अखिल क्रान्तिकारी

02/08/2026

अखिल नेपाल राष्ट्रिय स्वतन्त्र विद्यार्थी यूनियन ( क्रान्तिकारी ) , केन्द्रीय समिति ।
मिति : २०८३ श्रावण १७ गते

प्रेस विज्ञप्ति

पश्चिम नवलपरासीको सुस्ता गाउँपालिका अन्तर्गत नेपाली भूभागमा भारतीय सशस्त्र सीमा बल (एसएसबी) ले अनाधिकृत रूपमा प्रवेश गरी स्थानीय जनताले नारायणी नदीको कटानबाट बस्ती जोगाउन निर्माण गरेको १३२ मिटर लामो अस्थायी बाँध बलपूर्वक भत्काएको घटनाप्रति अखिल (क्रान्तिकारी) को गम्भीर ध्यानाकर्षण भएको छ।

सीमा मानिँदै आएको स्थानभन्दा सयौं मिटर नेपालभित्र प्रवेश गरी नेपाली भूमिमा निर्माण भएको तटबन्ध भत्काउनु र नेपाली नागरिकमाथि दादागिरी प्रदर्शन गर्नु नेपालको सार्वभौमसत्ता, भौगोलिक अखण्डता तथा अन्तर्राष्ट्रिय सीमा मान्यताको घोर उल्लङ्घन हो। भारतीय विस्तारवादको यस मिचाहा, हस्तक्षेपकारी र हेपाहा प्रवृत्तिको अखिल (क्रान्तिकारी) घोर निन्दा तथा कडा शब्दमा भर्त्सना गर्दछ।

यस घटनाप्रति नेपाल सरकारको निरीह, मौन र प्रभावहीन भूमिकाप्रति हामी गम्भीर दुःख व्यक्त गर्दछौं। आफ्नै भूमिमा विदेशी सुरक्षा बलले हस्तक्षेप गर्दा पनि सरकार प्रभावकारी रूपमा उभिन नसक्नु राष्ट्रिय स्वाभिमानमाथिको गम्भीर प्रश्न हो।

अखिल (क्रान्तिकारी) नेपाल सरकारसँग भारतीय पक्षसमक्ष तत्काल कडा कूटनीतिक विरोध जनाउन, सुस्ता क्षेत्रमा नेपाली सुरक्षाकर्मीको उपस्थिति सुदृढ गर्न, स्थायी तटबन्ध निर्माण गर्न तथा नेपाली भूमि, सीमा र नागरिकको सुरक्षाको प्रभावकारी ग्यारेन्टी गर्न जोडदार माग गर्दछ। राष्ट्रिय स्वाधीनता, सार्वभौमसत्ता र भौगोलिक अखण्डताको रक्षाका लागि सरकार गम्भीर, दृढ र जिम्मेवार बन्न पनि हामी आग्रह गर्दछौँ।

क्रान्तिकारी अभिवादनसहित!

विजय प्रकाश शर्मा सापकोटा
( अध्यक्ष )

31/07/2026

अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी)
केन्द्रीय समिति ।

मिति : २०८३ साउन १५ गते

प्रेस विज्ञप्ति

पूर्वी तराई तथा मधेस प्रदेशका विभिन्न जिल्लाहरूमा जारी कर्फ्यु तथा असहज सुरक्षा अवस्थाका कारण एम.ए. लगायत उच्च शिक्षाका परीक्षार्थीहरू गम्भीर अन्योलमा परेका छन्। यस्तो परिस्थितिमा विद्यार्थीहरूले सुरक्षित, शान्तिपूर्ण र निर्भय वातावरणमा परीक्षा दिन पाउने अधिकारको सम्मान गर्दै सम्बन्धित निकायसँग तत्काल परीक्षा सञ्चालनका लागि आवश्यक वातावरण निर्माण गर्न अनेरास्ववियू (क्रान्तिकारी) केन्द्रीय समिति जोडदार माग गर्दछ।

