03/09/2026
भोटेकोशीको विनाशकारी बाढीले नुवाकोटको ढुंगे बजारमा 'सगुन कलेक्सन' सञ्चालन गर्दै आएकी महिला व्यवसायी सगुन राजभण्डारीको सर्वस्व लुटेको छ। बैंकबाट ऋण लिएर सुरु गरिएको पसल, लत्ताकपडा र सिङ्गो लगानी सेकेन्डभरमै बालुवा र लेदोमुनि पुरिएपछि उनी रातारात सडकमा पुगिन्। तर, यस्तो बज्रपातका बीच पनि टिकटक र सामाजिक सञ्जालमार्फत सगुनले देखाएको अभूतपूर्व धैर्यता, सामाजिक उत्तरदायित्व र मानवताको भावनाले आज लाखौँ नेपालीको मन छोएको छ।
आफ्नो सिङ्गो सम्पति सखाप हुँदा पनि आफ्नै पीडा बिर्सेर बाढीमा आमाबुबा गुमाएकी एक सानी नानीका लागि "१ रुपैयाँ भए पनि सहयोग गरिदिनुस्" भन्दै याचना गर्ने सगुनको परोपकारी मनको सर्वत्र प्रशंसा भइरहेको छ। विपद्को यो घडीमा राजनीति र आरोप-प्रत्यारोपभन्दा माथि उठेर एकजुट हुन आह्वान गर्ने उनको परिपक्व विचारले उनलाई साहसी नेपाली चेलीका रूपमा स्थापित गरेको छ। मरुभूमि बनेको ढुंगे बजारको छातीमा उभिएर आशा र मानवताको दीप बाल्ने सगुनको यो अदम्य साहस आज सिंगो देशका लागि ठूलो प्रेरणा बनेको छ!
