23/08/2026
गौरीशंकर गाउँपालिका, सुरिद्वारा श्री हलेश्वर माध्यमिक विद्यालयमा आयोजित “अभिभावकसँग हामि बनाउछौ, हाम्रो विद्यालाय अन्तर्क्रिया तथा एकदिने प्रशिक्षण कार्यक्रम” भव्य एवं उत्साहपूर्ण वातावरणमा सम्पन्न भएको छ।
कार्यक्रममा गौरीशंकर गाउँपालिका अध्यक्ष श्री विश्वास कार्की ज्यू, प्रमुख प्रशासकीय अधिकृत श्री रिजेश उपरकोटी ज्यू, प्रशिक्षक श्री पूर्ण प्रसाद दवाडी ज्यू, विद्यालयका शिक्षक–शिक्षिका, विद्यार्थी, अभिभावक लगायत विभिन्न क्षेत्रका व्यक्तित्वहरूको गरिमामय उपस्थिति रहेको थियो।
एकदिने प्रशिक्षणका क्रममा बालबालिकाको सिकाइमा अभिभावकको भूमिका, विद्यार्थीको व्यवहार तथा मनोविज्ञान, घर–विद्यालय सम्बन्ध, शैक्षिक वातावरण निर्माण, विद्यार्थीको क्षमता पहिचान तथा उत्प्रेरणा, नियमित संवाद र सहकार्यको आवश्यकता लगायतका विषयमा महत्वपूर्ण प्रशिक्षण तथा छलफल गरिएको थियो।कार्यक्रममा सहभागी अभिभावकहरूले आफ्ना जिज्ञासा, अनुभव, समस्या तथा सुझावहरू प्रस्तुत गर्नुभएको थियो भने शिक्षक–शिक्षिका तथा सम्बन्धित सरोकारवालाहरूबीच विद्यार्थीको शैक्षिक प्रगति र विद्यालयको समग्र सुधारका विषयमा खुला एवं सकारात्मक अन्तर्क्रिया भएको थियो।
विद्यालयको गुणस्तर सुधारका लागि “विद्यालयको प्रयास मात्र पर्याप्त हुँदैन, अभिभावकको साथ र समुदायको सहयोग पनि उत्तिकै महत्वपूर्ण हुन्छ” भन्ने भावनाका साथ कार्यक्रमले विद्यालय र अभिभावकबीचको सम्बन्धलाई थप सुदृढ बनाउने विश्वास गरिएको छ।
कार्यक्रम सफलतापूर्वक सम्पन्न गर्न सहयोग गर्नुहुने सम्पूर्ण अभिभावकज्यूहरू, शिक्षक–शिक्षिकाज्यूहरू, विद्यार्थी भाइबहिनीहरू, प्रशिक्षकज्यू, जनप्रतिनिधिज्यूहरू तथा सम्पूर्ण सरोकारवालाहरूप्रति हार्दिक धन्यवाद तथा आभार व्यक्त गर्दछौँ।
