23/04/2026
Maayong adlaw.
Gipahibalo ang tanang residente sa Barangay Kaatuan, Barangay Alanib (Lagdik, Lakapon, Patpat, ug Lower Patag), Barangay Baclayon, Barangay Balila, Barangay Poblacion (P5, P6, P7, P8, Paglaum Village, ug Babahagon), Barangay Bantuanon, Barangay Kulasihan, ug Barangay Bugcaon, nga sa pagkakaron adunay pagkawala sa suplay sa tubig sa inyong mga lugar.
Kini nga kahimtang tungod sa taas nga hulaw nga nakaresulta sa dako nga pagkunhod sa tubig gikan sa Kaatuan Water Source.
Sugod pa niadtong March 16, 2026, ang Engineering Section nagpatuman ug hugot nga pagmonitor sa lain-laing valve settings ug supply scheduling aron madumala ug mapalugwayan ang magamit nga suplay sa tubig. Apan, tungod sa padayon nga pagkunhod sa lebel sa tubig, dili na kini igo aron mapadayon ang distribusyon sa tubig. Dugang pa, ang suplay gikan sa Songco Water Source gigamit aron motabang sa ubos nga mga barangay, apan kini usab dili igo aron matubag ang panginahanglan.
Gipaningkamotan usab ang pagpangita ug alternatibong mga water sources, lakip na ang pakig-coordinate sa Barangay Capitan Juan (Brgy. Captain - NOLITO MORE BERCERO) aron magamit ang linya sa NTF-ELCAC. Apan, ang kasamtangang kapasidad sa 4-inch pipeline dili igo aron masuplayan ang tanang apektadong lugar.
Dugang pa, ang pagsulay sa pag-divert sa tubig padulong sa Barangay Bugcaon ug Barangay Kulasihan wala nagmalampuson tungod kay dili na makaabot ang suplay sa maong mga lugar.
Ang dugang nga mga lakang sama sa paggamit sa Kalabasaon Water Source – LGU Managed (nag-operate gikan 7:00 PM hangtod 4:00 AM) ug ang kasabutan sa Unifrutti Philippines alang sa paggamit sa ilang abandonadong catchment sa Cinchona Forest, wala usab nagmalampuson tungod sa pagkahinay na supply sa Kulasihan River.
Isip tubag niini nga sitwasyon, ang mosunod nga mga aksyon ginahimo:
• Ang LGU sa Lantapan nagsugod na ug water rationing sa Barangay Bantuanon, Barangay Bugcaon, ug Barangay Kulasihan pinaagi sa hydrants sa Lantapan Water District ug uban pang available nga tinubdan sa tubig under sa NTF-ELCAC and LGU. Apan, kini nga mga paningkamot dili pa gihapon igo aron matubag ang panginahanglan sa komunidad.
• Ang Lantapan Water District, kauban ang LGU Lantapan (pinaagi sa MEEDO) ug BGU Kulasihan, mag-instalar ug hydrant nga mahimong refilling station para sa mga water tanker. Ang mga residente sa Barangay Kulasihan mahimong makakuha og tubig direkta gikan niini apan sa limitado or schedule nga pamaagi.
• Ang water rationing sa Barangay Bugcaon pinaagi sa LGU-MDRRMO tankers nagsugod na. Ang regular nga schedule ginapinal na base sa mga kasabutan sa emergency coordination meetings.
• Ang Lantapan Water District padayon nga gaproseso karon sa pag-abang ug dugang nga mga water tanker aron mas mapalig-on ang rationing operations.
• Ang mga residente nga nanginahanglan ug water rationing gina-awhag nga makig-coordinate sa ilang Barangay Government Units (BGUs). Ang mga request i-verify ug i-consolidate sa BGUs sa dili pa ipadala sa Lantapan Water District aron masiguro ang hapsay nga scheduling ug routing, labi na tungod sa limitasyon sa fuel ug dili kasiguruhan sa gidugayon sa sitwasyon.
Ang dakong pag-ubos sa produksyon sa tubig direkta nga resulta sa taas nga init nga nakaapekto sa atong mga water sources.
Mapinanggaon namong gihangyo ang tanan nga:
• Gamita ang tubig sa hustong paagi ug unaha ang importante nga panginahanglan
• Magtipig ug tubig kung adunay suplay
• I-report dayon ang bisan unsang leak o ilegal nga koneksyon
Nangayo kami sa inyong pasensya ug pagsabot samtang padayon namong ginatubag kini nga sitwasyon. Dugang nga updates ipahibalo sa umaabot.
Nagpasalamat usab kami sa LGU Lantapan nga gipangulohan ni Hon. Municipal Mayor Ricky James Balansag; MDRRMO nga gipangulohan ni Sir Rodolfo Bebanco Jr.; MEEDO nga gipangulohan ni Sir Donard Jay Montecillo; ug sa mga Barangay Officials sa Barangay Captain Juan ug Barangay Kulasihan sa ilang padayon nga suporta ug koordinasyon.
Daghang salamat sa inyong pagsabot ug kooperasyon.
LWD Management
