa sabsidyo sa mga mag-aaral, kakapusan sa pasilidad, nakabinbin na mga pagawain sa loob ng Unibersidad, kakulangan sa mga g**o, kontraktwalisasyon, komersyalisadong mga serbisyo, banta ng redtagging, palpak na modernisasyon ng mga mekanismo, at mga neoliberal na polisiyang nagpapalugmok sa hanay ng sangkaestudyantehan, kaguruan at mga kawani habang naglilingkod sa mga naghaharing-uri, kapitalista at dayuhang impresa sa tulak ng pagkahumaling sa world rankings at globalisasyon.
Pagod na pagod, sawang-sawa at lubog na lubog na ang multisektoral na hanay ng sektor sa tila walang katapusang siklo, paulit-ulit na paghihirap, pagtitiis at pagpasan sa pananagutan na inabandona ng Estado sa usapin ng edukasyon at serbisyong panlipunan.
Ang komunidad ng UPLB ay hindi hiwalay sa kolektibong danas ng sambayanan. Damang-dama ang kakapusan sa pondo at alokasyon sa nilagdaan ni Marcos, Jr. na General Appropriations Act. Ipinagmamalaki ang mahigit na 29 Bilyong piso na inilaan sa UP System ang pinakamalaking budget sa nakalipas na mga taon ngunit matatandaan na malayo pa ito sa mungkahi na mahigit 49 Bilyong piso upang tunay na matugunan ang pangangailangan, maipagkaloob ang pagkakataong makapag-aral nang may dignidad ang mga Iskolar ng Bayan, tunay na masuportahan ang holistikong kapakanan ng mga manggagawa at makapagbukas pa ng oportunidad sa mas marami pang kabataan na makapaglingkod sa Bayan.
Kaya, makatao at makatarungan na maghimagsik, magalit at magpanagot sa Estado na pinamumunuan ng Hari at Reyna ng Korapsyon na sina Marcos, Jr. at Sara Duterte na mga tagapamandila ng katiwalian, malawakang pandarambong sa kaban ng Bayan at pandarahas para sa pagsusulong ng makasariling mga interes!
Panagutin at singilin ang mga kasabwat na politiko na matagumpay na nakapagpasok pa rin ng bilyong-bilyong pork barrel na insulto, pambubusabos at pagyurak sa mga batayang karapatan ng mamamayan na makaakses sa de-kalidad ng edukasyon at serbisyong panlipunan.
Sa ganitong kalunos-lunos na kalagayan, pangangailangan na sumama at makiisa sa magaganap na First Day Rage sa Lunes, Enero 19, 2026! Ipakita ang nagkakaisa at nag-aalimpuyong galit ng sangkaestudyantehan, kaguruan at kawani ng UPLB! Magkita-kita tayo sa Hum Steps sa ganap na 2:00 ng hapon at doon natin patambulin ang ating mga panawagan na:
𝙎𝙚𝙧𝙗𝙞𝙨𝙮𝙤 𝙨𝙖 𝙏𝙖𝙤, 𝙒𝙖𝙜 𝙂𝙖𝙬𝙞𝙣𝙜 𝙉𝙚𝙜𝙤𝙨𝙮𝙤!
𝙎𝙖𝙝𝙤𝙙 𝙄𝙩𝙖𝙖𝙨! 𝙋𝙧𝙚𝙨𝙮𝙤 𝙄𝙗𝙖𝙗𝙖!
𝙈𝙖𝙧𝙘𝙤𝙨, 𝙎𝙞𝙣𝙜𝙞𝙡𝙞𝙣! 𝘿𝙪𝙩𝙚𝙧𝙩𝙚, 𝙋𝙖𝙣𝙖𝙜𝙪𝙩𝙞𝙣!
𝙋𝙤𝙣𝙙𝙤 𝙨𝙖 𝙀𝙙𝙪𝙠𝙖𝙨𝙮𝙤𝙣, 𝙃𝙞𝙣𝙙𝙞 𝙨𝙖 𝙆𝙤𝙧𝙖𝙥𝙨𝙮𝙤𝙣!
𝘼𝙣𝙜 𝙋𝙤𝙣𝙙𝙤 𝙨𝙖 𝙏𝙖𝙤, 𝙃𝙞𝙣𝙙𝙞 𝙨𝙖 𝙋𝙤𝙡𝙞𝙩𝙞𝙠𝙤!
