27/05/2026
‼️‼️
Gipaimbestigahan sa usa ka miyembro sa Sangguniang Panlalawigan sa Bohol ang gikatahong iregularidad sa implementasyon sa TUPAD Program sa lungsod sa Carmen, lakip ang alegasyon nga adunay usa ka non-government organization (NGO) nga nangolekta og kwarta gikan sa mga benepisyaryo.
Sa iyang privilege speech atol sa regular nga sesyon sa Sangguniang Panlalawigan, gibutyag ni Bokal Nathaniel Binlod ang mga reklamo nga nadangat sa iyang buhatan kabahin sa giingong papel sa usa ka pribadong grupo nga ginganlan og Bag-ong Pilipinas Citizens Movement (MPR) sa pagdumala o pagpahigayon sa TUPAD Program sa Carmen.
Matud ni Binlod, gikabalak-an niya ang mga report nga wala kunoy husto nga koordinasyon ug kahibalo ang mga opisyal sa barangay ug bisan ang lokal nga kagamhanan sa Carmen mahitungod sa implementasyon sa maong programa.
Mas nakahatag pa og kabalaka, sumala kaniya, ang alegasyon nga adunay kaltas nga mokabat og P1,400 gikan sa sweldo sa mga benepisyaryo. Giingon pa nga kini kuno alang sa gasto sa operasyon sama sa gasolina, transportasyon, ug uban pang kalihokan.
Gibutyag usab ni Binlod nga adunay giingong pamahayag gikan sa usa ka coordinator sa pribadong grupo sa opisina sa mayor nga, “Ug dili musugot, among ibalhin sa laing lungsod,” nga maoy dugang hinungdan sa iyang kabalaka.
Base sa iyang gihimong pagsusi, gipahinumdoman ni Binlod nga ang TUPAD o Tulong Panghanapbuhay sa Ating Disadvantaged/Displaced Workers usa ka programa sa gobyerno nga direktang gidumala sa Department of Labor and Employment (DOLE), diin ang ahensya lamang ang adunay katungod sa pagdumala niini.
Bisan tuod mahimong moapil ang mga pribadong organisasyon, matud niya nga kinahanglan una silang akreditado o awtorisado sa DOLE ug adunay koordinasyon sa lokal nga kagamhanan ug barangay aron masiguro ang hustong implementasyon sa programa.
Gikutlo usab ni Binlod ang Department Order No. 239, Series of 2023 sa DOLE, nga nagdili sa bisan kinsa nga mangayo o mangolekta og bisan unsang kantidad gikan sa mga benepisyaryo sa TUPAD. Gipasabot niini nga libre ang aplikasyon sa programa ug hugot nga gidili ang unauthorized deductions o “cuts” gikan sa ayuda sa mga benepisyaryo.
Tungod niini, nangutana si Binlod nganong walay pahibalo ang mga barangay ug lokal nga gobyerno sa implementasyon sa programa sa ilang lugar, ug kon legal ba ang giingong kaltas sa sweldo sa mga benepisyaryo.
Giingon ni Binlod nga ang TUPAD gituyo aron makatabang sa mga kabus ug displaced workers, busa kinahanglan nga ang bug-os nga kantidad sa ayuda direktang madawat sa mga benepisyaryo ug dili makuhaan pinaagi sa kuwestiyonableng mga kaltas.
Gipadayag usab niya ang kabalaka nga basin adunay susamang hitabo sa ubang lungsod sa lalawigan sa Bohol. Tungod niini, mihangyo siya nga i-refer ang maong isyu ngadto sa Committee on Labor and Employment aron masuta ug mapangayuan og klaripikasyon ang DOLE.
