12/05/2025
𝗠𝗘𝗡𝗦𝗔𝗛𝗘 𝗡𝗜 𝗚𝗔𝗪 𝗝𝗢𝗝𝗢
Alang sa akong mga supporters, volunteers, mga kaperentihan, akong pamilya ug sa akong asawa ug anak, wala man ako mahatagi ug higayon nga maka alagad sa atong Probinsya isip Bise- Gobernador, buot nako ipa abot kaninyong tanan ang akong kinasingkasing nga pasalamat.
Ang resulta sa election karung adlawa dili maoy kataposan sa tanan, kundili maoy sinugdanan sa laing lakang para sa laing dalan nga pagasubayon nato ning kalibutana.Mangayo usab ako ug pasaylo sa mga tawo nga misalig ug naglaom sa akong kandidatura diin napakyas gayud kita kay wala man gitugot sa kahigayunan.
Alang sa akong asawa ug anak nga maoy nag sakripisyo sa akong desisyon sa paglansar isip Bise-Gobernador, mangayo usab ako ug pasaylo, apan dili pa ulahi ang tanan, taas pa ang panahon para ako maka hulip sa akong mga kakulangon kay lagi akong gi palabi mao man ang dalan sa politika sa taas-taas na nga panahon.
Intensyon man o dili, sa tawo o mga tawo nga mi-saad ug mipasalig nga hingpit gayud suportahan ang akong kandidatora, diin mao usab ang hinungdan nga kita milaom ug mi desisyon sa paglansar, apan ang maong mga saad usa lang diay ka taphaw nga pasalig, ako nang gi hatag kaninyu ang akong pasaylo, ug panahon na sa atong panagbulag sa atong mga dalan; ang tanan dunay kinutuban.
Sa akong mga kaigsuonan sa akong pinangga nga lungsod sa Leon Postigo, nga naghatag kanako usab ug inspirasyon, hilabi na ni Mayor BobbyJam Jamora, ug sa tibuok Team Serbisyo-Gugma, daghang salamat.
Sa tanang mga kauban nga kandidato sa tibuok probinsya, daghan kaayong salamat kaninyo. Salamat sa kahigayunan nga kita nagka kauban sa kalipay man ug kasakit, hilabi na panahon sa kampanya. Sa akong mga kauban nga kandidato nga gi-buligan sa kahigayunan, akong itunol kaninyu ang akong kinasing kasing nga pahalipay, ug sa akong mga kauban nga wala hatagi sa kahigayunan, ang kapildihan dili maoy katapusan sa tanan,padayon kita sa paghimu ug mga lakang para sa kaayuhan sa atong katilingban.
Sa mga kandidato sa pikas kampo nga gihatagan sa kahigayunan nga mu serbisyo, gikan sa position sa Governor hangtod sa konsehal sa lungsod, hilabi na sa akong kaatbang, Vice-Gov. Julius Napigquit, akong kinasing kasing itunol usab kaninyu ang akong pahalipay.
Nahuman na ang election, mipakanaog na ang katawhan sa atong Probinsya sa ilang desisyon, ato kining tahuron ug i-respeto para sa kaayuhan sa atong katawhan sa Probinsya.
Ang Ginoo maga uban kanatong tanan.
DAGHANG SALAMAT🫶🙏
