26/05/2026
"Ayaw sa jud mog reklamo taga syudad sa Davao kay basura ra ang problema ninyo. Kami nga naa sa bukid, kuridas na tanan —kagutom, kawad-on, pagkawala sa panginabuhian, ug adunay mga pamilya nga hangtod karon nangita gihapon sa ilang mga minahal."
Mao kini ang masakit nga mensahe gikan sa usa ka residente nga si Jerame nga direktang naapektuhan sa nahitabong trashslide.
Samtang daghang Dabawenyo ang nag-atubang sa problema sa pagtipon sa basura tungod sa temporaryong pagsuspende sa pagpadump, mas grabe ang kahimtang sa gatusan ka pamilya nga nagsalig sa maong lugar alang sa ilang adlaw-adlaw nga panginabuhian.
Dili lamang ang mga residente ang naapektuhan. Apektado usab ang mga truck drivers, waste workers, ug uban pang mga trabahante nga ang ilang kita nagdepende sa operasyon sa dumpsite. Samtang naghulat sa hingpit nga solusyon, padayon ang ilang pag-antos ug pag-atubang sa kawalay kasiguruhan.
Sa panahon nga ingon ani, gipahinumdoman kita nga ang problema sa basura dili lang mahitungod sa baho o kalimpyo. Aduna kini'y mas lawom nga epekto sa kinabuhi sa daghang katawhan.
Alang sa tanan, hinaut nga magmalumo kita sa pagtan-aw sa sitwasyon ug magtinabangay isip usa ka komunidad. Samtang naghulat sa kasulbaran, atong hinumdoman nga sa matag krisis adunay mga istorya sa pag-antus nga kinahanglan usab nato madungog ug masabtan.
