05/09/2025
Iginiit ng na para mailipat ang pagmamay-ari, kailangang may kasulatan ang donasyon ng lote ng isang subdivision sa lokal na pamahalaan, at dapat nakasaad sa pareho o hiwalay na kasulatan ang pagtanggap dito.
Sa Desisyon na isinulat ni Associate Justice Jhosep Y. Lopez, nagpasya ang Ikalawang Dibisyon ng Korte Suprema na bigo ang Quezon City (QC) local government unit (LGU) na patunayang naibigay sa lungsod ang mga bakanteng lote at daanan o kalsada sa Capital Park Homes Subdivision (CPHS) para magamit ng publiko dahil hindi ito nagpakita ng deed of donation o anumang pruweba ng pagtanggap ng nasabing donasyon.
Naghain ng petisyon si Rainier L. Madrid (Madrid), isang QC taxpayer at residente ng kalapit na subdivision ng CPHS, para matukoy kung sino ang nagmamay-ari ng mga bakanteng lote at daanan. Naging bukas na sa publiko ang mga lote, na dating nasa eksklusibong paggamit ng mga CPHS homeowners.
Sinabi ni Madrid na gumagamit ng malaking pondo ng publiko ang QC LGU para sa pagpapabuti ng mga ari-arian na ito habang ang mga ito ay nasa pribadong pag-aari. Binigyang diin niya na nabigo si VV Soliven, developer ng CPHS, na magpakita ng patunay na ang mga ari-arian ay naibigay sa QC LGU. Binigyang-diin niya na kung walang katibayan ng donasyon, mananatiling pribado at hindi maaaring ituring bilang pampublikong pag-aari ang mga ito.
Nanindigan ang QC LGU na sa ilalim ng QC Ordinance No. 5852, Series of 1964, dapat maglaan ang mga subdivision ng 6% ng kanilang kabuuang bakanteng lote para sa pampublikong paggamit at ibigay ang mga ito sa lungsod bago maaprubahan ang anumang subdivision plan. Nabanggit nito na naaprubahan noong Agosto 1969 ang subdivision plan ng CPHS na nagpapahiwatig na sumunod sa ordinansa ang CPHS.
Inamin ng Capital Park Homeowners Association, Inc. (CPHAI) na wala itong deed of donation ngunit binanggit ang resolusyon ng board na nagsasaad na donasyon sa QC LGU ang mga ari-arian.
Kinuwestiyon din nito ang katayuan ni Madrid na maghain ng petisyon, dahil hindi siya direktang apektado.
Tinanggihan ng Regional Trial Court (RTC) ang petisyon dahil sa kawalan ng cause of action at sinabing hindi real party-in-interest si Madrid.
Hindi sumang-ayon ang Court of Appeals (CA), na kinilala ang karapatan ni Madrid na magsampa ng kaso dahil maaari siyang maapektuhan ng diumano'y maling paggamit ng pampublikong pondo. Iginiit nito na nananatiling pribadong pag-aari ang mga lugar na pinag-uusapan dahil walang patunay na nagdonate sa QC LGU ang subdivision developer.
Pinagtibay ng Korte Suprema ang desisyon ng CA na binibigyang-diin na dapat patunayan ng QC LGU na may bisa ang paglilipat ng ari-arian pabor dito. Gayunpaman, hindi nagbigay ang LGU ng deed of donation o anumang patunay ng pagtanggap, gaya ng hinihingi sa ilalim ng Civil Code.
Nilinaw ng Korte Suprema na hindi awtomatikong magiging pag-aari ng gobyerno ang mga bakanteng lote at daanan sa mga subdivision. Hindi maaaring umasa lang ang mga LGU sa mga ordinansa o batas para angkinin ang pagmamay-ari. Kinakailangang may kasulatan ang donasyon para ilipat ang pagmamay-ari nang legal. Kung wala ito, mananatiling pribado at hindi maaaring angkinin ng lokal na pamahalaan ang ari-arian.
Basahin ang press release sa https://tinyurl.com/499tc8hm.
Basahin ang Desisyon sa https://tinyurl.com/bde7hv7u.
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
