11/06/2026
⚽ फिफा विश्वकप २०२६ आज रातिदेखि सुरु हुँदै-
काठमाडौं । विश्व फुटबलको सबैभन्दा ठूलो महोत्सव फिफा विश्वकप २०२६ को २३औँ संस्करण आज रातिदेखि उत्तर अमेरिकामा औपचारिक रूपमा सुरु हुँदैछ। इतिहासमै पहिलो पटक अमेरिका, मेक्सिको र क्यानडा ले संयुक्त रूपमा आयोजना गरेको यो प्रतियोगिता फुटबल इतिहासकै सबैभन्दा ठूलो विश्वकपका रूपमा हेरिएको छ।
प्रतियोगिताको उद्घाटन खेल मेक्सिको सिटीस्थित ऐतिहासिक एस्टाडियो एस्टेका रंगशालामा घरेलु टोली मेक्सिको र दक्षिण अफ्रिकाबीच हुनेछ। उक्त खेल नेपाली समयअनुसार राति १२:४५ बजे सुरु हुने तालिका रहेको छ।
यस संस्करणमा कीर्तिमानी ४८ टोली सहभागी छन्। प्रतियोगिताभर १०४ खेल खेलाइनेछन्। फिफाले यसपटक कुल ६५ करोड ५० लाख अमेरिकी डलर पुरस्कार राशि निर्धारण गरेको छ, जसमध्ये विजेता टोलीले ५ करोड अमेरिकी डलर प्राप्त गर्नेछ।
विश्वभरका उत्कृष्ट खेलाडीहरू मैदानमा आफ्नो प्रतिभा प्रदर्शन गर्न तयार छन् भने करोडौँ फुटबल समर्थकहरू प्रत्यक्ष तथा विभिन्न प्रसारण माध्यममार्फत विश्वकपको रोमाञ्चक यात्राको प्रतीक्षामा छन्।
