18/08/2026
चदुली–हर्थुङ्गा–लिसेपानी हुँदै माटेचौर जोड्ने मोटरबाटो निर्माणका क्रममा चरम लापरबाही हुँदा स्थानीय बासिन्दा आधारभूत खानेपानी सुविधाबाटै वञ्चित हुनुपर्ने अवस्था सिर्जना भएको हो।
स्थानीयका अनुसार सडक खन्ने क्रममा त्यस क्षेत्रका दुईवटा महत्वपूर्ण खानेपानीका मुहानहरूमा प्रत्यक्ष क्षति पुगेको छ। मुहान पुरिनुका साथै जथाभावी खनिएको माटो र लेदोका कारण आसपासको वनजंगलमा व्यापक क्षति पुगेको छ भने तल्लो क्षेत्रका घरबस्तीहरूसमेत पहिरोको उच्च जोखिममा परेका छन्।
"विकास निर्माण हुनु राम्रो कुरा हो, तर जनताको पिउने पानी नै खोसेर र बस्ती नै जोखिममा पारेर गरिने विकासले हामीलाई थप समस्यामा पारेको छ," एक स्थानीयले आक्रोश पोख्दै भने, "दैनिक उपभोग गर्ने पानीको मुहान नै मासिएपछि हाम्रो दैनिकी अस्तव्यस्त बनेको छ।"
स्थानीय बासिन्दाहरूले वातावरणीय प्रभाव र वातावरणीय सन्तुलनको ख्यालै नगरी डोजर चलाइएको आरोप लगाएका छन्। समयमै यसको समाधान नगरिए दीर्घकालीन रूपमा सिङ्गो बस्ती नै विस्थापित हुनसक्ने खतरा बढेको उनीहरूको भनाइ छ।
यसैबीच, प्रभावित स्थानीयहरूले सम्बन्धित स्थानीय तह, वडा कार्यालय, सडक निर्माण उपभोक्ता समिति तथा प्राविधिक निकायको ध्यानाकर्षण गराउँदै तत्काल समस्या समाधान गर्न माग गरेका छन्। उनीहरूले क्षतिग्रस्त खानेपानीका मुहानको तत्काल संरक्षण गरी पानीको वैकल्पिक व्यवस्था गर्न र सडक निर्माणलाई प्राविधिक तथा वातावरणीय सीमाभित्र रहेर मात्र अघि बढाउन माग राखेका छन्।
सम्बन्धित निकायले भने यस विषयमा अविलम्ब कदम चाल्नुपर्ने र जनताको आधारभूत अधिकारको रक्षा गर्दै सुरक्षित विकास निर्माणको बाटो पहिल्याउनुपर्ने देखिन्छ।
मल्लरानी गाउँपालिका प्यूठान