यदि तत्काल शान्तिपूर्ण र सुरक्षित वातावरण सुनिश्चित गर्न नसकिने अवस्था रहेमा, विद्यार्थीहरूको जीवन, सुरक्षा तथा शैक्षिक भविष्यलाई मध्यनजर गर्दै परिस्थिति सहज नहुन्जेलसम्म परीक्षा तालिका परिमार्जन गरी नयाँ मिति सार्वजनिक गर्न सम्बन्धित विश्वविद्यालय प्रशासनसमक्ष हाम्रो स्पष्ट माग रहेको छ।

विद्यार्थीहरूको शैक्षिक भविष्य कुनै पनि परिस्थितिमा प्रभावित नहोस् भन्ने उद्देश्यका साथ जिम्मेवार, संवेदनशील र विद्यार्थीमैत्री निर्णय लिन सम्बन्धित सबै निकायको गम्भीर ध्यानाकर्षण गराउँदछौँ।

क्रान्तिकारी अभिवादन सहित !
...................................
विजय प्रकाश शर्मा सापकोटा
( अध्यक्ष )

23/07/2026

23/07/2026

💐६७औँ स्थापना दिवसको हार्दिक शुभकामना! 💐
ज्ञान, अनुसन्धान र नवप्रवर्तनको उज्यालो फैलाउँदै अघि बढोस् त्रिभुवन विश्वविद्यालय।

17/07/2026

* प्रेस वक्तव्य *
मिति : २०८३ श्रावण १ गते

विषय: शिक्षकको गरिमा र शिक्षण पेशामाथि प्रहार गर्ने 'मास्टर्नी' गीतमाथि तत्काल प्रतिबन्ध र कानुनी कारबाहीको माग
हालै सार्वजनिक गरिएको 'मास्टर्नी' गीत तथा भिडियोले शिक्षकको गरिमा, शिक्षण पेशा, गुरु - शिष्य सम्बन्ध तथा महिलाको सम्मानमाथि प्रहार गर्दै विकृत, अश्लील र उपभोक्तावादी सांस्कृतिक प्रवृत्तिलाई प्रश्रय दिएको सामग्रीप्रति अखिल (क्रान्तिकारी) को गम्भीर ध्यानाकर्षण भएको छ।
कला र अभिव्यक्तिको स्वतन्त्रताको नाममा समाजका सम्मानित पेशा, सामाजिक मूल्य-मान्यता र सांस्कृतिक मर्यादामाथि प्रहार गर्ने यस्ता सामग्री कुनै पनि दृष्टिकोणबाट स्वीकार्य हुन सक्दैनन्। त्यसैले सम्बन्धित निकायसँग उक्त गीत तथा भिडियोमाथि तत्काल प्रतिबन्ध लगाई, यस्ता विकृतिलाई प्रश्रय दिने निर्माता, निर्देशक, कलाकार तथा सम्बन्धित सबै पक्षमाथि प्रचलित कानुनबमोजिम आवश्यक छानबिन गरी कानुनी कारबाही गर्न जोडदार माग गर्दछौं।
साथै, शिक्षाको गरिमा, शिक्षकको सम्मान तथा स्वस्थ राष्ट्रिय संस्कृतिको संरक्षणका पक्षमा दृढतापूर्वक उभिँदै विकृत, अश्लील र उपभोक्तावादी सांस्कृतिक अतिक्रमणविरुद्ध एकताबद्ध हुन सम्पूर्ण न्यायप्रेमी, प्रगतिशील तथा सचेत नागरिकहरूमा हार्दिक अपिल गर्दछौं।
क्रान्तिकारी अभिवादन सहित!
.....................
विजय प्रकाश शर्मा सापकोटा
( अध्यक्ष )
अखिल नेपाल राष्ट्रिय स्वतन्त्र विद्यार्थी यूनियन ( क्रान्तिकारी ) , केन्द्रीय समिति ।

