04/12/2025
शुभकामना सन्देश
किरात समुदायको पर्व उधौली, ज्यापू समुदायले मनाउने योमरी पुन्हि (ज्यापु दिवस) तथा हिन्दू धर्मावलम्बीको धान्यपूर्णिमा पर्वको अवसरमा देश–विदेशमा रहनु भएका सम्पूर्ण नेपाली दाजुभाइ तथा दिदीबहिनीहरूमा हार्दिक शुभकामना व्यक्त गर्दछु।
प्रकृति र मानवबीचको अन्योन्याश्रित सम्बन्धको प्रतीकका रूपमा मनाइने यी चाडपर्वहरूले सांस्कृतिक पहिचानलाई मजबुत बनाउनुका साथै सम्पूर्ण नेपालीहरूलाई राष्ट्रिय एकताको सूत्रमा बाँध्दै आएका छन्। सांस्कृतिक विविधताको सम्मान र संरक्षणबाट मात्र समावेशी तथा सहभागितामूलक राष्ट्र निर्माण सम्भव छ। नेपाली समाजको दीर्घ विकास यात्रामा यिनै सांस्कृतिक विविधताले सामूहिक चेतना र अन्तरसम्बन्ध निर्माणमा महत्त्वपूर्ण भूमिका निर्वाह गर्दै आएका छन्।
वर्तमान जटिल राजनीतिक परिस्थितिका बीचमा सामूहिकता, एकता र सहअस्तित्वका प्रतीक यी चाडपर्वहरूले अग्रगामी रूपान्तरणका पक्षधरबीच आपसी विश्वास, राष्ट्रिय एकता र सकारात्मक ऊर्जा प्रवाह गर्ने विश्वास व्यक्त गर्दछु।
अन्त्यमा, यी पर्वहरूले सम्पूर्ण नेपालीमा आपसी सद्भाव, सहिष्णुता र एकताबोधलाई अझ सुदृढ बनाओस् भन्ने कामना गर्दै देश–विदेशमा रहनुहुने सबैमा सुख, शान्ति, समृद्धि र उत्तरोत्तर प्रगतिका लागि हार्दिक मंगलमय शुभकामना व्यक्त गर्दछु।
१८ मंसिर २०८२
ने.सं. ११४६, थिंलाथ्व