11/07/2026

कीर्तिपुरस्थित राधास्वामी होल्डिङ सेन्टरमा रहेका सुकुम्बासीहरूको अवस्था बुझ्न पुगेका जेनजी अभियन्ताहरू माजिद अन्सारी, मोनिका निरौला, रिया बानियाँ र सरिस्मा थापामाथि गरिएको प्रहरी कुटपिट, धरपकड तथा गिरफ्तारी राज्यको दमनकारी र निरंकुश चरित्रको अर्को उदाहरण हो।
नागरिकको पीडा बुझ्न पुग्ने युवामाथि लाठी बर्साउने, आवाज दबाउने र गिरफ्तारी गर्ने कार्य कुनै पनि लोकतान्त्रिक शासन व्यवस्थामा स्वीकार्य हुन सक्दैन। असहमति र प्रश्नलाई बल प्रयोग गरेर दबाउने प्रवृत्ति तत्काल बन्द गर।
गिरफ्तार गरिएका सबै अभियन्ताहरूलाई तत्काल विना सर्त रिहा गर। प्रहरीको कुटपिटबाट घाइते हुनुभएका माजिद अन्सारीको शीघ्र स्वास्थ्य लाभको कामना गर्दछौँ।
दमनले सत्यलाई हराउन सक्दैन। नागरिकको आवाज थुन्न खोज्ने प्रत्येक कदमको सशक्त प्रतिवाद हुनेछ।

10/07/2026

** प्रेस विज्ञप्ति **
दिवंगत गणेश नेपाली प्रति हार्दिक श्रद्धाञ्जली ।
संगठनका चितवन जिल्ला अध्यक्ष क. सुशील कार्की लगायतका घाइते साथीहरूकोे शीघ्र स्वास्थ्य लाभको कामना ।

09/07/2026

** प्रेस विज्ञप्ति **
मिति: २०८३/०३/२६
राहदानी विभागमा सेवा लिन पुगेका २५ वर्षीय युवा गणेशले आत्मदाहको प्रयास गर्न बाध्य भएको अत्यन्त हृदयविदारक घटनाले अनेरास्ववियू (क्रान्तिकारी) केन्द्रीय समितिलाई गहिरो स्तब्ध र मर्माहत बनाएको छ।
आफ्नै देशमा भविष्य नदेखेको एक युवा सरकारी कार्यालयभित्रै आफ्नै शरीरमा आगो लगाउन बाध्य हुनु कुनै व्यक्तिगत घटना मात्र होइन, यो सरकारको नागरिकप्रतिको गैरजिम्मेवार, असंवेदनशील र अमानवीय रवैया, सार्वजनिक सेवामा व्याप्त बेथिति तथा कुशासनको दर्दनाक परिणाम हो। नागरिकले सेवा पाउनुपर्ने सरकारी निकायमै अपमान, बेवास्ता र सास्ती भोग्नुपर्ने अवस्था सिर्जना हुनु राज्य व्यवस्थाको गम्भीर असफलता हो।
अनेरास्ववियू (क्रान्तिकारी) घाइते युवा गणेशको शीघ्र स्वास्थ्यलाभको कामना गर्दै उहाँको सम्पूर्ण उपचार राज्यले निःशुल्क गराउन, घटनाको निष्पक्ष छानबिन गरी दोषी तथा जिम्मेवारमाथि कानुनी कारबाही गर्न र यस्ता घटना पुनः दोहोरिन नदिने गरी सार्वजनिक सेवा प्रणालीमा तत्काल सुधार गर्न नेपाल सरकारसँग जोडदार माग गर्दछ।
....................................

विजय प्रकाश शर्मा सापकोटा
अध्यक्ष

07/07/2026

*** प्रेस विज्ञप्ति ***
मिति: २०८३/०३/२३
त्रिभुवन विश्वविद्यालय अन्तर्गतका आंगिक क्याम्पसहरूमा ३ वर्षे एलएलबी कार्यक्रमको नाममा गरिएको मनपरी तथा चर्को शुल्क वृद्धिप्रति अनेरास्ववियू (क्रान्तिकारी) केन्द्रीय समितिको गम्भीर ध्यानाकर्षण भएको छ। सार्वजनिक शिक्षालाई योजनाबद्ध रूपमा व्यापारीकरण गर्ने, विद्यार्थीमाथि आर्थिक भार थोपर्ने तथा आम विद्यार्थीलाई शिक्षाको पहुँचबाट वञ्चित गर्ने यस विद्यार्थीविरोधी कदमप्रति हाम्रो संगठन घोर भर्त्सना गर्दछ।
एउटै विश्वविद्यालय अन्तर्गत एउटै कार्यक्रमका लागि फरक–फरक र अस्वाभाविक शुल्क निर्धारण गरिनु शिक्षा क्षेत्रमा मौलाएको बेथिति मात्र होइन, यो विद्यार्थीमाथि थोपरिएको खुला आर्थिक शोषण र लुटको प्रतिनिधि उदाहरण हो। नेपाली जनता बेरोजगारी, महँगी र आर्थिक संकटको चपेटामा पिल्सिरहेका बेला सरकार आफ्नो संवैधानिक दायित्वबाट पन्छिँदै शिक्षा क्षेत्रलाई बजार र नाफाको माध्यम बनाउने दिशामा उन्मुख देखिएको छ। विद्यार्थीको भविष्यलाई व्यापारको वस्तु बनाउने र जनताको छोराछोरीमाथि आर्थिक भार थोपर्ने यस्ता जनविरोधी तथा विद्यार्थीविरोधी नीतिहरू कुनै पनि हालतमा स्वीकार्य हुन सक्दैनन्।
अतः अनेरास्ववियू (क्रान्तिकारी) केन्द्रीय समिति त्रिभुवन विश्वविद्यालय प्रशासन तथा सरकारलाई मनपरी शुल्क वृद्धि तत्काल फिर्ता लिन, शिक्षा क्षेत्रमाथिको व्यापारीकरण अन्त्य गर्न र विद्यार्थीमैत्री नीति लागू गर्न कडा चेतावनी दिन चाहन्छ। विद्यार्थीहरूको न्यायोचित आवाजलाई बेवास्ता गरिएमा देशव्यापी चरणबद्ध सशक्त संघर्षका कार्यक्रम अगाडि बढाइनेछन् र त्यसबाट उत्पन्न हुने सम्पूर्ण परिस्थितिको जिम्मेवारी सरकार र सम्बन्धित निकायले नै वहन गर्नुपर्नेछ।
क्रान्तिकारी अभिवादनसहित,

..................................

विजय प्रकाश शर्मा सापकोटा
( अध्यक्ष )
अनेरास्ववियू ( क्रान्तिकारी ) केन्द्रीय समिति ।

19/06/2026

अखिल नेपाल राष्ट्रिय स्वतन्त्र विद्यार्थी यूनियन ( क्रान्तिकारी ) , केन्द्रीय समिति ।
मिति : २०८३/०३/०५
प्रेस विज्ञप्ति
बूढानीलकण्ठस्थित भक्तिवेदान्त गुरुकुल ( इस्कोन) मा बालबालिकामाथि भएको भनिएको यौन शोषण, शारीरिक तथा मानसिक यातनाको घटनाले सम्पूर्ण समाजलाई स्तब्ध बनाएको छ। धर्म, संस्कार र शिक्षाको आवरणमा बालबालिकामाथि गरिने कुनै पनि प्रकारको हिंसा, शोषण र अत्याचार मानवताविरुद्धको जघन्य अपराध हो।
अनेरास्ववियू (क्रान्तिकारी) उक्त घटनाको घोर भर्त्सना तथा निन्दा गर्दछ। घटनामा संलग्न सबै अपराधीहरूलाई कुनै पनि प्रभाव, पहुँच वा संरक्षणको आडमा उन्मुक्ति नदिई हदैसम्मको कानुनी कारबाही गर्न, साथै पीडित बालबालिकाको तत्काल उद्धार, उपचार, पुनःस्थापना र न्याय सुनिश्चित गर्न नेपाल सरकार तथा सम्बन्धित निकायसमक्ष जोडदार माग गर्दछौँ।
बालबालिकामाथि हुने हिंसा र शोषणविरुद्ध हाम्रो संघर्ष निरन्तर रहनेछ। बालअधिकारमाथिको आक्रमण सह्य छैन, अपराधीलाई उन्मुक्ति स्वीकार्य छैन।
.........................

विजय प्रकाश शर्मा सापकोटा
अध्यक्ष